41 empleyado ng customs, positibo sa COVID-19

kinumpirma ni BOC Spokesperson at Assistant Commissioner Vincent Maronilla na 41 empleyado ng Bureau of Customs ang nagpositibo sa covid-19.

Ani Maronilla, ang rapid test sa mga ito ay sinimulan noong Mayo at nagpapatuloy pa rin hanggang ngayon.

Ang mga nagpositibo sa rapid test ay isinailalim naman sa RT PCR Test upang makumpirma kung positibo talaga sa covid-19.

Ang 41 na nagpositibo sa virus ay pawang asymptomatic o walang sintomas ng virus.

Naka-isolate na aniya ang mga nasabing empleyado at sumasailalim sa quarantine period.

Agad din naman aniyang nagsagawa ng contact tracing ang BOC sa nagkaroon ng close contact sa mga nagpositibo sa covid-19.

Sinabi ni Maronilla na isang empleyado naman ng BOC na ang nasawi dahil sa covid noong Marso.

Dahil sa COVID-19... 7.3 milyong Pinoy, tambay

Umabot sa 7.3 milyong Pinoy o katumbas ng 17.7% ang naitalang nawalan ng trabaho dahil sa covid-19 hanggang nitong Abril ng taong ito.

Batay ito sa datos na inilabas ng Philippine Statistics Authority (PSA).

Ayon sa National Statistician na si Dennis Mapa, ito na ang pinakamataas na unemployment rate na naitala sa bansa.

Noon aniyang Enero, ang unemployment rate ay 5.3% lamang o katumbas ng 2.4 milyon. Nabatid na noong Abril 2019, ay nasa 5.1% lamang ang unemployment rate o katumbas ng 2.3 milyon katao.

Ang datos na ito ng PSA ay mas mataas kaysa pagtaya ng Department of Labor and Employment (DOLE) na maaaring umabot sa 5 milyon ang mawalan ng trabaho dahil sa covid-19.

Sinabi ni Mapa na 38.4% ng mga employed workers ang nagsabing hindi sila makapagtrabaho dahil sa lockdown na ipinatutupad dahil sa covid-19.

Noong Abril ay mas mataas din ang underemployment o mga may trabaho pero naghahanap pa ng karagdagan upang makaagapay sa pangangailangan na umabot ng 18.9% o katumbas ng 6.4 milyong katao.

Kabilang sa mga apektadong sektor dahil sa covid-19 ay nasa art, entertainment at recreation sector kung saan nasa 54% ang nawalan ng trabaho.

PNP official sibak, misis kasabwat… OJT ni-rape, beybi ipina-abort

Nahaharap sa kasong kriminal at administratibo ang isang junior official ng Manila Police District (MPD) matapos akusahan na gumasa sa isang babaeng police trainee at pilitin na ipalaglag ang ipinagbubuntis nito.

Kasabay nito, iniutos ni MPD Director PBGen. Rolando Miranda ang pagsibak sa puwesto sa suspek na si PCpt. Heherson Zambale, hepe ng Barbosa Police Community Precinct ng Sta. Cruz Police Station.

Naganap umano ang panggagahasa nitong Marso 7 ng suspek sa biktima na isang Criminology student at nag-aplay para sa 'on-the-job training' sa naturang istasyon.

Nalaman na pinainom umano ang biktima ng alak hanggang sa hindi na nakapalag nang sipingan siya ng suspek.

Ayon sa biktima, inisyal niyang tinanggap ang nangyari sa kanya pero kinalaunan ay nagdesisyon na magsampa na ng kaso nang sa halip na suportahan siya nang malaman na buntis ay pinilit umano siya ng suspek na ipalaglag ang ipinagbubuntis.

Ayon sa biktima, pinainom muna siya ng suspek ng mga gamot na pampalaglag at nang hindi tumalab ay dinala na siya sa isang abortionist sa Sampaloc kung saan tinanggal ang kanyang dinadala sa sinapupunan.

Nabatid na noong Mayo 8 nang pormal na magsampa ng reklamo ang biktima at magsumite ng medical certificate.

Nitong Hunyo 1, sinampahan sa Manila City Prosecutor's Office ng kasong paglabag sa RA 8353 (Rape) at Induced Abortion si Zambale at ang kanyang misis na si Aliah Zambale bilang co-conspirator at dalawa pang hindi nakikilalang babae na sumama umano sa pagpapalaglag niya. Nabatid na sinampahan din ang suspek na pulis ng kasong administratibo.

Nalaman na dinisarmahan na rin si Zambale at sinibak sa kanyang puwesto habang isinasailalim ang imbestigasyon laban sa kaniya.

Dahil dito, iniutos ni National Capital Regional Police Office (NCRPO) Director PMGen. Debold Sinas sa lahat ng District Director at Chief of Police na tanggalin na ang pagtanggap ng mga OJT lalo na sa mga istasyon at units.

Sinabi ni Sinas na ang mga OJT ay ipu-forward na sa Regional Learning and Doctrine Development Division (RLDDD) at iba-validate ng Regional Intelligence Division (RID) para sa kumpletong background investigation.