Kaya naman pala ini-endorse ng DOH, besh... Akapulko, pampurga at panlaban sa cancer cells, gamot pa

Halamang Gamot atbp. ni: Govinda Jeremaya

Ang akapulko.

Huwag kang magugulat dahil ng akapulko ay isa sa halamang gamot na ini-endorso ng Department of Health - Philippine Institute of Traditional and Alternative Health Care

(DOH-PITAHC) matapos itong ma-validate scientifically to ensure safety and efficacy, kaya kinikilala sa larangan ng medisina ang galing at husay ng akapulko.

Narito ang kanyang mga kakayahan:

• Gamot sa sakit sa balat tulad ng tinea infections, insect bites, ringworms, eczema, scabies and itchiness

• Panlunas sa mga sintomas ng asthma

• Gamit na diuretic

• Pampurga sa mga bulate na namamahay sa tiyan

• Gamot sa ubo

• Gamot sa mataas na lagnat

• Panlinis ng bunganga dahil napapatay ang mga mikrobyo rito hanggang sa lalamunan

Ito ay sa dahilang ang akapulko ay nagtataglay ng mga sumusunod:

• Chrysophanic acid, fungicide na ginagamit bilang panggamot sa fungal infections tulad ng ringworms, scabies at eczema.

• Mayroon ding saponin, laxative na nakatutulong para matanggal ang intestinal parasites.

Dahil powerful medicinal herb ang akapulko, ito rin ay ginagawang lotion, sabon at shampoo.

Ang akapulko rin ay mabisang panlinis sa reproductive system ng babae at inirerekomenda ito para labanan ang cancer cells sa reproductive system ng kababaihan.

Bagama’t malaki ang naitutulong sa reproductive system, ang mga babae ay pinag-iingat dahil ang katas ng dahon ng akapulko ay powerful abortifacient kaya hindi ito inirerekomenda sa mga buntis.

Para magamit, ang dahon ay puwedeng katasin. Ilalagay sa supot na tela saka pupukpukin at ang dahon na pinukpok ay ilalagay sa apektadong balat.

Ang mismong katas na nakuha sa dahon ay puwede ring ipahid sa apektadong bahagi ng balat.

Ang pinakuluang dahon, sanga, bulaklak o ugat ng akapulko ay iniinom para sa may ubo o bronchitis.

Ipinapahid din ang katas ng akapulko sa mga nakakalbong buhok.

Ang akapulko ay may pangalan ding “Emperor’s candlesticks” at kaya ikinapit sa kanya ang pangalan na emperor ay dahil ito ang lihim na pinanggagamot ng mga emperor sa kanilang sakit sa balat.

Good luck!

Katangian ng lider na dapat mamuno

Hindi lang tuwing bago mag-eleksiyon nasusuri ang katangian o ugali ng isang mahusay na lider ng bawat local government hanggang sa pinaka-Pangulo ng bansa. Guys, ngayong panahon ng krisis at pandemya, sinu-sino na sa tingin ninyo ang may malakas na kakayahan bilang lider, nakagawa ba sila ng pinakadakilang bagay? Nakatulong ba sila nang husto sa kanilang kapwa? May kakaiba ba kayong nakitang katangian niya kaya nasabi mong napakahusay niyang mamahala?

At dahil iyong hinahangaan, napakaganda nilang tularan. Naging sapat ba ang kanilang kakayahan, loob at isipan para maibigay ang siyento-porsiyento ng kanilang paglilingkod sa bayan?

Makikilatis mo kung nakagawa sila ng espesipikong mga plano para makatulong sa kapwa. Dapat makita rin sa kanila ang integridad, husay sa pakikipag-ugnayan sa tao, husay sa pagdedesisyon sa teamwork, maunawain, nakikibagay at nagagawang linangin ang husay sa pakikipag-usap.

1. SINASALIKSIK NIYA ANG MGA IMPORMASYON. Ito ang kailangan upang maging tagapanguna para sa isang mainam na pagpupulong. Tinitiyak niyang lagi siyang handa at agad natutupad ang mga gawaing nakaatang sa kanyang responsibilidad. Lahat ng lider ay dapat nakasunod sa mga alituntunin ng pagiging handa, anuman ang mangyari sa lugar o nasasakupan. Sinusuyod ang lahat ng mga taong nangangailangan sa kanilang lugar at wala siyang lalampasan.

2. NANINIWALA SA KANYANG NASASAKUPAN. Bukod sa pagiging tapat, may integridad at mahusay makisalamuha, dapat bukas ang isipan sa mga taong pipintas sa kanya. Silang mga nasasakupan ang pumili sa 'yo bilang lider, sila rin ang magsasabi sa 'yo ng kung ano ang makabubuti para sa inyong lugar.

3. HABANG KINAKAUSAP AY MAPAGKAKATIWALAAN. Lahat ng lider ay pinagkakatiwalaan mula sa personal at pribadong impormasyon, sila lang dapat ang nakaaalam at confidential. Higit na may tiwala ang kanilang empleyado sa kanilang lider na alam nilang magbibigay ng proteksiyon sa anumang sensitibong impormasyon na hawak niya. Nakikipag-usap nang pantay-pantay sa tao, maging ito man ay basurero hanggang sa CEO ng kumpanya.

