Saudi, babaling sa Pac-May 2, Team 2000 wagi sa ERJHS 3x3

ni MC / Gerard Arce @Sports | March 27, 2024

Nagselyo ng isang kasunduan si 8th-division World champion Manny “Pacman” Pacquiao sa Saudi Arabia patungkol sa hinaharap na laban – kung saan pangunahing nasa listahan si undefeated/retired Floyd Mayweather Jr. para sa inaabangang PacMay 2 na proyekto. 

Magandang balita ang ibinulgar ni MP Promotions President at international matchmaker Sean Gibbons matapos ang pakikipagpulong ni Pacquiao kay Saudi Arabian Chairman Turki Alalshikh tungkol sa  laban sa kanilang bansa para sa pagbabalik sa pro fight ng Filipino boxing legend para pagpilian ang laban kina Conor “The Destroyer” Benn, two-division UFC champion Conor “The Notorious” McGregor at Mayweather.  

“After meeting with his excellency Turki Alalshikh, boxing legend Manny Pacquiao is back at his gym in the Philippines and looking in incredible fighting shape,” wika ni Gibbons sa panayam ng World Boxing News.  

Samantala, walang iba kundi Team 2000. Nasungkit ng Team 2000 ang kampeonato sa kauna-unahang E. Rodriguez Jr High School Alumni 3x3 basketball tournament sa Barangay N.S. Amoranto covered court sa Malaya St. Quezon City. 

Sa pangunguna ng magkapatid na Mark and Jeff Caguisa, pinabagsak ng T2000 ang Batch 98, 14-10, para sa kampeonato sa 2-day competition na itinaguyod ng ERJHS Alumni Sports Club, sa pangunguna ni Ed Andaya ng Batch 81, bilang bahagi ng pagdiriwang ng ERJHS 72nd Foundation Day and Grand Alumni Homecoming noong Feb. 23-25.

Napili si Mark Caguisa bilang Most Valuable Player sa kompetisyon, na sinuportahan din ng ERJHS Alumni Association, sa ilalim nina President Jess Asistin at Vice-President Zeny Castor, at Barangay N.S. Amoranto Chairman Ato de Guzman. Sa pamumuno ni playing coach Jerome Nell. 

Ang iba pang mga miyembro ng T2000 ay sina Kelvin Pantaleon at Chris Santiago.  Iginawad ni incoming ERJHS alumni president Ramon "Monchie" Ferreros ng Batch 73 ang mga tropeo, katuwang sina Asistin at Andaya. Ang naturang kompetisyon ay sinuportahan din nina PBA Commissioner Willie Marcial at Deputy Commissioner Eric Castro.

NU at La Salle-Lipa namayani, top standings na sa PNVF U-18

ni MC @Sports | March 26, 2024

Lumilider na sa scoring ang National University at De La Salle-Lipa matapos mamayani kontra sa kani-kanilang karibal sa opening weekend ng Philippine National Volleyball Federation (PNVF) Under-18 Championship women’s division noong Linggo sa Rizal Memorial Coliseum. 

Nahigitan ng Lady Bullpups ang lakas ng Parañaque City, 25-4, 25-16 habang ginapi ng La Salle-Lipa ang kapitbahay na San Juan Institute of Technology-Batangas, 25-17, 25-19 para kumartada sa 12-team women’s division. 

Ang 21-point win ng NU sa first set ang pinakamalaking agwat sa torneo kung saan kinailangan lang ng Lady Bullpups ng 37 minuto na paglalaro para dispatsahin ang Parañaque. Sa tropa ng La Salle-Lipa ay nagwagi sila sa loob lang ng 48 minuto. 

Ang dalawang koponan ay sumampa sa parehong 2-0 slates para magsalo sa liderado ng Pool B kung saan may dalawa pang laban sa single-round elims.

Unang tinalo ng NU ang Colegio de Los Baños, 25-10, 25-12 habang ginapi ng La Salle-Lipa ang isa pang Batangas bet na Canossa Academy-Lipa sa bisa ng reverse sweep, 22-25, 25-19, 25-17. 

Sa Pool A, nagpakabog agad ang Maryhill College-Lucena (1-0) nang talunin ang wala pang panalong Limitless Sports Center (0-2), 25-18, 25-19 habang ang Gracel Christian College ay nagwagi kontra UAAP squad La Salle-Zobel, 25-22, 25-21. Ang unang  youth tournament na ito ng PNVF ni President Ramon “Tats” Suzara ay babalik sa Abril 5 pagkatapos ng Semana Santa.  

Ang laro sa three-setter formats ay nilalaro tuwing Biyernes, Sabado at Linggo para sa single-round eliminations sa parehong pool ng  women’s and men’s divisions bago ipatupad ang regular five-set match sa playoffs. Tanging ang top 4 teams sa bawat pool ay aabanse sa quarterfinals na maglalaro sa ilalim ng knockout format hanggang sa semifinals at sa championship para sa prestihiyosong  PNVF youth crown.

VNS-Asareht, Pangasinan at NU UST, bumida sa PNVF Men's at U-18

ni MC @Sports | March 25, 2024

Ang baguhang VNS Asereht-Savouge at ang  Umingan, Pangasinan team ay giniba rin ang kani-kanilang mga karibal habang tatlo pang team ang umiskor ng malaking panalo sa men’s division ng Philippine National Volleyball Federation (PNVF) Under-18 Championship nitong Sabado sa Rizal Memorial Coliseum.

Madaliang kumubra ng panalo ang batang Griffins sa bisa ng 25-12, 25-12 kontra Colegio de Los Baños habang naitakas ng Umingan ang 22-25, 25-15, 25-18 comeback win kontra Hermosa, Bataan para sa 1-0 slates ng Pool B. 

Humugot ng inspirasyon mula sa mga kapatid na kumuha ng back-to-back Final Four sa PNVF Champions League, kinailangan lang ng VNS ang 38 minuto upang makasampa sa win column at magtala ng 13-point victories sa bawat 2 sets. 

Mabagal man ang simula ng Umingan  pero dinomina ang Hermosa sa  huling 2 sets para sa pahirapang panalo sa halos 1 oras ng 12-team tourney sa ilalim ng best-of-three format. 

Samantala,  giniba rin ng National University at ng  University of Santo Tomas ang kani-kanilang karibal nang walisin ang (PNVF) Under-18 Championship women’s division nitong Biyernes sa Rizal Memorial Coliseum.  Mabilis na tinalo ng Lady Bullpups ang Colegio de Los Baños, 25-10, 25-12, habang ang Junior Golden Tigresses ay giniba ang  King’s Montessori School, 25-16, 25-23 para sa 1-0 slates ng Pool A at B.  

Pakabog na simula ito para sa nagbabawing NU sa torneo matapos isurender ang trono sa Adamson sa UAAP Season 86 girls’ volleyball tournament kung saan ang UST ang sumegunda sa elimination round at saka sumuko sa stepladder Final 4.  Kinailangan lamang ng NU ng 38 minuto para iposte nag panalo habang nahirapan muna ang UST kontra KMS bago nawali ang panalo sa 57 minuto.