‘Di na kailangang umasa sa gamot... Mga pagkaing panlaban sa migraine, alamin

Malaking pahirap ang migraine sa marami sa atin, partikular sa mga empleyado na sagad ang oras sa pagtatrabaho, tambak ang mga gawain at dapat asikasuhin.

Ang migraine ay tulad ng mga “unwanted guest” na walang pasabi kung kailan darating at hindi mo rin alam kung kailan mawawala.

Marami ang umaasa sa mga pills o gamot para mawala ang sobrang sakit at hirap ng sitwasyon na dulot nito, pero tulad ng halos lahat ng panggamot, ang epekto ng mga ito ay panandalian lamang at kalauna’y babalik na naman.

Kaya naman, upang maiwasan ang mga pansamantalang remedyo, may mahalagang bagay na dapat tayong gawin — baguhin ang diet o pagkain.

Kung may mga pagkaing nakati-trigger ng migraine, ang ilan naman ay nakatutulong na labanan ito, tulad ng mga sumusunod:

1. AVOCADO. Bukod sa epektib na pampaganda ng kutis at pampabawas ng timbang, ang avocado rin ay nakatutulong upang labanan ang migraine. Ang prutas na ito ay mayaman sa antioxidants tulad lutein at zeaxanthin mga sangkap na mabisang pantanggal ng migraines.

2. Yogurt. Ayon sa pag-aaral, ang riboflavin na isang uri ng Vitamin B, ang isa sa mga pinakaepektibong panlaban sa migraine at ang yogurt ay nagtataglay ng bitaminang ito. Ang araw-araw na pagkonsumo ng yogurt ay nakapagpapababa ng tsansa ng pag-atake ng migraine.

3. Sweet potatoes. Ang madalas na pagkonsumo ng sweet potatoes ay hindi lang pantanggal ng simpleng sakit ng ulo at iba pang pananakit ng katawan, nakatutulong din itong labanan ang migraine sapagkat sagana ito sa iba’t ibang bitamina tulad ng Vitamins C at B1, at potassium na mabisang pampakalma.

4. Water-based na mga prutas at gulay. Dahil nakatutulong ang pag-inom ng tubig sa pagkakataong umaatake ang migraine, ang pagkonsumo ng mga water-based food tulad ng pakwan, carrots, pipino at celery ay maaari rin nating gawin. Ang dehydration ay isa sa mga nangungunang sanhi ng sakit ng ulo, kaya siguraduhing madalas ang pagkonsumo sa mga ito.

5. Lemon juice. Maraming health benefits ang lemon at isa sa mga ito ay ang panlaban sa migraine sapagkat mayaman ito sa Vitamin C. Kapag madalas nakararanas ng pananakit ng ulo, simple man o matinding pananakit nito, makabubuti kung aaraw-arawin ang pag-inom ng lemon juice.

Kung sa tingin mo ay hiyang o epektibo sa ‘yo ang nakasanayan mong tablet o capsula, wala namang masama kung susubok pa rin tayo ng mga natural remedy. Bukod sa hindi hamak na mas mura ang mga ito dahil “hindi maintenance”, sigurado tayong safe ito sa anumang side-effect tulad ng mga gamot na nabibili sa botika.

Sa panahon ngayon, bawal magkasakit kaya pangalagaan natin ang ating kalusugan. Huwag hintayin na umatake ang sakit lalo na kung kaya o may ideya naman tayo kung paano ito maiiwasan. Gets mo?

Kamias, epektib na gamot sa rayuma at panunaw ng bato sa kidney

Halamang Gamot atbp. ni: Govinda Jeremaya

Ang kamias.

Maraming klase ng bunga ng halaman at halos lahat ay iba ang lasa kapag mura pa at hinog na, kumbaga, magkaiba ang lasa ng mga prutas sa bawat panahon ng pagiging bunga nila.

Mayroong mapakla kapag mura pa at tatamis kapag hinog na. Mayroon namang mapait kapag bata pa at mawawala ang pait kapag hinog na. Mayroon ding walang lasa sa una pero sa huli ay ubod ng tamis. Mayroong maasim pero kapag hinog ay matamis na. Pero ang kamias ay kakaiba dahil ito ay maasim mula una hanggang sa mahinog.

Bakit kaya?

Ito ay dahil ang kamias ay mayaman sa Vitamin C. Natikman mo na ba ang Vitamin C? Puwede mong tikman ang Vitamin C sa pamamagitan ng tableta na nabibili.

Ito rin ang dahilan kung bakit ang kamias ay sumikat na pampaasim sa mga ulam at kakaiba ang asim ng ulam na nilagyan ng kamias dahil kapag ininom nang regular ang sabaw, ang sipon o sakit sa respiratory system ay mabilis na gumagaling.

Kapag kinain ang kamias at hinayaan muna sa bibig nang ilang minuto, ito ay nagreresulta sa paglinis ng bunganga. Narito ang ilang sakit na kayang lunasan ng kamias:

• Pamamaga ng balat, kasukasuan, talampakan o paa at maging sa mga kamay o mga daliri kung saan ipapahid lang ang katas ng kamias sa apektadong bahagi ng katawan

• Gamot din sa rayuma ang katas ng bunga ng kamias. Kumuha ng kapirasong malinis na tela na may katas ng kamias, balutin at ilalagay sa bahaging may rayuma

• Kapag madalas na ininom ang pinakuluang dahon, may kakayahan itong tunawin ang bato sa kidney

• Kaya rin ng kamias na pababain ang mataas na blood pressure

• Pinagaganda rin ng pag-inom ng pinakuluang kamias ang puso kaya ito ay good for the heart

• Kayang-kaya ng kamias na tulungan ang panunaw na nasa tiyan para madaling maging likido ang mga mahirap natunawin

• Ang pag-inom ng tubig mula sa pinakuluang bunga ng kamias ay mabisang pampapayat

• Ang tubig na pinagbabaran ng bulaklak ng kamias ay napakahusay na tonic dahil mabilis na gumagaling ang sipon at sinusitis

• Ang pinagbabaran ng dahon ng kamias ay mabisang gamot sa venereal diseases. Nakagugulat ang medicinal benefits ng kamias. Very powerful ito, mura man o hinog na dahil naroon pa rin ang kanyang husay sa pagpapagaling ng mga karamdaman.

