Palasyo, todo-bawi… Sidecar, bawal sa highway

Binawi ng Palasyo ang naunang pahayag nito na pinapayagan na ang pagbiyahe ng mga motorsiklong may sidecar sa mga national highway.

Paglilinaw ni Presidential Spokesman Harry Roque, bawal pa rin ang mga tricycle at iba pang may sidecar sa mga highway ngunit, pansamantala munang itinigil ang paghuli sa mga ito.

"Interior and Local Government Secretary Eduardo Año clarifies that although apprehension from the Highway Patrol Group (HPG) is temporarily suspended, such are still prohibited from traversing the national highways," aniya sa isang pahayag, Huwebes ng gabi.

Naunang sinabi ni Roque na puwede nang bumiyahe ang mga may sidecar sa mga highway ngayong karamihan sa lugar sa bansa ay nasa ilalim na ng general community quarantine (GCQ) at modified GCQ.

"Pinapayagan na po ngayon ang mga sidecars sa national highways," ani Roque nitong Huwebes ng tanghali.

"'Yan po ay para maibsan ang kakulangan ng transportasyon ngayong nag-GCQ na at MGCQ sa maraming areas," dagdag niya.

92-anyos, patay sa COVID-19

Isang 92-anyos na lola ang nasawi at positibong tinamaan ng Covid-19 sa Silang, Cavite.

Sa Facebook page ni Silang Mayor Socorro Poblete, ibinalita nito na pumanaw na ang isang 92- anyos na lola at huli nang nalaman na positibo ito sa COVID-19.

Nagmula ang biktima sa Bgy. Sabutan, kung saan dati na itong may iniindang sakit. Nakaramdam ito ng hirap sa paghinga at nagpatingin sa isang pribadong pasilidad.

Agad itong isinailalim sa standard swab test bilang pagsunod sa protocol subalit, hindi pa man lumalabas ang resulta ay binawian na ito ng buhay.

At nitong Hunyo 2, lumabas ang resulta ng swab test kung saan positibo ito sa coronavirus.

Adik sa Mobile Legends, patay

Isang menor-de-edad ang namatay matapos magkaroon ng kumplikasyon sa baga dahil umano sa sobrang pagpupuyat at hindi pagkain sa tamang oras kalalaro ng Mobile Legend, sa Bgy. Pasong Camachile 2, Gen Trias, Cavite.

Ayon sa Facebook page ng Cavite Connect, Mayo 24 nang itakbo sa ospital ang binatilyong itinago sa pangalang ‘Johnrey’, matapos na magsuka ng dugo.

Niresetahan ito ng gamot at pinauwi rin dahil may mga Covid patient sa nasabing ospital.

Nabatid na masyado umanong adik sa ML ang biktima at halos gabi-gabi umano itong puyat at nalilipasan ng gutom.

Mayo 31, nang tuluyang binawian ng buhay ang binatilyo matapos na magkaroon umano ng kumplikasyon sa baga nito.