Misa, papayagan na sa MGCQ

Pinayagan na ng Inter-Agency Task Force for the Management of Emerging Infectious Diseases ang religious mass gatherings pero hanggang 50 percent capacity lamang para sa mga lugar na nasa ilalim ng modified general community quarantine (MGCQ).

Sinabi ni Presidential Spokesman Harry Roque na dapat ipatupad pa rin ang minimum health standards kabilang ang physical distancing at pagsusuot ng face masks.

Matatandaang lahat ng lugar sa ilalim ng bansa ay nasa MGCQ na maliban na lamang ang Metro Manila, Pangasinan, Cagayan Valley, Central Luzon, Central Visayas, Davao City at Zamboanga City na nasa ilalim ng general community quarantine.

700 toda members, sumalang sa COVID testing

Sumailalim kahapon sa Expanded Targeted Testing ng lokal na pamahalaan ang mga miyembro ng Tricycle Operators and Drivers Association (TODA) sa Las Piñas City.

Halos 700 TODA members ang sumalang sa COVID rapid at swab testing.

Layunin nitong matiyak ang kalusugan ng mga tricycle driver ngayong panahon ng krisis kasabay ng pagpapahintulot na pumasada ang mga TODA.

Kabilang sa mga sumalang sa testing ay ang mga miyembro ng BFRSSCVTODA (255), BFRV-V TODA (269), SMCTODA (32) at ng PHILAMTODA (80).

Ayon kay Las Piñas City Mayor Imelda "Mel” Aguilar, prayoridad ng lungsod na maisalang sa testing ang mga tricycle driver, bukod sa mga suspected COVID-19 cases, healthcare workers at frontliners.

Sinabi naman ni City Health Office Chief Dr. Ferdinand Eusebio na patuloy ang isinasagawang testing at mas pinaigting pa ang kanilang hakbang sa screening at contact tracing upang tugunan ang COVID-19 cases sa lungsod.

China Telecom bilang 3rd telco, pinalagan

Pinalusot ang House Bill No. 78 para makakawala ang telcos mula sa 60 percent Filipino ownership requirement ng Konstitusyon, ayon kay dating Supreme Court Justice Antonio Carpio.

Ang HB No. 78 ay inaprubahan ng Mababang Kapulungan ng Kongreso noong Marso 10, 2020. “That House bill, if approved by the Senate, will amend the Public Service Act to exclude telcos as public utilities which, under the Constitution, must at least be 60 percent Filipino-owned,” ayon sa retired SC magistrate.

Aniya, ang pagsususog ay magpapahintulot sa foreign investors na magmay-ari ng 100 percent ng telco companies, na nagpapahiwatig na ang China Telecom ay maaaring maging 100 percent owner ng third telco na inudyukan umano ni Pangulong Rodrigo Duterte noong November 21, 2017.

Sa kasalukuyan, ang third telco sa bansa ay iginawad sa Dito Telecommunity, isang partnership ng Davao-based Udenna consortium at ng China’s state-owned telecom.

Subalit sinabi ng dating SC justice na “Apparently China Telecom wants to come in as a majority, or even 100 percent owner, of the third telco.”