Engineer na hirap makahanap ng trabaho, dapat baguhin ang pirma para suwertehin na at magka-love lif
- Maestro Honorio Ong
- Mar 9, 2020
Dear Maestro, Engineering graduate ako, pero wala pa rin akong permanenteng trabaho na angkop sa course ko. Kailan kaya ako magkakatrabaho na talagang gusto ko at angkop sa kurso ko na may malaking suweldo? Gusto ko ring malaman kung sinu-sino ang mga babaeng ka-compatible ko dahil wala pa rin akong girlfriend. Kailan ako magkaka-girlfriend at makapag-aasawa? July 16, 1993 ang birthday ko.
Umaasa, Edwin ng Pamplona Uno, Las Piñas City
Dear Edwin,
Ayon sa birth date mong 16 o 7 (ang 16 ay 1+6=7) sa destiny number mong 9 (7+16+1993=2016/ 20+16=36/ 3+6=9) at sa zodiac sign mong Cancer, masyado kang maraming iniisip at pinapangarap, pero kulang ka naman sa kongkretong pagkilos o aksiyon at pagpapatupad ng iyong mga pangarap at plano. Ito ang tunay na dahilan kung bakit sa edad mong 26 ay tila wala pa ring nangyayari sa buhay mo at parang wala ka pa ring direksiyon.
Minsan, naipatutupad mo ang iyong mga ideya at balak, pero dahil kulang ka sa konsentrasyon, madali kang pinanghihinaan ng loob.
Kumbaga, hindi tuluy-tuloy ang iyong ginagawa, sa halip, nag-iiba-iba ka ng gusto at inaatupag sa buhay. Madalas, may pinagkakaabalahan ka, pero hindi mo pa nakakamit ang dulo o katuparan ng iyong ginagawa ay tumitigil ka na agad.
Ang mga inilahad na sitwasyon sa itaas ay ilan lamang sa mga dahilan kung bakit lalong tumatagal na mapitas mo ang masarap na lasa ng bunga ng tagumpay.
Upang malubos ang iyong tagumpay at pag-unlad, kailangang mag-concentrate ka sa iisang bagay at ito ay ang tungkol sa iyong kursong tinapos. Kaya kung hindi ka pa nakapapasa sa Board exam, upang maging lisensiyadong inhinyero, tulad ng nasabi na, ang destiny number mong 9 ang nagrerekomendang kung ano ang kursong natapos mo, mag-concentrate ka roon sapagkat doon ka mag-e-excel, sisikat at aasenso.
Dagdag pa rito, upang mas madaling matupad ang mga pag-aanalisang inilahad, bukod sa concentration sa iisang gawain lamang, kailangang palagi kang magsuot ng mapalad mong kulay na berde at dilaw.
Sa nasabing mga kulay, madali mo nang mapipitas ang suwerte at magandang kapalaran, hindi lamang sa career at pag-ibig kundi sa lahat ng aspeto ng iyong buhay.
Pangalawa, napansin mo ba ang iyong lagda na medyo baboy o burara? Baguhin mo ‘yan, kailangang hindi ibinabalik sa direksiyong pakaliwa ang dulong bahagi ng letrang “a”. Sa halip, tapusin ang letrang “a” sa mismong pinakapaa nito sa straight line.
Sa ganyang paraan, mula ngayon, mas madali at kusa mo nang makakamit ang malaking tagumpay at katuparan ng mga pangarap mo sa buhay.
Pangatlo, sa pag-ibig at pakikipagrelasyon, ka-compatible naman ng zodiac sign mong Cancer ang mga babaeng isinilang sa mga zodiac sign na Pisces, Scorpio, Virgo, Capricorn at kapwa mo Cancer, higit lalo silang may mga birth date na 2, 11, 20, 29, 7, 16, 25, 9, 18, 27, 3, 12, 21, 30, 6, 15 at 24.
Habang, ayon sa iyong Love Calendar, Edwin, tiyak ang magaganap ngayong taon, sa edad mong 26 pataas, kapag sinunod mo ang mga rekomendasyong inilahad na sa itaas, mapapansin mo na tuluy-tuloy nang gaganda at aangat ang iyong career at kasabay nito, isang babaeng isinilang sa buwan ng Oktubre o Nobyembre ang magiging karelasyon mo hanggang sa tuluyan mo na ring mapangasawa at makasama sa pagbuo ng maligaya at panghabambuhay na pamilya..
