Realtalk lang, besh! Iba’t ibang dahilan kaya ‘di ka yumayaman

ni Justine Daguno - @Life and Style | November 6, 2021

“Bakit hindi ako yumayaman?” Isa ka ba sa mga nakapagtanong na niyan sa iyong sarili? Tipong kahit ano’ng sikap at tiyaga, tila mailap ang pag-asenso? Naku, maraming dahilan ‘yan. Posibleng ito’y dahil madalas magkaroon ng maling desisyon, hindi balanse ang lifestyle, masyadong pressured sa mga tao sa paligid at iba pa. Well, para mabawasan ang mga iniisip mo sa buhay, narito ang ilan sa mga dahilan kung bakit hanggang ngayon ay hindi ka pa rin yumayaman:

1. WA’ PAKI SA UTANG. Ikaw ba ‘yung tipong utang here, utang there? Naku, maling desisyon ‘yan sa buhay. Ang pagkakaroon ng utang ay isa sa mga dahilan kung bakit hindi umuunlad ang tao. Hangga’t makakapagtiis o makakapagsakripisyo ay ‘wag humiram na pera, lalo na kung para lang naman sa luho o hindi importanteng bagay.

Domino-effect kasi ‘yan, ‘pag nangungutang ang tao ay hindi rin ito nakakapag-ipon. At kapag walang ipon, malabong umasenso.

2. HINDI INIISIP ANG BUKAS. Sa ayaw o sa gusto natin, magkakaiba ng pribilehiyo sa buhay ang bawat tao, kaya kung ikaw ‘yung tipo na “isang kahig, isang tuka”, mali naman yata na puro YOLO ka. ‘Ika nga, mabuhay nang naaayon sa financial status. Walang masama sa pag-e-enjoy, pero dapat ‘wag kalilimutang may bukas pa na kailangan din ma-survive. ‘Wag buhus-buhos biyaya, tapos bukas tunganga.

3. WALANG ‘MONEY PLAN’. Ang pagkakaroon ng plano sa pera ay malaking hamon na dapat nating napapagtagumpayan. Sobrang mali ‘yung once na matanggap ang suweldo ay iwi-withdraw lahat, tapos saka pa lang pag-iisipan kung saan mapupunta ang bawat sentimo. Mas oks siguro kung bago pumunta sa ATM machine, gumawa muna ng listahan, para man ito sa bayarin, pambayad-utang o pang-savings. Goods ito dahil naiiwasan ang pagkalito at pagkakaroon ng mga hindi inaasahang gastusin.

4. HINDI MARUNONG IHIWALAY ANG KAILANGAN SA GUSTO LANG. Isa pa sa mga pagkakamaling nagagawa ng marami sa atin ay ang kawalan ng kaalaman sa paghihiwalay sa mga gastusin para sa mga bagay na kailangan at kagustuhan lamang.

Ito’y simple lamang, palaging unahin ang mga bagay na kailangan at kapag may sumobra sa budget, puwede na bigyang-pansin ang mga bagay na gusto lang.

5. WALANG PAGSUNOD SA BUDGET. May mga tao na may listahan nga at alam ang kailangan sa gusto lamang, pero hindi naman kayang panindigan. Hindi kayang kontrolin ang sarili laban sa tukso, kaya ang ending ay nawawala na sa budget. Kapag gumagawa ng budget, dapat committed at disiplinado, ‘wag ito hayaang masira nang sa gayun ay mapunta sa bagay na kapaki-pakinabang ang perang pinaghirapan natin.

Marami sa atin ang hirap sa paghawak sa pera, hindi dahil sa hindi madaling kumita o walang oportunidad, kundi dahil mahirap kalaban ang sarili at ang mga bagay-bagay sa paligid.

Maraming maaaring makaapekto sa diskarte natin sa paghawak sa pera. Sa totoo lang, wala naman yata talagang sikreto sa pagyaman, pero kung magkakaroon ng disiplina, matututong magsakripisyo at higit sa lahat ay magiging wais, hindi malayong makamit ang pag-asenso at tagumpay.

Gets mo?

Todo-kayod, pero keri na bang mag-level up? Alamin: 7 signs na Financially Stable ka na

ni Justine Daguno - @Life and Style | October 30, 2021

Karamihan sa atin, goal ang magkaroon ng stable na career, sariling saksakyan, sariling bahay at lupa, mag-asawa at bumuo ng sariling pamilya pagdating ng adulthood stage. Pero sa totoo lang, hindi ‘yun ganu’n kadali dahil upang makuha ang mga life goals na ‘yan, marami pa tayong dapat unahin at number one r’yan ang pagiging financially stable. Bago pumasok sa panibagong stage ng buhay, paano nga ba malalaman kung ready o financially stable na tayo?

Nairto ang ilang signs para masabing achieved na ang financial stability:

1.HINDI NA PANG-SURVIVE ANG SAHOD. Marami sa atin ang kapit sa suweldo para maka-survive sa buhay. Hirap kumilos o magplano dahil palaging naghihintay na makasahod muna. Pero kapag financially stable na, hindi na ito pang-‘survival mode’.

Meaning, 3-days mula ngayon o next week man ang payday ay wa’ paki o tipong nakaalis na sa ‘gapang stage’ dahil kaya nang kumain ng masarap kahit wala pang suweldo.

2. MAY SAVINGS ACCOUNT NA. Importanteng magkaroon ng ipon dahil mahirap tumanda o mag-level-up sa buhay kung tuwing suweldo lamang may pera. ‘Wag pumayag na nasa adulting stage na ay “isang kahig, isang tuka” pa rin dahil sobrang mali ‘yun. Kaya naman, kung nagkakalaman at stable na ang savings account natin, congrats dahil isang check na financially stable na tayo!

