Iwas-Sunog Tips ngayong Fire Prevention Month

Buhay, Pag-ibig at Pamilya

Hello, mga amigo at amiga! Alam n’yo ba na nilagdaan noong Nobyembre 17, 1966 ni dating Pangulong Ferdinand E. Marcos ang Presidential Proclamation No. 115-A kung saan ang buwan ng Marso ay idineklarang Fire Prevention Month?

Noong Enero 23, 1989 naman, nilagdaan ni Pangulong Corazon C. Aquino ang Proclamation No. 360 bilang Burn Prevention Month.

At dahil napakabilis ng panahon at Marso na naman, nagsimula na ang mga kampanya at paalala ngayong Fire at Burn Prevention Month. Karamihan kasi ng mga insidente ng sunog ay nangyayari sa buwang ito.

Napakahirap masunugan. ‘Ika nga ng karamihan, oks lang manakawan dahil may maiiwan, pero kapag sunog ang dumaan, simot lahat ng pinaghirapan. Totoo naman, ‘di ba? Dahil dito, napapanahon talaga upang pag-usapan ngayon ang ilang iwas-sunog tips.

1. Iwasan ang sobra o overloading na koneksiyon at ugaliing tanggalin ang mga nakasaksak na appliances kung hindi na ito ginagamit, lalo na kung aalis ng bahay.

2. Kung gumagamit ng liquefied petroleum gas (LPG), palaging isara ang regulator kapag hindi na ginagamit at kung mainit at sira ang regulator, gamitan ito ng basang basahan.

3. Ilayo sa mga bata ang posporo, kandila o lighter at ipatupad ang “no smoking” na patakaran sa loob at labas ng bahay.

4. Kapag umabot sa puntong nasusunog ang parte ng katawan, gawin ang “stop, drop and roll” o dumapa sa sahig, takpan ang mukha at gumulung-gulong hanggang sa mawala ang apoy.

5. Pinakaimportante sa lahat ay tumawag sa 911 o sa mga lokal na sangay ng pamatay-sunog at ibigay agad ang iyong lokasyon sa emergency operator.

Ang sunog ay mapanganib at nakamamatay, subalit, ang mga ganitong pag-iingat ay nakatutulong para makaiwas sa mga sakuna o aksidente. Palagi nating tandaan na presence of mind sa lahat ng sitwasyon ang magpapakita kung ikaw ay isang biktima o survivor.

---

Para sa anumang isyu, opinyon o problema na gus-tong i-share, mag-send sa e-mail na buhay.bulgar@ gmail.com o sumulat sa Buhay, Pag-ibig at Pamilya at ipadala sa BULGAR Bldg., 538 Quezon Avenue, Quezon City

26-anyos, hindi naman pangit, may trabaho pa, pero walang nanliligaw

Dear Roma, Tawagin mo na lang akong Rina, 26 years old at may stable job na. Hindi naman ako pangit at sa tingin ko, maganda naman ako. Kaso, hanggang ngayon ay walang nanliligaw sa akin, kaya wala rin akong boyfriend. Minsan, naiisip ko tuloy, ako yata ang may problema, pero hindi naman ako mapili o naghahanap ng mayaman o anuman. Ang gusto ko lang ay mabait, responsable at mahal ako. Ano ang dapat kong gawin, kailangan ko bang maging aggressive para lang magka-boyfriend? Thank you! — Rina

Rina, Maaaring sa una, naiisip mong may mali sa iyo, pero ang bawat isa sa atin ay may kani-kanyang itinakda sa buhay o tinatawag na destiny. Hindi mo kailangang magpakita ng motibo sa isang tao para lang mapansin o mahalin ka. Marahil, hindi pa panahon para magka-boyfriend ka at kusang darating ang lalaking nakatakda para sa iyo kung ‘yun ang destined na mangyari sa buhay mo. Mas maganda sigurong kilalanin mo munang mabuti at mahalin ang iyong sarili bago ka magmahal ng iba. Higit sa lahat, maging masaya ka kahit wala ka pang boyfriend dahil nand’yan naman ang iyong pamilya. Okie?

‘Wag nang hintaying may mamatay o maperhuwisyo... Safety tips para iwas-sunog

Itinakda ang Fire Prevention Month sa Pilipinas ngayong buwan ng Marso dahil ito ang panahon kung kailan pinakamaraming naitatalang sunog sa buong taon. Dahil dito, pinaaalalahanan ang lahat na mag-ingat upang maiwasan ang sunog at para sure na manatili tayong ligtas, narito ang ilang safety tips: 1. SIGURADUHING AYOS ANG MGA WIRING. Madalas na sanhi ng sunog ang mga faulty electrical wiring, kaya suriin agad ang mga kawad ng kuryente sa bahay. Kung may kailangang ayusin, gawin ito agad at palitan ang mga wiring na medyo luma na.

2. ‘WAG MAG-OVERLOAD NG MGA SAKSAKAN. Hindi tayo dapat saksak lang nang saksak ng appliances kung hindi tayo sigurado na kaya nitong suportahan ang dumadaloy na kuryente. Madalas na nangyayari ang overload kapag gumagamit ng octopus connection at sabay-sabay na umaandar ang appliances na malakas sa kuryente.

3. BUNUTIN ‘PAG HINDI GINAGAMIT. Kung hindi ginagamit ang TV, aircon o electric fan, mabuting bunutin ang plug sa saksakan dahil kahit nakapatay na, kumokonsumo pa rin ito ng kuryente. Nakatipid ka na sa kuryente, safe ka pa sa sunog. ‘Wag itong kalimutang gawin bago matulog at kapag aalis ng bahay.

4. BANTAYAN ANG NILULUTO. Hindi lang pagkain ang puwedeng masunog kapag hindi natin binantayan ang ating niluluto dahil maaari ring masunog ang bahay. Dahil dito, make sure na hindi kayo aalis ng kusina hangga’t hindi kayo tapos magluto, gayundin, ‘wag mag-iwan ng flammable objects malapit sa kalan dahil maaari itong magliyab kapag hinangin ang apoy ng kalan. Pagkatapos magluto, ugaliing patayin ang gas at kalan.

5. ILAYO ANG POSPORO O LIGHTER SA MGA BATA. Isa rin ito sa mga madalas na dahilan ng sunog, kaya naman siguraduhing maitatabi ang mga ito sa lugar na hindi nila maaabot o mabubuksan. Mahalaga rin na maipaliwanag sa kanila na hindi ito dapat paglaruan dahil maaari itong maging sanhi ng sunog.

6. I-SECURE ANG FIRE EXTINGUISHER. Siguraduhing may fire extinguisher sa bahay nang sa gayun ay agad maapula ang apoy at hindi na lumala. Kapag naapula ang maliit na sunog, mabuting tumawag pa rin ng bumbero upang makasigurado na ligtas na ang paligid.

Hindi lang tuwing Fire Prevention Month tayo dapat mag-ingat dahil applicable ang lahat ng tips na ito sa buong taon. Kapag nagsimula na ang sunog, hindi na natin ito kontrolado kaya para makaiwas dito, make sure na ibabahagi n’yo ito sa inyong mga kaibigan at kakilala. Okie?