4. MAY KAKAYAHANG MAKAPAGBIGAY NG MALINAW NA PALIWANAG. Ang abilidad na maibigay nang malinaw ang punto-de-bista ay ang pundasyon ng pagiging lider. Kapag nakuha mo ang tiwala ng iyong nasasakupan, mas madali mo silang mapasusunod. Kailangang naipiprisinta niya ang mga ideya sa mas katanggap-tanggap at malinaw na paraan.

5. MALAWAK ANG ISIP SA PAGTANGGAP NG MGA PAGBABAGO. Kung minsan, ang pagyakap sa pagbabago ay mahirap sa tao. Pero ang isang tunay na lider ay kayang mangumbinsi ng iba na yakapin ang pagbabago nang hindi naghihimutok o tumatanggi. Tulad ngayong ‘new normal’, lahat ng health protocols ay dapat nang pairalin ayon na rin sa sariling pamamaraan upang mailigtas lang sa pagkakahawaan ang kanyang nasasakupan.

Alamin: Rason kung bakit okay lang na i-give up ang mga pangarap

Habang nakulong tayo sa bahay dahil sa lockdown, marami sa atin ang nag-reflect o pinag-isipan kung dapat pang ipagpatuloy ang nasimulang laban para sa mga pangarap.

Nar’yan ang mga tanong na “Worth it pa ba?” “Kaya ko pa ba?” Marahil, may ilan sa ating nawalan ng motibasyon sa buhay o dumaranas ng mid-life crisis kaya naaapektuhan ang mga bagay na ito.

Nakakatakot mang sagutin ang mga tanong na ito, mga besh, narito ang ilang dahilan kung bakit okay lang na i-give up ang mga pangarap:

1. MAGING MATAPANG. Kung “feeling stuck” ka pagdating sa pag-abot ng iyong mga pangarap, ang unang hakbang para maunawaan ito ang pinaka-nakakatakot dahil hindi madali na gawin ang mga bagay sa ibang paraan. Pero kung gusto mong magkaroon ng buhay na iba sa nakikita mo, kailangan mong hayaan ang iyong sarili na gawin ang mga bagay-bagay sa ibang paraan. ‘Wag mong sayangin ang pagkakataon at ilabas mo ang tapang mo. Gayunman, kung hindi ka komportable at alam mong nararamdaman mo ‘yun dahil hindi ka tapat sa sarili mo, kailangan mong maging matapang para sa iyong “future version” kahit nakakatakot ito.

2. JOURNEY MO ‘YAN. Huwag mong ikumpara ang iyong sarili sa mga nauna sa iyo. Gayundin, ‘wag mong isipin imposible ang mga gusto mo dahil walang tiwala ang ibang tao rito. ‘Wag na ‘wag mong sabihin na failure ka dahil iba ang kinatatayuan mo ngayon kumpara sa iyong mga kaibigan o idolo. Tandaan mo, hindi ‘yan mahalaga dahil ang ginagawa mo ngayon ay para sa ikasasaya mo at hindi para sa ibang tao.

3. ‘WAG MAGMADALI. Nasa henerasyon tayo na niro-romanticize ang hustle o pagmamadali pagdating sa career at success, pero kung tutuusin, wala namang point ang pagmamadali dahil kung hindi mo mae-enjoy ang process, hindi ito magiging fulfilling. Mga bes, oks lang mag-slow down. Take your time dahil hindi mo kailangang madaliin ang pagkilala sa iyong sarili. Hindi pa huli ang lahat para magsimula ulit at magbago ng isip, gayundin, okay lang na i-give up ang mga bagay na hindi mo talaga gusto.

4. ‘WAG TANGGAPIN ANG REJECTION. Kung may nagsaradong pintuan para sa ‘yo, ‘di ibig sabihin nu’n na susuko ka na. Ipagpatuloy mo ang pag-pursue, pagkatuto at pagkilala sa iyong sarili sa industriya o mga bagay na nagi-inspire sa iyo. ‘Ika nga, if you cannot convince someone to open a door for you, open your own doors.

5. KAILANGAN KA NG MUNDO. Mga bes, laban lang nang laban para sa pangarap kahit umabot sa punto na kailangan itong palitan dahil kailangan ng mundo ang iyong pagiging unique, talent at ang iyong isipan. May kakayahan kang gumawa ng magagandang bagay habang nabubuhay ka. ‘Wag mong hayaan na pigilan ka ng self-doubt, roadblocks para ipakita sa mundo ang kakayahan mo.

Mahaba-habang pag-iisip at pagdedesisyon ang kailangan bago natin sabihing suko na talaga tayo. Hindi madaling isuko ang pangarap, lalo na kung malayo na ang iyong nararating, pero para sa mga beshies natin d’yan na struggling at feeling stuck, make sure na isasabuhay ninyo ang mga bagay na ito. Copy?