3. MERONG EMERGENCY FUND. Bukod sa ipon ay may emergency fund na rin. Ito ay hiwalay na ipon na siyang pinagkukunan ‘pag may nangyaring hindi inaasahan.

Kumbaga, may magkasakit man o mawalan ng trabaho, anytime ay may mahuhugot at hindi na kailangang mamrublema sa pera o umutang nang umutang.

4. MERONG PAMBAYAD SA BILLS. Isa sa mga bagay na dapat ika-proud bilang financially stable ay ‘pag updated palagi sa mga bayarin. Wala nang kaba ‘pag may kumatok para sa reading ng tubig, kuryente, internet at iba pa dahil naka-ready na agad ang mga pambayad o meron na talagang monthly budget para sa bills.

5. MERONG LIFE/HEALTH INSURANCE. Kung ‘yung iba ay dedma sa mga insurance dahil sa kaisipang, “Mas oks mag-YOLO dahil bagets pa,” ibahin natin ang mga taong financially stable, meron silang life at health insurance kahit young adults sila. Tandaan, mas mura ang insurance habang bata pa at mas malaki naman ang amount na makukuha sa pagtanda.

6. WALA NANG UTANG. Financially stable na ‘pag wala na tayong utang o hindi na kailangang mangutang pa. Nalagpasan na ang mga panahong walang-wala o hirap na hirap humanap ng ipambabayad sa mga utang. ‘Yun nga lang, madalas ay tayo na ang gustong utangan ng iba. Chos!

7. NAKATULONG NA SA PAMILYA. Pamilyado man o hindi, kapag kaya na nating tumulong financially sa mga magulang o kapatid na nangangailangan nang hindi masyadong nako-compromise ang mga personal expenses, good sign ‘yan na na-reach na natin ang financial adulthood.

Tandaan na ang pagiging financial stable ay hindi lamang basta goal na pagkatapos makamit ay tapos na. Dapat itong maging parte ng lifestyle na mine-maintain dahil ayaw nating bumalik sa panahong gipit na gipit o tipong hingi lang nang hingi. Oks magkaroon ng sariling pera, lalo na kung nagagamit ito ng tama.

Gets mo?

Naghahanap ng pagkakakitaan? Try mo ‘to! IBA’T IBANG NEGOSYONG SWAK SA ANUMANG PANAHON

ni Justine Daguno - @Life and Style | October 24, 2021

Bukod sa sipag at tiyaga, kailangan din ng diskarte para umasenso ang buhay. ‘Ika nga nila, “Hindi lahat ng may trabaho ay yumayaman, kailangan ng extra income”. Siyempre, ‘pag sinabing “extra income”, r’yan na papasok ang pagnenegosyo. True naman, malaking tulong ang business, lalo na sa panahon ngayon kung saan wala namang dagdag-suweldo pero patuloy na taas-presyo ang mga bilihin. Kaya naman, narito ang ilang business ideas na siguradong magpapayaman sa ‘yo:

1.RICE RETAIL. Karamihan sa ating mga Pinoy, hindi kumpleto ang almusal, tanghalian at hapunan kapag walang kanin — in short, rice is life. Malabong malugi ang mga rice retail business dahil hindi ito seasonal, umulan man o bumagyo ay may bibili ng bigas dahil prayoridad ng marami ang kanin.

2. WATER STATION. Tulad ng bigas, pangunahing pangangailangan din ang tubig, lalo na ang malinis na inuming tubig. Marami ang tumatangkilik nito, partikular ang pamilyang may baby, pasyente at iba pang maselan sa inuming tubig.

3.MINI GROCERY STORE. Mas gusto ngayon ng mga tao ang convenience, kaya mas malaki ang kita ng mini groceries sa lugar na may kalayuan sa lokal na pamilihan. Kapag nasa ganitong lugar kayo, maaaring pag-isipan ang business na ‘to. Oks din naman magtayo nito sa public market dahil maraming potential customers sa ganitong lugar.

4. FOOD CATERING. Dahil mahalaga talaga ang convenience, tumataas na rin ang demand ngayon sa catering service. Mas pinipili kasi ng karamihan ang magpaluto, lalo na kung malakihan ang events dahil menos-gastos. Iniisip kasi nila, hindi na kailangang mamalengke, mag-asikaso o mag-prepare ng mga iluluto saka magluluto. Kaya naman, sobrang goods ito kapag may talent at hilig sa pagluluto dahil nagagawa na ang passion at sure pa ang kita.

5.BAKERY. Kung mahilig ka naman mag-bake at gustong mag-level up, puwedeng-puwede itong gawing business. Isa sa mga paboritong meryenda o pantawid-gutom ng mga Pinoy ang tinapay, lalo na kapag may bisita o trip lang magkape. Sa simula, maaaring magpa-order online upang makilala ang produkto hanggang sa magkaroon ng sapat na puhunan at makapagpatayo ng bakeshop.

6. JUNKSHOP. Truly ang kasabihang, “May pera sa basura.” Sa katunayan, malaki ang puwedeng kitain sa pagdya-junkshop dahil ‘rekta ito sa produkto at hindi kailangan ng bonggang puwesto. Pero siyempre, bago ito simulan ay siguraduhin munang pag-aaralan ito nang sa gayun ay mapakinabangan ang “basura” at hindi mapunta sa wala.

Habang tumatagal ay mas nalalaman natin ang kahalagahan ng bawat salapi na ating pinagpapaguran, kaya dapat itong gamitin sa tama. Sa pagnenegosyo, unang hakbang ang paglalabas ng puhunan, kaya pag-isipan munang mabuti bago ito pasukin. Tandaan, tayo ay magnenegosyo dahil kailangan nating kumita, at hindi para magkaroon ng pagsisihan.

Good luck!