DK Yoo, duguan sa exhibition match kontra astiging Pacman

ni MC - @Sports | December 12, 2022

Muling ipinamalas ng nag-iisang eight-division champion na si Manny Pacquiao ang kanyang bilis at lakas sa kanilang six-round exhibition match laban kay South Korean martial artist DK Yoo kahapon sa Korea International Exhibition Center sa Goyang, South Korea.

Pa-jab-jab pa si Yoo sa opening round habang pa-easy easy lang ang bitaw na jab ni Pacman. Bago matapos ang round, pinatikim na ni Pacman ang Koreano ng lakas ng magkasunod niyang kombinasyon.

Tumakbong paikot sa ring si Yoo sa round 2 habang nakaabang ang kaliwang straight hook ng Pinoy. Muling umatake si Pacquiao sa round 3 at doon na ito napagkawala ng mabibilis na upak na pinatama sa ulo at katawan ni Yoo bago nagpadapo ng malakas na right hook.

Napagod na si Yoo pagdating ng round 4, muling umatake rito si Pacman, nagpadapo ng nakatutulig na mga upak sa tiyan at ulo para paduguin ang ilong ng katunggali.

Nahihilo na sa round 5 si Yoo kaya naman ginanahan na si Pacman at sa huling banat ay nagpakawala na ito ng ilang sunod na suntok na tuluyan nang nasaktan ang hometown fighter.

Isang left uppercut ang nagpadapa kay Yoo sa canvas sa round 6. Nagawa pa niyang tumayo pero inupakan uli siya ni Pacman para muling bumagsak.

Obebe, bumanat pa sa 1st COPA-SMP Swimfest

ni MC - @Sports | December 12, 2022

Nakumpleto ni Paulene Beatriz Obebe ang isa pang sweep habang kinapos si Nicola Queen Diamante sa sa kanyang huling hataw sa pagtatapos ng 1st COPA-SMP (Congress of Philippine Aquatics, Inc.-Samahang Manlalangoy ng Pilipinas) Christmas Friendship Swimfest nitong weekend sa Teofilo Yldefonso Swimming Pool sa loob ng Rizal Memorial Sports Complex sa Malate, Maynila.

Isinara ni Obebe, ang ipinagmamalaki ng Aqua Sprint Swim Club, ang kampanya sa apat na nilahukang event sa pamamagitan ng mahusay na pagtatanghal sa girls 12-yrs-old 100m freestyle sa tiyempong isang minuto at 06.76 segundo na nagpatibay sa kanyang Most Outstanding Swimmer (MOS) award.

“Masayang-masaya po. Sana next year mapababa ko pa yung mga time sa event ko,” saad ni Obebe, naunang nagwagi sa girls 12-yrs Class A 50m butterfly (31.18), 50m backstroke (34.83) at 50-m free (29.33 ).

Tinaguriang 'Diamond Girl' ng COPA, si Diamante ng RSS Dolphins ni coach Anthony Reyes, ay naungusan ni Maria Felisha ng Bulacan Water Dragons sa 11-yrs old na Class A 100m freestyle.

Ang Grade 7 honor student ng Augustinian Abbey School sa Las Pinas ay naorasan nang 1:11.77 sa likod ng 1:08.79 clocking ni Celso. Ang kabiguan ang una ni Diamante mula nang bumalik ang COPA event noong Agosto.

Sinabi ni COPA Board member at SMP president na si Chito Rivera na kinumpirma na ni Rob Wright ng sikat na Hong Kong swimming family at pinuno ng HK Swim Club na magpadala ng isang dosenang swim club sa tournament ng COPA na pansamantalang itinakda sa Marso sa susunod na taon. “Nakausap ko si Rob Wright ng HK. Matagal na nating kaibigan ang pamilya nyan. Magpapadala daw siya ng team kahit isang dosena," saad ni Rivera.

Rondina-Gonzaga duo, pasok na sa semifinals ng Beach Pro Tour

ni MC - @Sports | December 11, 2022

Nalampasan nina Sisi Rondina at Jovelyn Gonzaga ang pressure nang magwagi sa sariling balwarte at ilaglag sa bisa ng 8-21, 21-12, 15-7 ang tambalan nina Ericka Habaguchi at Saki Maruyama ng Japan nang unang gapiin sa quarterfinals ang Canada at Czech Republic ng Volleyball World Beach Pro Tour Futures sa Subic Bay Sand Court nitong Biyernes.

“We just enjoyed the game,” saad ng 26-anyos na si Rondina, ang pinaka-tanyag na beach volleyballer ng bansa. “We did our job—like I focused more on defense and Jov [Gonzaga] on blocks.”

First time na nagtambal sina Rondina at Gonzaga sa isang major international competition at talunin pa ang matatangkad na sina Darby Dunn at Olivia Grace Furlan ng Canada, 21-19, 21-18 sa kanilang morning match sa main draw.

Nang magbalik matapos ang 2 oras sa tanghali giniba rin nila ang Czechs na sina Valerie Dvornikova at Anna Pospisilova, 21-14, 21-16 upang manatiling buhay ang kampanya ng bansa sa event na inorganisa ng Philippine National Volleyball Federation.

“We made adjustments and we approached our assignments one match at a time,” ayon sa dating University of Santo Tomas ace Rondina, ang back-to-back SEA Games bronze medalist kasama si Bernadeth Pons.

Nakaparehas ni Rondina si Gonzaga dahil nagpapagaling pa sa si Pons sa natamong shoulder injury pero naroon siya sa audience na nagtsi-cheer para sa limang Philippine teams sa event na suportado ng Philippine Sports Commission.

Pinasalamatan ni PNVF President Ramon “Tats” Suzara si Brazilian beach volleyball coach Joao Luciano Kioday, na gumabay, isang linggo pa lamang sa national team pero nakitaan na ng improvement.

“They are fighting for every ball,” ani Luciano. “I think the short time they have training under me is that they understand what I want. It’s just only the beginning so we focused on a well-organized system of receiving and setting in 10 days. We just did the basic things.”