Mga dating ka-banda, nakaaway… KEAN, HAPPY SA FRIENDSHIP NILA NG SESSIONISTAS DAHIL WALANG SAPAWAN

ni Melba Llanera @Insider | Jan. 20, 2025

Kean - Love, Sessionistas - FB / @roughh.patch

“If may maayos na mga bagay, mangyayari at mangyayari ‘yun in God’s perfect time,” ito ang naging pahayag sa amin ni Kean Cipriano nang tanungin namin siya sa nakaraang Love: Sessionistas The Pre-Valentine Concert na magaganap sa darating na February 8 sa The Theater ng Solaire Casino and Resort Hotel, kung may tsansa pa ba silang magkaayos ng mga dating kasama sa bandang Callalily. 

Si Kean ang dating lead vocalist ng grupo at umalis siya sa grupo nu’ng 2022, kung saan hindi naging maganda ang paghihiwalay nila ng grupo na ngayon ay tinatawag nang Lily. 

Naniniwala rin si Kean na panahon na lang ang makakapagsabi, lalo’t hindi ito puwedeng pilitin kung hindi pa talaga oras.

Mas mabuting ayusin muna ng mga dating kabanda niya ang mga isyu nila sa sarili dahil kung mangyayari ito sa ngayon ay ‘di rin sila magkakaintindihan. 

Ayon kay Kean ay gusto niyang mag-usap sila pero sarado ang mga ito at naging sumbungan ang social media na lalong nagpagulo sa sitwasyon. Tinanggap na lang daw niya ang lahat, nag-move on siya sa kanyang buhay, nagpokus sa kanyang career, lalo’t maikli lang ang buhay.

Sa ngayon ay wala ring nangyayari na pinagbabawalan siya ng Lily na kantahin ang mga kanta nila at vice-versa. 

Paliwanag sa amin ni Kean sa sandaling nailabas na ang isang kanta, kahit na sino ay maaaring kantahin na ito. 

Para rin sa singer, hindi lang isang tao ang puwedeng magmay-ari nito dahil joint effort ito ng isang banda kung saan pinagsama-sama ang talento ng bawat isa.

Well, kung hindi man naging maganda ang relasyon niya sa mga dating kagrupo ay taliwas naman ito sa naging relasyon ni Kean sa mga kasamahan sa grupong Sessionistas. 

Patunay nga nito ay magkakaroon sila ng reunion concert na may titulong Love Sessionistas: The Pre-Valentine Concert kasama sina Ice Seguerra, Sitti, Princess Velasco, Duncan Ramos, Juris, at Nyoy Volante.

Excited na siya sa nalalapit na concert. Palaging inspirado si Kean na makasama ang grupo dahil naniniwala siya na ang grupo nila ay binubuo ng ilan sa pinakamagagaling at pinakamahuhusay sa larangan ng OPM. 

Nang tanungin namin kung ano sa palagay niya ang rason kung bakit nananatiling buo ang grupo, ayon kay Kean ay walang lugar ang kompetisyon at sapawan sa grupo nila at may mataas silang respeto sa bawat isa.

---

NAKAKALUNGKOT isipin na umurong sa kandidatura niya sa Senado si Manong Chavit Singson. Isyu sa kanyang kalusugan ang rason na ibinigay sa hindi pagkakatuloy ng kandidatura, dahil labas-masok nga sa ospital nitong mga nakaraang araw ang pulitiko sanhi ng pneumonia. 

Sa edad niyang 83, naisip nito na mas magandang magpokus na muna siya sa pagbuti ng kanyang kalusugan.

Hindi man natuloy ang pagtakbo, panalo naman si Manong Chavit sa puso ng maraming mga Pilipino. Hiling lang sana ng marami ay matuloy ang e-jeepney na naipangako ni Manong Chavit sa mga jeepney drivers, kung saan ibibigay niya ito sa mas mababang halaga.

Dasal namin ay ang mabilising paglakas ni Manong Chavit at maipagpatuloy niya sana ang pagtulong sa mga nangangailangan sa pamamagitan ng inilunsad niyang V-Bank.

P1.7 M ang piyansa sa 14 counts ng kaso… RUFA MAE, NATULOG SA NBI

ni Melba Llanera @Insider | Jan. 10, 2025

Rufa Mae Quinto bailed - News 5 / Circulated / SS

Nagpalipas ng gabi sa National Bureau of Investigation (NBI) headquarter si Rufa Mae Quinto dahil hindi natapos ang proseso ng pagpipiyansa niya sa kasong 14 counts of violation ng Section 8 ng Securities Regulation Code. 

