Balik-eskuwela 'pag ginawang Disyembre, mga estudyante papalakpak sa tuwa — P-Digong

Iginiit ni Pangulong Rodrigo Duterte na hindi niya ginawang Disyembre ang pagbubukas ng klase dahil tiyak umano na papalakpak sa tuwa ang mga estudyante.

Bukod nito, posibleng gamitin din umano ito ng kanyang mga kritiko laban sa kanya na hindi nito kaya ang krisis sa COVID-19.

"Kayong mga estudyante makinig kayo. Kung sabihin ko sa inyo na hanggang Disyembre walang klase anong gawain ninyo ngayon? Sige. Talon pati palakpak. P***. Biro mo hanggang Disyembre walang klase. Eh p*** tapos sabihin naman ng mga tao, ‘G*** itong Duterte na ito hindi niya kaya ‘yung COVID. Umalis ka na diyan," sabi ni Pangulong Duterte sa kanyang public address.

Una nang inaprubahan ng Inter-Agency Task Force on Emerging Infectious Diseases (IATF) ang rekomendasyong iurong ang pagbubukas ng klase sa Agosto 24 dahil sa coronavirus pandemic.

Habang maaari naman magbukas ang mga private schools ng mas maaga sa Agosto pero ang gagamitin ay iba't ibang learning system.

Kaugnay nito, kanselado naman ang mga extra-curricular activities gaya ng sports, campus journalism, at job-fair events na kinakailangan ng pagsasama-sama ng mga mag-aaral.

Una nang inihayag ni Education Secretary Leonor Briones na magpapatupad ang kagawaran ng iba't ibang approach sa pagtuturo sa mga estudyante sa pamamagitan ng computer, cellphones, paggamit ng media at radyo.

1.26 milyon empleyado nakatanggap ng cash assistance

Ibinahagi ni Pangulong Rodrigo Duterte sa kanyang ulat sa Kongreso na nasa 1.26 million na mga empleyado ng small businesses ang nakatanggap ng cash assistance sa ilalim ng COVID-19 emergency subsidy program.

Sa kanyang weekly report, sinabi ni Pangulong Duterte na nasa P10.1 billion na cash grants ang nailabas na ng Social Security System (SSS) sa 1,261,044 mula sa target na 3.4 million beneficiaries as of May 6.

Batay sa datos ng gobyerno, nasa 101,400 empleyado ang nagsumite ng aplikasyon at nasa 2.2 million empleyado ang nakitang lehitimo para sa subsidy program as of May 7.

Ang financial assistance ay nasa P5,000 hanggang P8,000 per tranche para sa bawat benepisyaryo, depende sa minimum wage levels sa kani-kanilang rehiyon.

Ang payout schedule para sa first tranche ay mula May 1 hanggang May 15, habang ang second tranche ay mula May 16 hanggang 31.

Ang weekly report ay bahagi ng check and balance sa ilalim ng Bayanihan to Heal as One Act na nagbibigay sa pangulo ng karagdagang kapangyarihan na i-realign ang 2020 national budget.

Mga residente sa Montalban, Rizal pumalag sa pahirapang pagkuha ng SAP cash assistance

Trending ngayon sa social media ang napakahabang pila ng mga taga-barangay San Isidro sa Montalban, Rizal na naghihintay mabigyan ng ayuda mula sa Social Amelioration Program ng Department of Social Welfare and Development.

Reklamo ng mga residente, pinahirapan na sila sa pila para makakuha ng mga Social Amelioration Card form ay mas lalong pahirapan sa pagkuha ng ayuda.

Ayon kay Shanaira Nicole Datahan Rafal, isa sa mga nagrereklamong residente, alas-5:00 palang ng madaling-araw kahapon ay nakapila na sila sa labas ng barangay hall ng San Isidro pero inabot ng alas-10:00 ng gabi bago sila nakakuha ng SAC Form.

Kaninang alas-4:00 naman aniya ng madaling-araw nag-post ang barangay na mamimigay na ng ayuda o SAP ngayong araw.

Batay aniya sa abiso, 8:00 ng umaga ang simula ng SAP distribution kaya naman alas-5:00 palang ng madaling-araw ay pumila na aniya sila agad.

Gayunman, ayon kay Shanaira, alas-2:00 na ng hapon nang magsimulang mamahagi ng SAP sa mga tao at pagdating ng alas-4:00 ng hapon ay inanunsiyo na cutoff na sa pamimigay ng ayuda. Pangako aniya sa kanila bukas ay muling magsisimula ng pamamahagi ng cash aid.

Pero maging pagkuha ng numero para bukas ay pahirapan din aniya dahil hanggang ngayon ay marami pa ang hindi nabibigyan ng numero.

Batay sa mga video post ni Shanaira sa kanyang social media account ay makikita ang napakahabang pila ng mga tao, halos magkadikit-dikit na rin ang mga tao at hindi na nasusunod ang social distancing.

Tiniis ng mga residente ang init ng araw at ang ulan pero wala umanong kahit sino ang lumalabas sa kanila para magpaliwanag ng sitwasyon.

Sa isa sa mga video post ni Shanaira makikita na maraming tao sa labas ng health center ng south ville 8B na umaasang mabibigyan ng numero subalit, ang problema aniya ay wala na silang makitang tao sa loob.