Naiskandalo dahil kay Rob… HERLENE, NAGPATINGIN SA DOKTOR SA PAG-IISIP

ni Melba Llanera @Insider | Feb. 6, 2025

Herlene Budol - IG

Ngayong inamin na ni Herlene Budol na sumailalim siya sa series of psychological therapy nang madawit ang pangalan niya sa isyu nina Rob Gomez, Bianca Manalo at sa live-in partner ng Kapuso actor na si Sheila Rebortera — kung saan pinagpiyestahan ng mga netizens ang nag-leak na private messages ni Rob sa dalawang Magandang Dilag (MD) co-stars — naalala namin kung ano ang ipinayo ng dati niyang manager at ngayon ay Ahon Mahirap first nominee na si Wilbert Tolentino kay Hipon Girl.  

Sa panayam namin noon kay Wilbert sa nakaraang pagbisita niya sa Malabon para magkaloob ng mga bigas at e-trikes sa iba’t ibang barangay doon, ibinahagi ng Ahon Mahirap first nominee na ang ipinayo niya kay Herlene ay magsabi lang ito ng katotohanan at maglabas ng official statement.  

Kuwento pa ni Wilbert, tiningnan niya ang mga screenshots na nag-leak, at marami rito ay hindi galing kay Herlene — pinaghalu-halo na lang ng ibang vloggers at ginamit sa accounts nila para makakuha ng maraming views. 

Ayon pa kay Wilbert, sinabihan niya ang dating alaga na wala silang dapat iisyung public apology dahil single noong panahon na iyon si Rob. Sa ini-release nitong statement, kinlaro niya na walang katotohanan ang mga paratang at pinalala lang ito ng iba.  

Si Herlene pa rin ang mukha ng Ahon Mahirap at hindi naging rason ang mga negatibong isyu para hindi ito kunin ng naturang partylist. 

Paliwanag sa amin ni Wilbert, si Herlene ang perpektong halimbawa ng isang tao na hindi alintana ang kahirapan para abutin ang kanyang pangarap at baguhin ang kanyang buhay—na siyang adbokasiya ng Ahon Mahirap.  

Sa kabilang banda, ibinalita rin sa amin ni Wilbert na pagkatapos ng dalawang taon ay plano niyang isali uli si Herlene sa isang international beauty pageant, lalo't nananatili ang pangarap nito na maging international beauty queen. 

Sa ngayon, nakapokus muna ang Kapuso actress sa kanyang series sa GMA, ang Binibining Marikit (BM), na ayon sa aktres ay siyang pagtutuunan niya ng panahon at atensiyon.  

---

Sorry, mga kafatid! TRANS AT MAY-ASAWA, BAWAL SA MISS WORLD PHILS. QC 2025

SAMANTALA, sa nakaraang Ms. World Philippines Quezon City 2025, pormal na humarap sa media ang sampung contestants para sa kanilang national costume presentation. 

Suot ang kanilang mga naggagandahan at makukulay na national costumes sa event na ginanap sa Grand West Side Hotel, lumutang ang ganda at kaseksihan ng mga kandidata.  

Nakapanayam din namin dito ang franchise director ng Ms. World Philippines Quezon City 2025 na si Ms. Jen Jarina. Ayon sa kanya, ang hinahanap niya sa mananalo ay may magandang mukha at katawan, matalino, may social awareness, leadership, at magandang attitude. 

Ikinuwento rin niya na magaganap ang coronation night nito sa darating na April 5 sa Novotel Manila. Ang kokoronahan bilang Ms. World Philippines Quezon City 2025 ay isasali sa Ms. World Philippines national pageant sa ilalim ng franchise na pinangungunahan ng National Director nito na si Arnold Vegafria — bukod pa sa P300,000 thousand bilang cash prize.  

Hiningan namin ng reaksiyon kung bukas ba ang Ms. World Philippines Quezon City sa mga transwoman at sa mga may-asawa na nagbabalak sumali rito. 

Ayon kay Ms. Jen Jarina, naniniwala siya na may tamang beauty pageants para sa kanila, at ang Ms. World Philippines QC ay para lamang sa mga single at straight na babae.

