Aplikasyon sa accreditation ng MTPP, start sa Aug. 5 — LTFRB

ni Mervin Reyes @News | July 31, 2026

Photo: File Motorcycle / MMDA

Inanunsyo ng Land Transportation Franchising and Regulatory Board (LTFRB) na sisimulan sa Agosto 5 ang accreditation ng mga Motorcycle Taxi Platform Providers (MTPPs), kasabay ng muling pagtanggap ng aplikasyon para sa Provisional Authority to Operate ng mga motorcycle taxi rider.

Nakabatay ang accreditation ng mga platform provider at pag-apruba ng provisional authority sa rider cap na itinakda ng Motorcycle Taxi Technical Working Group para sa bawat MTPP.

Nilinaw din ng ahensya na hindi muna tatanggap ng mga bagong motorcycle taxi platform provider dahil limitado ang mga available na slot at nakalaan lamang ito sa mga kumpanyang dati nang pinayagang lumahok ng Technical Working Group.

Ayon kay LTFRB Chairperson Vigor Mendoza, layunin ng hakbang na matiyak ang maayos at sistematikong operasyon ng motorcycle taxi bilang bahagi ng pampublikong transportasyon.

Dagdag-ayuda sa PUV, pinag-aaralan na — LTFRB

ni Jeff Tumbado @News | July 26, 2026

Photo: File

Pinag-aaralan na ng Land Transportation Franchising and Regulatory Board (LTFRB) ang pagpapalawak at pagdaragdag ng fuel discount para sa mga pampublikong sasakyan (PUV) bilang tugon sa sunud-sunod na pagtaas ng presyo ng produktong petrolyo.

Inatasan ni Transportation Sec. Giovanni Lopez ang ahensya na talakayin ang naturang panukala, bukod pa sa patuloy na pagrepaso sa mga petisyon para sa dagdag-pasahe.

Ani LTFRB Chair Vigor Mendoza II, ang pagpapalawak at pagtaas ng fuel discount ang isa sa praktikal na hakbang habang nananatiling hindi tiyak ang sitwasyon sa Middle East.

Gayunman, inamin ni Mendoza na mangangailangan ng malaking pondo ang pagpapalawak at pagdaragdag ng fuel subsidy. Dagdag pa niya, tinitingnan lamang ang panukala bilang huling opsyon habang nagpapatuloy ang mga konsultasyon sa mga stakeholder sa iba't ibang panig ng bansa.

Fixed pick-up fare sa TNVS, ibinalik ng LTFRB

ni Jeff Tumbado @News | July 20, 2026

Photo: File

Inanunsyo ng Land Transportation Franchising and Regulatory Board (LTFRB) nitong Linggo ang muling pagpapatupad ng fixed pick-up fare para sa Transport Network Vehicle Services (TNVS) upang matugunan ang hinaing ng mga driver kaugnay ng tumataas na gastusin sa operasyon.

Sa ilalim ng LTFRB Memorandum Circular No. 2025-058, layunin ng polisiya na balansehin ang pangangailangan ng mga TNVS driver at ang mga reklamo ng mga pasahero hinggil sa hindi awtorisado at hindi reguladong paniningil ng pick-up charges.

Ayon kay LTFRB Chairman Vigor Mendoza II, mahalagang mapangalagaan ang kapakanan ng mga commuter, ngunit bahagi rin ng mandato ng ahensya ang pakinggan ang mga suliranin ng sektor ng pampublikong transportasyon.

Sa ilalim ng memorandum, ito ang mga itinakdang fixed pick-up fare:

Hatchback/Subcompact

P24 – hanggang 1 kilometro

P48 – hanggang 2 kilometro

P72 – hanggang 3 kilometro

P96 – hanggang 4 kilometro

P120 – hanggang 5 kilometro

Sedan

P26 – hanggang 1 kilometro

P52 – hanggang 2 kilometro

P78 – hanggang 3 kilometro

P104 – hanggang 4 kilometro

P130 – hanggang 5 kilometro

AUV/SUV

P29 – hanggang 1 kilometro

P58 – hanggang 2 kilometro

P87 – hanggang 3 kilometro

P116 – hanggang 4 kilometro

P145 – hanggang 5 kilometro

Premium

P58 – hanggang 1 kilometro

P116 – hanggang 2 kilometro

P173 – hanggang 3 kilometro

P231 – hanggang 4 kilometro

P289 – hanggang 5 kilometro

Mahigpit ding ipinagbabawal ang paniningil ng pick-up fare lampas sa limang kilometrong radius. Inatasan din ang mga Transportation Network Companies (TNCs) na limitahan sa limang kilometro ang matching radius upang mabawasan ang oras ng paghihintay ng mga pasahero at mapababa ang gastusin ng mga driver sa operasyon.

Binigyang-diin din ng LTFRB na hindi maaaring kaltasan ng anumang komisyon, bahagi, o service fee ng mga TNC ang pick-up fare dahil ito ay nakalaan para sa mga TNVS driver at dapat nilang matanggap nang buo.