Eala, isang panalo pa, sa medal round na

ni MC @Sports | September 27, 2023

Umalagwa si tennis princess Alex Eala sa isang marathon first set upang magapi ang beteranang si Rutuja Bhosale ng India, 7-6 (7-5), 6-2 para umabanse sa quarterfinals ng women’s singles event sa 19th Asian Games sa Olympic Sports Stadium sa Hangzhou, China kahapon.

Kinailangan lang ng 18-anyos na si Eala ng 72 minuto at tiebreaker upang manaig sa 27-anyos na katunggali sa isang makapigil-hiningang first set sa harap ng kakaunti pero maingay na crowd.

Sa 2nd set luminaw ang tsansa ni Eala para makalusot sa quarterfinals kontra Japanese Kyoka Okamura, na 6-2, 3-6, 6-4 winner laban kay Savanna Ly-Nguyen.

Sa talaan, hawak ni Eala ang kalamangan laban Japanese rival na No. 192 siya sa ranking habang si Okamura ay ranked 223rd. Bukod diyan, malaking bagay kay Eala ang apat na ITF titles laban sa Round-of-8 ng karibal.

Unang nahirapan si Eala sa serves na nagawang 5 doubles kontra sa three aces.

Sa second set, dalawang beses lang siyang na double-fault abang dinodomina ang bakbakan. Malakas na umabanse si Eala sa round-of-16 nang blangkahin si Sarah Ibrahim Khan ng Pakistan, 6-0, 6-0.

Nakaiskedyul si Eala na maglaro sa mixed doubles katambal si Ruben Gonzales habang isinusulat ito kahapon.

Samantala, matapos na mawala na sa kontensiyon ang Pinoy male gymnasts, inaasahan na lang ang dalawang natitirang female athletes sa 19th Asian Games.

“We only have two female gymnasts left and they are both in the finals,” ayon kay Gymnastics Association of the Philippines Deputy Secretary-General Rowena Bautista.

Sasalang si Kursten Rogue Lopez, 17-anyos sa individual all-around finals ngayong Miyerkules sa Huanglong Sports Centre Gymnasium ng 3 p.m. Habang si Charlie Manzalo, 17-anyos ay sa vault finals sa Huwebes.

Eala, nagwagi sa Pakistan, Chinese cyclist, mala-robot

ni MC / Clyde Mariano @Sports | September 26, 2023

Nanalasa ang husay ni Pinay tennis princess Alex Eala sa kauna-unahan niyang Asiad campaign nang dominahin ang 6-0, 6-0 victory kontra Sarah Ibrahim Khan ng Pakistan sa Round 2 ng 19th Asian Games women's singles kahapon sa Hangzhou, China.

Kinailangan lang ng 18-year-old Filipina netter ng 39 minuto para gapiin si Khan at umusad na sa 3rd round na haharapin si Rutuja Bhosale ng India na unang tinalo si Aruzhan Sagandykova ng Kazakhstan.

Samantala, nabigo si Joanie Delgaco na masungkit ang ginto sa women’s single scull sa rowing. Tumapos ang 25 -anyos na Pinay na pang-lima sa 5.93 seconds na napanalunan ni outstanding favorite Russian born Ana Prakaten para sa Uzbekistan kinuha ang ginto sa 7:39.05 seconds sa 2000 meters race sa Fuyang Water Sports Center.

Samantala, pinahirapan ng mala-umano'y robot na Chinese cyclist sina Shagne Paula Yaoyao at Ariana Evangelista sa MTB cross-country event sa Asian Games.

Tumapos na 8th place si Yaoyao at kinapos ng 2 laps si Evangelista sa women’s cross-country Olympic race ng cycling’s mountain bike kahapon. “They’re like robots,” reaksiyon ni Yaoyao sa katunggaling sina Li Hongfeng at Ma Caixia ng China na nagwagi ng gold at silver na parang hindi pinagpawisan at napagod.

Sa kabila nang nabigo si Delgaco na masungkit ang ginto, proud si rowing president Patrick Gregorio sa laro ng 25 years old Bicolana. “Despite her failure to win the gold, I’m really proud of her performance,” sabi ni Gregorio.

Pumangalawa si Chris Nievares sa 7:19.45 seconds sa likod ng nagwaging si Mohammed Riyadh Jasim Al-Khafaqi ng Iraq 7:16.72 sa Final B matapos ang event ni Delgaco.

Pipilitin nina Cray at Eala na maka-podium sa Asiad

ni MC / Clyde Mariano @Sports | September 25, 2023

Makaakyat na kaya si Eric Shawn Cray sa podium sa Asian Games na bigo niyang magawa sa Korea at Indonesia?

Pipilitin ng 34-anyos na si Cray manalo at maiwaksi sa kanyang isipan ang kabiguang nilasap sa Korea at Indonesia sa China na kasalukuyan nilalaro ang 19th edition ng quadrennial meet sa Hangzhou, Zhejiang province.

“This is my third Asian Games and probably my last. I will do my best and utilize my skills and experience to win,” sabi ni Cray sa panayam sa kanya sa Cambodia matapos manalo ng 7 sunod sa 400m hurdles na una niyang napanalunan noong 2013 edition sa Myanmar.

Nanalo si Cray ng anim na sunod-sunod na ginto sa SEA Games at lumaro sa World Athletics sa Budapest, Hungary.

Gagamitin ni Cray ang panalo sa SEA Games at karanasan sa World Athletics bilang “jumping board” sa kanyang ambisyon na kunin ang ginto sa 400m hurdles.

Tumapos si Cray na pang-pito (50.27 seconds) sa siyam na runners sa 400m hurdles na napanalunan Kyron McMaster sa oras 48.47 seconds sa World Athletics sa Hungary.

Sumalang si Tennis princess Alex Eala sa opening round bye sa women’s singles event matapos ang draw noong Sabado ilang oras bago ang 19th Asian Games na opisyal na nagbukas sa Hangzhou.

Bilang seeded No. 4 – salamat sa kanyang husay na ipinamalas sa mga top-tier events at ngayong Lunes sisimulan ni Eala ang medal bid bago pumartner kay Ruben Gonzales sa mixed doubles event sa Martes.

Sisikapin nina Gonzales at ka-doubles partner na si Francis Alcantara na maging maganda ang kanilang simula laban sa Thais, kagabi. Ang pangalan ng kanilang Thai rivals ay hindi pa naianunsiyo habang isinusulat ito, pero tiyak nang sasalang sina Gonzales at Alcantara bilang mga tour veterans.

Si Eala na kinokonsiderang isa sa rising stars ng Asya ay nakapagwagi na ng ikaapat na ITF title sa Great Britain noong Agosto.