Napagsarhan sila ng business hours ng NBI, kaya hindi natapos ang pagpipiyansa niya. 

Ito ay may kinalaman sa kasong isinampa rin noong nakaraang taon sa aktres na si Neri Naig, kung saan nag-file ng reklamo ang ilang investors ng beauty clinic na Dermacare na pag-aari ni Chanda Atienza. 

Umabot sa P1.7 milyon ang halaga ng piyansa ni Rufa Mae para sa 14 counts kung saan P126,000 thousand ang halaga ng bawat kaso.

Pinaninindigan ng sexy comedienne na katulad ng iba ay biktima lang din siya at ayon sa abogado ng aktres na si Atty. Mary Louise Reyes ay may utang pa ang beauty clinic dahil hindi pa nababayaran si Rufa Mae sa pag-eendorso nito.

Ang kahanga-hanga lang kay Rufa Mae ay boluntaryo itong sumuko, kung saan nu’ng dumating ito ng bansa nu’ng January 8 mula sa Amerika ay sinalubong na sa airport ng NBI officers dahil nakipag-ugnayan na rin ang abogado niya sa tanggapan.

Sa nangyaring ito kina Rufa Mae at Neri, aral at babala na ito sa mga celebrities natin na mag-ingat at mag-background check na rin sa mga ieendorso nilang produkto para makaiwas na rin sila sa ganitong senaryo, lalo’t hindi biro ang masampahan ng kaso.

---

Napili ng Ahon Mahirap Partylist first nominee na si Wilbert Tolentino ang mga Malabonians para pagkalooban ng e-trikes at bigas. 

Kasama ang mayor ng Malabon na si Mayor Jeannie Sandoval at mga kapitan na nasasakupan nito nang mamahagi siya ng kanyang mga donasyon.  

Sa interbyu namin kay Wilbert ay ikinuwento nito na ang Malabon ang isa sa mga unang yumakap sa Ahon Mahirap, kung saan marami sa mga taga-Malabon ay miyembro ng organisasyon. 

Dahil dito, itinuturing na niya ang bayan na pangalawang tahanan niya. Ang naturang bayan din ang isa sa mga pinagkalooban ng Ahon Mahirap ng tulong noong tumama ang malalakas na bagyo sa bansa tulad ng Kristine at Carina.  

Kinumpirma rin sa amin ni Wilbert na si Herlene Budol ang mukha ng Ahon Mahirap, kung saan isa sa magandang ehemplo ang Kapuso actress ng taong nagmula sa hirap, nagsikap, umahon, at ngayon ay nararating na ang mga pangarap sa buhay tulad ng maging beauty queen at artista. 

Hindi man siya ang manager nito sa ngayon, ay hindi napuputol ang magandang samahan nilang dalawa. 

Natanong nga namin si Wilbert kung ano ang payo niya kay Hipon Girl nang masangkot sa kontrobersiya ng hiwalayang Rob Gomez at Shaila Rebortera. 

Ayon kay Wilbert, ipinakita sa kanya ng dating alaga ang palitan ng mga mensahe nito kay Rob, at masasabi niya na nadagdagan at nabawasan ng iba ang convo ng dalawa at pinalabas na may relasyon na namamagitan sa mga ito. 

Ang payo niya kay Herlene ay gumawa ng official statement para klaruhin ang balita, lalo’t wala itong kasalanan.  

Sa Ahon Mahirap Partylist first nominee rin namin nalaman na pagkalipas ng dalawang taon, anuman ang maging kapalaran niya sa public service ay muli siyang sasabak sa pageantry. 

Siniguro sa amin ni Wilbert na hindi niya gagawin ang mangurakot na siyang sakit ng karamihan sa mga pumalaot sa pulitika. Hindi pala siya kumukuha ng komisyon sa mga naging alaga tulad nina Herlene at Madame Inutz, at in fact, siya pa raw ang naglalabas ng pera para tumulong sa mga ito at sa iba pang nangangailangan.

VICE, AMINADONG HINILING NA MAG-NO. 1 ULI ANG MOVIE SA MMFFF

ni Melba Llanera @Insider | Jan. 9, 2025

Vice Ganda - Instagram

Ngayong extended ang 50th Metro Manila Film Festival (MMFF) hanggang January 14, mas malaki ang tsansa na makabawi ang mga producers sa laki ng production cost na nagastos nila sa mga official entries sa taunang film festival. 