Letra-por-letra na masasabing very powerful ang kamias at ito ay madaling mapatunayan. Simple lang, ang bunga ng kamias ay ipahid sa kutsilyo na may kalawang, marumi at nanigingtim na, magugulat ka dahil ang kutsilyo na nilinis gamit ang kamias ay shining bright.

Good luck!

Tips para makapag-adjust sa inuupahan na mas malapit sa trabaho

No Problem

Libu-libo ang nahirapan sa pagbibiyahe papunta sa kani-kanilang trabaho rito sa Kalakhang Maynila nang buksan ang general community quarantine o GCQ dahil lahat ng posibleng masakyan ay may social distancing tulad ng MRT, LRT at PNR train, gayundin ang bus.

Marami naman ang nagplano na gumising nang maaga at madaling-araw pa lamang ay bumiyahe na noong Lunes upang magkaroon ng pag-asa na makasakay kahit paano, pero marami pa rin ang nabigo at nauwi sa paglalakad at pakikisakay sa ibang napakiusapan na pribadong sasakyan.

Mas marami ang gumamit na lang ng motorsiklo at bisikleta upang makarating sa kani-kanilang mga pinagtatrabahuhan. May mga taksi at TNVS, pero para sa nakararami, mabigat sa bulsa ang pamasahe. Pahirapan ding lalo dahil hindi pa pinapayagang bumiyahe ang mga jeepney at UV Express na mas pinaka-kombinyenteng sakyan ng mamamayan.

At dahil sa unang ilang araw pa lamang ng GCQ ay pahirapan na sa mga empleyado at manggagawa ang biyahe papunta sa kanilang pinagtatrabahuhan, may mga nagpaplano nang umupa na lamang ng maliit na tirahan o kuwarto na mas malapit sa trabaho. Titiisin kahit malayo nang bahagya sa pamilya basta’t makapasok lamang sa trabaho nang hindi nahihirapan. ‘Yung iba naman ay madedestino sa bagong trabaho dahil hindi na nakabalik sa dating kumpanya na nagbawas ng mga tauhan o tuluyan nang nagsara.

Bagong pakikisama ang mangyayari sa iyong uupahan. Nakaka-pressure at nakakapanibago pero mas okey sa ‘yo dahil malapit lang sa iyong pinagtatrabahuhan.

Heto rin ang tips para unti-unting makasundo ang bagong kasambahay at katrabaho. Magpakatatag ka. Kailangan ‘yan sa panahon ngayon ng krisis.

1. MAGPASALAMAT. Oras na magsimula ka, pasalamatan ang mga taong naging daan para makarating ka r’yan. Kumustahin kahit paano ang mga taong nagrekomenda at maging sa nagbigay sa iyo ng pansamantalang tirahan. Huwag kang makakalimot, dapat mong ipakita ang respeto sa kanila.

2. MAKISAMA SA HEALTH PROTOCOL AT PAGKAIN. Kung mahigpit na pinaiiral ang health protocol at curfew sa inuupahan, dapat itong sundin. Kung may pagkakataon kang makapagluto ng sobra, bigyan mo rin ang bagong kakilala. Ipakita sa kanila na aktibo ka at may interes na makasama sila. Malalaman mo sa iyong pakikisama sa kanila kung sino ang maaaring lapitan sa oras na may problema. Pero mag-ingat sa mabilisang pagtitiwala o pakikipagkaibigan sa bagong kakilala maging sa trabaho. Baka kasi maapektuhan ka ng kanilang opinyon. Maaari ka nilang husgahan ayon sa panlabas na nakikita nila sa iyo. Huwag ka munang maglabas ng niloloob mo sa taong hindi mo pa masyadong kilala maging ang mabilis na pakikipagbarkada.

3. MAGPOKUS AGAD SA TRABAHO. ‘Yan ang importante ngayon upang kumita at makabawi sa dalawang buwan na walang suweldo. Pagbutihin mo ang iyong ginagawa at huwag mag-panic kung hindi alam kung paano i-operate ang makina, kalaunan ay matututunan mo rin na gamitin ang mga ‘yan.

4. HUWAG GAGAWA NG MALAKING PAGBABAGO SA TRABAHO. Maghintay ng sapat na panahon upang matutunan nang husto ang mga sistemang umiiral sa trabaho bago ka gumawa ng pagbabagong hindi pinapaboran ng ibang katrabaho. Halimbawa, mas konsentrahin mo ang pag-angat ng benta sa produkto kaysa ang baguhin ang sistema. Umayon ka muna sa agos ng sistema sa dalawang unang buwan mo.

5. MAKISALAMUHA. Palakasin ang ugnayan sa kumpanya. Lumahok sa anumang idinaraos na pagdiriwang. Habang higit kang sumasali, mas mainam. Kung may mga in-house seminars, ipakita mo ang iyong kakayahan sa ibang katrabaho. Lumahok sa professional organizations at laging ipagmalaki ang industriya. Manatili kang makipag-ugnayan sa mga contacts ng kumpanya.

Huwag kang basta malulungkot, madidismaya o maawa sa iyong sarili kung may nagawa kang pagkakamali. Kailangan mo nang lumabas sa sariling mundo mo.