‘Di raw nakikialam sa buhay ng utol… SANYA, ‘DI ALAM KUNG KELAN NAG-BREAK SINA JAK AT BARBIE

ni Melba Llanera @Insider | Feb. 1, 2025

Barbie, Jak at Sanya - Instagram

Agad na binigyang-linaw ni Sanya Lopez na hindi patungkol kay Barbie Forteza ang Instagram (IG) post niya nu'ng Enero tungkol sa karma. 

May caption kasi ito na: “God removes people from your life because He heard the conversation,” na agad na inakala ng maraming netizens na pinapatamaan dpaw ni

Sanya ang ex-girlfriend ng kapatid na si Jak Roberto, lalo’t kahihiwalay pa lang ng dalawa.  

Paliwanag naman sa amin ng Kapuso actress, may respeto siya sa dalawa at sa naging relasyon nila, bukod pa sa itinuturing din niyang kaibigan ang Pulang Araw (PA) co-star. 

Ayon kay Sanya, maraming assumptions ang ibang tao sa mga tulad niyang artista na walang alam sa totoong nangyayari o sa personal niyang buhay. Nawala rin sa isip niya na may hiwalayan na nga palang naganap sa dalawa, lalo na’t wala siyang ideya kung kailan talaga nag-break sina Barbie at Jak.  

Siniguro rin niya sa amin na wala siyang ni katiting na sama ng loob o tampo kay Barbie dahil naniniwala siya na lahat ng mga nangyayari ay may dahilan at wala sa bokabularyo niya ang makialam sa relasyon ng may relasyon.  

Well, tinanong din namin kung nakapag-usap na ba sila ni Jak tungkol sa kinauwian ng relasyon nito at ni Barbie. Nagpakatotoo namang inamin ni Sanya na hindi pa sila nagkakausap ng kanyang Kuya Jak dahil bukod sa pareho silang busy, kilala niya ang kapatid na hindi ito mag-o-open hangga’t hindi pa ito handa. 

Dagdag pa niya, kapag handa nang magbukas ng saloobin ang kapatid, lagi naman siyang handang makinig at magbigay ng suporta.  

Naging emosyonal siya sa nakaraang guesting sa Fast Talk with Boy Abunda (FTWBA) nang mapag-usapan ang tungkol sa pamilya, kaya nag-espekula ang iba na baka may problema silang kinakaharap. 

Paliwanag sa amin ni Sanya, maayos ang relasyon nila ng kanyang pamilya at ang tanging problema lang ay ang kakulangan ng oras dahil sa sobrang hectic ng kanyang schedule, lalo na sa sunud-sunod na taping na kadalasan ay locked-in.  

Naniniwala rin siya sa kasabihang, “Strike while the iron is hot,” kaya’t basta kaya niya at maganda naman ang materyal, kanyang tinatanggap.  

Kasama siya sa seryeng Samahan Ng Mga Makasalanan (SNMM) ng GMA-7, pero proud pa rin si Sanya sa magandang feedback ng PA na ayon sa kanya ay kasama sa ia-archive sa Lunar Codex na ipapadala sa moon (buwan).  

---

SAMANTALA, para kay mayoralty candidate Isko Moreno, ang hiling ng kanyang kapwa-Manileño at ang kagustuhang maibalik ang kaayusan at kalinisan ng Maynila ang dahilan kung bakit tatakbo siyang muli bilang alkalde. 

Katiket niya si Chi Atienza na anak ni dating Manila Mayor Lito Atienza, na kilala na rin sa larangan ng pulitika.  

Ang actor-politician ang nag-induct sa bagong halal na mga opisyal ng Philippine Movie Press Club para sa taong 2025 na pinamumunuan ng bagong pangulo nito na si Mell Navarro. 

Dito ay nagbitaw din ng salita si Isko na kung papalarin siyang maihalal muli, ipapagamit niya ang Metropolitan Theater sa Star Awards, ang taunang award-giving body ng club.  

Tatakbo rin bilang konsehal ng Maynila ang anak niyang si Joaquin Domagoso.

Kuwento sa amin ni Isko, ngayon ay mas maiintindihan na ng anak niya kung bakit lagi siyang ginagabi ng uwi noon at kung minsan ay kinabukasan na umuuwi para lang mabigyang-serbisyo ang mga nangangailangan nilang kababayan.

