Pinoy, isa sa mga nagde-develop ng gamot ng U.S. kontra COVID-19

Pinuri ang Department of Health at ang Inter-Agency Task Force for the Management of Emerging Infectious Diseases sa pagbibigay pahintulot sa bansa na makibahagi sa trial test ng World Health Organization (WHO) sa bisa ng bagong gamot na ginagamit ng Estados Unidos, Japan at South Korea laban sa Covid-19.

Ang tinutukoy na gamot ay ang Remdesivir na gawa ng Gilead, ang pharmaceutical company na nakabase sa California, USA.

Sa privilege speech ni Lone San Jose Del Monte City Rep. Florida Robes, sinabi nitong ang isa sa nasa likod ng development ng Remdesivir ay isang Filipino-American mula sa San Jose Del Monte City na may kaugnayan sa kanyang pamilya pero, tumanggi na itong magbigay pa ng karagdagang detalye.

Matatandaang, lumahok ang Pilipinas sa WHO Solidarity Trial for Remdesivir na may 117 patients registered sa 15 study sites (14 hospitals sa NCR at 1 Davao).

Ayon sa WHO, ikukumpara ang Solidarity Trial sa apat na treatment options laban sa standard of care, upang masuri kung ano ang mas epektibong pangontra sa Covid-19.

Napag-alaman na ang test na isinagawa ng United Institute National Institute of Allergy and Infectious Diseases sa Remdesivir ay nagresulta ng pagbaba ng recovery time ng 11 araw kumpara sa 15 araw sa placebo group.

Nabawasan din nito ng walong porsiyente ang fatality rate na nabigyan ng Remdesivir kumpara sa 11 percent sa placebo group.

SAP 3 sa jeepney drivers

Pinag-aaralan ng gobyerno ang posibilidad na bigyan ng pangatlong bugso ng cash assistance ang mga jeepney driver ngayong buwan na naapektuhan ng coronavirus lockdown.

“Pinag-aaralan na po na bigyan ng pangatlong buwang ayuda ang mga jeepney drivers na nawalan ng hanapbuhay po dahil hindi pa po pinapayagang bumiyahe ang ating mga jeepney,” sabi ni Presidential Spokesman Harry Roque sa televised press briefing.

"Ito po ay manggagaling pa rin doon sa Bayanihan Act," wika pa ni Roque.

Nabatid na marami nang mga jeepney driver ang umaaray dahil wala silang hanapbuhay hangga't hindi sila pinapayagang makabiyahe habang ang ilan ay nanlilimos na lamang sa kalsada.

Kotse, sapol sa tren

Kapwa nagkaroon ng damages pero, wala namang iniulat na nasaktan matapos na masalpok ng tren ng Philippine National Railways (PNR) ang isang kotse na tumatawid sa riles, kahapon ng madaling-araw sa Abad Santos Avenue, Tondo, Manila.

Ayon sa Manila District Traffic Enforcement Unit, alas-4:50 ng madaling-araw nang mangyari ang insidente sa lugar.

Nabatid na galing ang tren sa Governor Pascual station sa Malabon at patungong Maynila nang mabangga ang kotse sa Abad Santos Avenue.

Ayon kay Joseline Geronimo, tagapagsalita ng PNR, wala namang nasugatan sa insidente maging ang 30 pasahero na sakay ng tren at nailipat na rin ang mga ito sa ibang tren.

Nabatid na pinilit umano ng kotse na tumawid sa riles kahit na may paparating na tren.