Tindahan, dapat may record... Tumanggap ng ayuda, bawal bumili ng alak

Inalis na ang pag-iral ng liquor ban sa Lungsod ng Muntinlupa.

Gayunman, may mga inilatag na alituntunin sa kung sino lamang ang puwedeng bumili ng alak at kung sino ang bawal.

Nakasaad sa ordinansa na ang mga indibidwal na tumanggap ng tulong-pinansiyal mula sa national o local government ay hindi puwedeng bumili ng alak habang umiiral ang GCQ o MGCQ.

Ito ay para masiguro na ang tulong ng gobyerno ay hindi magagamit sa pagbili ng alak.

Kung benipisyaryo ng national o local government cash assistance at mahuhuling bumili ng alak ay disqualified na sa susunod na mga ayuda.

Ang mga establisimyento na nagtitinda ng alcohol ay dapat umanong mayroong record ng pangalan ng buyer, eksaktong address, contact details, petsa at oras ng pagbili.

Lugi sa COVID-19 Ilang branch ng Victoria Court, isasara na

Kinumpirma ng hotelier at car racer na si Angelina Mead King ang pagsasara ng ilang mga branch ng Victoria Court na kanyang pag-aari.

Si Angie ang nagmamay-ari sa southern branches ng Victoria Court habang ang kapatid niyang si Atticus King naman ang sa northern branches.

Sa kanyang video, binanggit ni Angie ang pagkalugi na ng negosyo dahil sa COVID-19 pandemic.

Kaugnay nito, sa kanyang mensahe para sa mga empleyado ng hotel, sinabi ni Angie na naging mahirap para sa kanya ang pagdedesisyon.

Ihahanda na rin aniya ang retirement at retrenchment packages para sa mga empleyado na makatutulong sa kanila sa susunod na mga buwan.

Walang pasada, contact tracer muna — Palasyo... Tsuper vs. COVID-19

Nanindigan ang Malacañang sa polisiya na ipagbawal pa rin ang pagbiyahe ng mga tradisyunal na jeepney kahit sa mga lugar na nakasailalim na sa general community quarantine (GCQ).

Kasunod ito nang kalbaryo ng mga manggagawa na walang masakyan sa pagpasok sa Metro Manila.

Ayon kay Presidential Spokesperson Harry Roque, imposibleng maipatupad ang social distancing sa jeepney kung saan harapan ang mga pasahero, hindi tulad ng mga ide-deploy na modern jeepney na parang bus ang seating arrangement at maipatutupad ang physical distancing.

Para matulungan ang mga jeepney drivers, sinabi ni Roque na puwede silang kunin ng pamahalaan bilang contact tracers dahil nangangailangan pa ang pamahalaan ng 120,000 personnel.

Bukod dito, kinukonsidera rin aniya ng gobyerno ang reconfiguration ng mga jeepney para makasunod sa minimum health standards.

"We are actually considering alternative livelihoods for them. There's a suggestion that they be employed as contact tracers because we do need about 120,000 of them and its only only about 30,000 employed so far," saad ng Kalihim.

"And we’re also considering the complete reconfiguration of the jeepney to comply with minimum health standards," dagdag pa ni Roque.

Nabatid na marami nang mga jeepney driver ang umaaray dahil wala silang hanapbuhay hangga't hindi sila pinapayagang makabiyahe habang ang ilan ay nanlilimos na lamang sa kalsada.