659 aftershocks, naitala sa 7.4 lindol sa Surigao del Sur

ni Eli San Miguel - Trainee @News | December 3, 2023

Patuloy ang Philippine Institute of Volcanology and Seismology (Phivolcs) sa pagtukoy ng mga aftershocks matapos ang lindol na may lakas na 7.4 na yumanig sa Hinatuan, Surigao del Sur, noong Sabado ng gabi, Disyembre 2.

Naitala ng Phivolcs ang 659 na aftershocks, at 122 dito ang natukoy ng tatlong o higit pang istasyon, hanggang kaninang 10 ng umaga ngayong Linggo.

Pito sa mga ito ang naramdaman, at may magnitude 6.2 ang pinakamalakas.

Binalaan ni Phivolcs Director Teresito Bacolcol ang publiko na maaaring magpatuloy ang aftershocks dahil sa 7.4-magnitude na lindol sa mga susunod na "ilang araw hanggang ilang linggo," ngunit sa paglipas ng panahon, mababawasan din ang kanilang bilang at lakas.

Dagdag pa niya na maaaring hindi na magdulot ng tsunami ang mga aftershocks dahil may mas mababang lakas na ang mga ito.

DA, namigay ng ayuda sa mga magsasaka at mangingisda

ni Eli San Miguel - Trainee @News | November 28, 2023

Nagbigay ng ayuda ang Department of Agriculture (DA) para sa mga magsasaka at mangingisda sa south-central Mindanao na naapektuhan ng lindol noong ika-17 ng Nobyembre.

Pinangunahan ni Agriculture Secretary Francisco Tiu Laurel Jr. ang pamamahagi ng tulong ng ahensiya.

"I came here to personally see the situation after the earthquake,” saad ni Laurel.

“I want to see first-hand what happened here and how we can help our farmers and fishermen in Region XII, in Gensan and neighboring provinces,” dagdag niya.

Ayon sa DA, nakipagtagpo si Laurel sa mga irrigator groups sa Koronadal City upang pangunahan ang pamamahagi ng National Irrigation Administration ng mga kagamitan at tseke na nagkakahalaga ng P26.3 milyon para sa indemnity at mga loan sa South Cotabato.

Sa General Santos City, ipinamahagi naman ng DA chief ang mga vegetable seeds, coconut and banana planting materials, fertilizers, at indemnity claims na nagkakahalaga ng P4.7 milyon.

Bukod dito, tatlong grupo mula sa DA ang ipinadala upang makatulong sa patuloy na pagsusuri sa iba't ibang lugar sa Rehiyon XII na naapektuhan ng lindol.

Lindol sa Mindanao, nagdulot ng 120 aftershocks

ni Eli San Miguel - Trainee @News | November 23, 2023

Nagdulot ng hindi bababa sa 120 na aftershocks hanggang Huwebes ang malakas na lindol sa Mindanao noong nakaraang linggo, ayon sa Philippine Institute of Volcanology and Seismology (Phivolcs).

Anim lamang sa mga aftershock ang naramdaman at naitala ang pinakamalakas sa 4.9 magnitude, ayon kay Phivolcs director Teresito Bacolcol.

"It would probably take several days to several weeks bago siya mag-dissipate. Pero habang tumatagal naman, kumakaunti yung number and humihina po yung magnitude [ng aftershocks]," paliwanag ni Bacolcol sa TeleRadyo Serbisyo.

Nagdulot naman ang lindol noong nakaraang Biyernes ng hindi bababa sa siyam na bilang ng mga patay at 17 na iba pa ang sugatan, ayon sa national disaster agency.