Nangunguna pa rin ang And The Breadwinner Is (ATBI) na pinagbibidahan ni Vice Ganda. 

Nang makapanayam namin ang TV host sa nakaraang Gabi ng Parangal noong December 27, ayaw pang i-claim ito ni Vice dahil hindi pa naglalabas ang MMFF ng official gross. Pero nakarating sa kanya na puno ang mga sinehan at sold-out ang mga screenings. 

Inamin naman niya na hiniling niyang mag-No. 1 sila, pero hindi inasahan dahil hindi niya puwedeng iutos sa mga manonood kung sino ang gustong panoorin ng mga ito. 

Ayon kay Vice, hiniling niya ito para mapanood ng mga tao ang sama-sama nilang effort para makapagpalabas ng isang magandang pelikula.  

Maikokonsidera namin na ito ang pinakamagandang pelikula na nagawa ni Vice dahil bukod sa maganda ang istorya at may kurot sa puso, mahuhusay ang mga gumanap dito — mula kina Vice, Malou de Guzman, Gladys Reyes, Jhong Hilario, Maris Racal at marami pang iba.  

---

Kaya ayaw panoorin…

TOPAKK, HOLD ME CLOSE AT MY FUTURE YOU, MAS MAHAL NG P200 ANG TIKET KESA SA MMFF MOVIE NINA VICE, ATBP.

HANGGANG ngayon nga ay usap-usapan pa rin ang hindi pagkaka-nominate nina Aga Muhlach at Direk Dan Villegas ng Uninvited, maging nina Direk Jun Lana at Eugene Domingo para sa pelikulang And The Breadwinner Is (ATBI) sa mga kategoryang dapat sila na-nominate. 

Kinlaro na rin naman ni MMFF Chairman Romando S. Artes na wala silang kinalaman sa naging resulta ng mga nanalo o sa linya ng mga nominado dahil sakop ito ng jury ng MMFF at wala silang kontrol ditoa noong nanood kami sa ilang sinehan, nakalagay ang mga pelikulang Topakk, Hold Me Close (HMC) at My Future You (MFY) sa Director’s Club, kung saan ang halaga ng ticket ay nasa P590 kumpara sa regular theaters na P390 lang na pinagpapalabasan ng ibang MMFF entries. 

Hindi biru-biro ang dagdag na P200 para makapanood ka ng isang pelikula, kaya’t hindi kataka-taka kung mas pilahan ang mas murang ticket kahit pa gustong panoorin ng iba ang mga pelikulang nasa Director’s Club. 

Nawa’y magawan ito ng paraan ni MMFF Chair Artes, lalo’t sa panayam namin sa kanya ay nabanggit niya na may kontrol sila kung ano’ng mga pelikula ang dadagdagan at babawasan. 

Hiling namin ay mabigyan sana ito ng karampatang aksiyon nang makabawi-bawi naman ang ibang MMFF entries.  

---

BAGO pa man ang Gabi ng Parangal ng 50th Metro Manila Film Festival (MMFF), nainterbyu na namin si Ms. Vilma Santos thru Messenger. 

Tinanong namin ang Star for All Seasons kung may pressure ba sa kanya na mahuhusay ang mga aktres na kalaban niya sa Best Actress category tulad nina Lorna Tolentino, Aicelle Santos, Julia Montes, at Judy Ann Santos, na siya ngang nag-uwi ng award nu’ng gabing iyon. 

Para sa Star for All Seasons, kapag may ginagawa siyang role sa ngayon ay hindi niya iniisip kung panlaban ito o hindi dahil ang pokus niya ay makapasok sa karakter na ginagampanan at maibigay kung ano ang hinihingi ng role. 

Sa dami na ng awards at pagkilala na naipagkaloob kay Ate Vi, hindi na big deal sa kanya kung manalo o matalo. 

Alam namin na sobra niyang naa-appreciate sa tuwing nananalo siya, pero alam din naman niya na kung ‘di papalarin na manalo ay hindi na ito para indahin o ikasama ng loob niya.  

Kilala rin si Ate Vi na humble, mabait at marunong magpahalaga sa mga nagmamahal sa kanya. 

Nu’ng Linggo ay dinalaw ni Ate Vi ang puntod ng namayapang Ed de Leon sa Mother Theresa Columbary sa La Loma. Si Tito Ed ang isa sa pinakamalalapit na reporters sa Star for All Seasons. Alam namin na masaya ngayon si Tito Ed dahil nadalaw na siya ng kanyang idolo at pinakamahal na artista sa buong industriya.