Yulo qualified na sa Olympics, Paalam babanat sa q'finals

ni MC / VA / GA @Sports | October 03, 2023

Matapos ang kanyang nakapanlulumong performance sa vault na naging sanhi ng kabiguan niya sa individual all-around, nakabawi ang Filipino gymnast na si Carlos Edriel Yulo sa kanyang paboritong event na floor exercise at nakamit ang target na 2024 Paris Olympics berth noong Linggo ng gabi (Manila time) sa 2023 Artistic Gymnastics World Championships sa Antwerp, Belgium.

Tumapos si Yulo na highest ranked gymnast sa floor exercise mula sa inabot nitong disaster sa unang araw ng qualifying.

Pumangatlo si Yulo sa men's floor exercise sa naitala nitong 14.600 points kasunod ng mga nangunang sina Artem Dolgopyat ng Israel (15.100) at Frederick Richard ng US (14.600).

Ngunit dahil qualified na sa Paris Games sina Dolgopyat at Richard hindi pa man naidaraos ang World Championships ay umangat si Yulo.

Dahil dito, nakabawi na rin si Yulo sa kanyang 'di malilimutang pagtatapos sa vault na nagresulta ng kanyang pagka-zero sa vault.

Si Yulo ang ikalawang Filipino athlete kasunod ni EJ Obiena na nakasisiguro na ng slot sa Paris Olympics.

Samantala, inspirado ngayon si Carlo Paalam kontra astiging kasagupa na si regining world champion Carlo Khalokov Abdumalik ng Uzbekistan ngayong Martes sa quarterfinal round. Aakyat si Paalam sa ring kontra 23-ayos na Uzbek ng 7:30 p.m. sa Hangzhou gymnasium. Kailangang dispatsahin ng Tokyo silver medal winner si Uulu Munarbek Siitbek ng Kyrgystan sa Round-of-16 sa iskor na 4-1 upang maabot ang q'finals. Si Seiitbek, 27, ay bronze medalist sa nakaraang World C'ship sa Tashkent, Uzbekistan.

Si Paalam ay sasabak na sa gold medalist para makasama si Marcial sa semis. “Halos lahat sila sa division namin magaling,” pag-amin ng 25-anyos na Pinoy hinggil sa stacked roster sa men's 58 kg class na unang beses siyang lalaban.

Gilas Women, 2-0 win na vs. Hong Kong sa ASIAD

ni MC @Sports | September 30, 2023

Nagpatuloy sa pananalasa ang Gilas Women sa 19th Asian Games sa Hangzhou, China nang manaig sa Hong Kong kahapon.

Muling nagpakitang-Gilas ang women's basketball team nang tambakan ang Hong Kong 99-63 sa larong idinaraos sa Shaoxing Olympic Sports Centre upang manatiling undefeated sa preliminary stage.

Pinag-ibayo ng Gilas Women ang hawak na card, 2-0 sa Group B, habang lalong umiinit ang kampanyang makapasok sa quarterfinals ng quadrennial meet.

Muling naging forefront ng team si Janine Pontejos at palakasin ang opensa sa 23 points kasabay ng pitong tres habang si national team veteran Afril Bernardino ay naging solido rin ang performance sa 20 puntos.

Lumalagablab din ang mga kamay ni Ana Castillo sa laban, pumukol ng 17 puntos kabilang na ang limang tres.

Pumasok ang Gilas women sa second half na may kalamangan na 9-0 salvor na pinatingkad pa ng laro ni Bernardino at bumanat ng jumper para itarak sa 51-34 na kalamangan ang iskor lalo na ang 7 minuto na lamang ang nalalabi sa ikatlong quarter.

Isang free throw ni Monique del Carmen sa kalagitnaan ng quarter ang nagpaangat sa 20 puntos, 56-36.

Lalo pang inilayo ni Camille Nolasco ang iskor sa bisa ng kanyang 3 puntos, 65-43 at hindi na sila lumingon pa at itinuloy-tuloy na ang ganda at kondisyon ng laro.

Dito na umarangkada nang husto ang Gilas women's nang palobohin pa sa 30 puntos ang kalamangan nang sundan ni Stefanie Berberabe ng ilang charity basket, 84-54 sa natitirang 4:48 minuto ng aksiyon. Huling birada ni Castillo ay nang magsalpak siya ng tres sa final minute ng laban, 97-61. Tatapusin ng Gilas women ang preliminary campaign sa maganda ring bakbakan kontra Japan sa Oktubre 1.

Gilas Pilipinas sa 2nd win vs. Thais, 3x3 target ang q'finals

ni MC / VA @Sports | September 29, 2023

Ikalawang panalo ang naitala ng Gilas Pilipinas matapos na pahirapan sila sa fourth quarter ng Thailand sa 87-72 victory sa ikalawa nilang laro sa 19th Asian Games kahapon sa Hangzhou, China.

Big buckets ang kinakamada nina Ange Kouame at Justin Brownlee para ganahan nang husto ang Gilas kaya umibayo ang kanilang laro 2-0 sa Group C sa Zhejiang Gymnasium.

Nakatipon si Brownlee ng 22 points at 15 rebounds, bagamat pumukol lang ng 8-of-27 sa field habang natitighaw sa pagod ang buong Philippine team. Nakagawa si CJ Perez ng 16 points, kahit mintis sa ilang point-blank shots.

Tumiyak na ang Pilipinas ng kuwalipikasyon sa next phase ng tournament.

Makasisiguro pa rin siya ng direct qualification sa q'finals kung magwawagi sa final Group C game laban sa Jordan.

Nagpakabog pa ang Thailand sa tikas ni Chanatip Jakrawan para sa 79-70 sa nalalabing 3:13 minuto, pero pinatibay ng Gilas ang depensa. Kinapos ang 29 puntos ni Lamb at 22 ni Lee para sa Thailand, tanging double-digits sa team.

Samantala, mawalis ang group stage at magkamit ng outright q'finals berth ang target ng Phl men 3x3 squad.

Tinalo ng Gilas sa pangunguna nina John Ray Pasaol at Bismarck Lina, 21-15 ang Hong Kong para sa ikatlong sunod napanalo sa Group A.

Kinakailangan na lamang nilang gapiin ang Mongolia sa huling laban nila ngayong Biyernes -Setyembre 29 para makumpleto ang sweep at makopo ang isa sa outright berth sa knockout stage.

“Yun ang gusto namin, win as many games,” pahayag ni national coach Lester Del Rosario. “Prepared kami. Lalaban lang ulit. Huwag lang makampante, may chance kami.”

Pumapangalawa sa Team Philippines sa Group A ang Chinese Taipei (2-1), kasunod ang Mongolia (1-1), Jordan (0-2) at Hong Kong (0-2).

Ang tatapos na top team sa bawat grupo ay awtomatiko sa q'final habang ang susunod na dalawa ay lalaro sa qualification round para sa apat pang q'finalists.