Soul Siren, todo-iwas daw… NYOY, GAME NANG MAKASAMA SI NINA SA CONCERT, EX-GF, AYAW PA RIN

ni Melba Llanera @Insider | Jan. 25, 2025

Nyoy Volante at Nina - FB / Instagram

Taliwas ang mga pahayag nina Nina at Nyoy Volante sa tanong kung natuldukan at maayos na ba ang samahan nila pagkatapos ng hiwalayan nila noong 2007. 

Hindi naging maganda ang breakup ng dalawa na may kaugnayan sa usaping pera. In fact, nauwi pa nga ito sa demandahan noong 2009. 

Sa huli ay iniurong din ni Nina ang demanda laban sa ex-boyfriend kung saan nagkaroon sila ng agreed compromise. 

Sa mga nakaraang interbyu kay Nina, nabanggit nito na ayaw na niyang makasama uli sa isang trabaho si Nyoy.  

Sa nakaraang interview namin kay Nyoy sa presscon ng Love: Sessionistas The Pre-Valentine Concert na magaganap sa darating na Pebrero 8 sa The Theater ng Solaire Resort and Casino, natanong ang singer kung baka siya ang dahilan kaya hindi sumama si Nina sa reunion concert ng Sessionistas. 

Paliwanag naman ni Nyoy, dapat ay kasama ang ex-girlfriend. Pero dahil mga singers sila na ang repertoire ay love songs, mabiling-mabili sila kapag ganitong panahon kung saan may Valentine concert din si Nina ng Pebrero 7, ang Love Matters (LM) na gaganapin naman sa New Frontier Theater. 

Ayon pa kay Nyoy, nagbabatian sila ni Nina ‘pag nagkikita at wala nang dapat pag-usapan pa dahil matagal na itong isyu. 

Tinanong din namin kung bukas ba siyang makasama sa isang show o concert si Nina, at agad naman kaming sinagot ni Nyoy na walang problema sa kanya pero dahil may kani-kanya silang career, mas maganda na i-explore kung sino pa ang puwede niyang makatrabaho.  

Sa panayam naman kay Nina sa Showbiz Update (SU) nina Kuya Ogie Diaz, Mama Loi, at Ate Mrena, tahasang sinabi ng singer na hindi pa sila okey ni Nyoy at hindi pa siya bukas na makatrabaho ang isang tao na hindi man pangalanan ay alam na kung sino ang pinatutungkulan niya. 

Ayon pa kay Nina, napatawad na niya ito pero bilang bahagi na ng nakaraan niya, ayaw na niyang maging parte pa ng buhay niya ang ex-BF. 

Tinanong din ang Soul Siren kung ano ang ginagawa niya ‘pag nagkikita sila. Ani Nina,

nag-iiwasan sila. 

Inaalam din ng manager niya kung sino ang makakasama niya sa isang show at depende sa manager niya kung sino ang gusto nitong makasama niya.  

Sa ngayon ay maligaya na si Nyoy sa piling ng kanyang asawa na si Mikkee Bradshaw, samantalang si Nina naman ay masaya na rin sa asawa niyang businessman na si Enrico Enriquez at may isa na silang anak na babae. 

Dahil sa magkaibang pahayag nina Nyoy at Nina, tama bang isipin na hindi pa rin pala sila okay talaga? 

---

SA ganda at husay ng pagkakagawa at sa full-house cast ng Incognito mula kina Richard Gutierrez, Ian Veneracion, Kaila Estrada, Anthony Jennings, Baron Geisler at Daniel Padilla, hindi kataka-taka na bukod sa mataas na ratings ng serye ay No. 1 show ito sa Netflix pagkatapos ng premiere nito noong Enero 17. 

Punumpuno ng aksiyon ang Incognito. Bilang isang private military company na lumalaban sa mga kriminal, kahanga-hanga ang mga hindi birong stunts na ipinapakita ng bawat cast.  

Sa panayam nga namin sa direktor ng Incognito na si Direk Lester Pimentel-Ong, bilib na bilib siya sa professionalism at pagiging game ng buong cast sa training na ginawa nila para sa mga delikadong stunts. 

Puring-puri rin ng Incognito director ang lahat dahil sa taping nila sa ibang bansa ay walang primadonna. Dito ay makikita mo na tumutulong magbuhat ang ilang cast ng mga gamit sa taping at walang feeling superstar sa mga ito.  

Nakakatuwa lang na kahit walang franchise ay patuloy ang Kapamilya Network sa paggawa ng mga de-kalidad na serye na talagang tinututukan ng mga manonood.