Sekyu at 2 tanod na nagbanta kay P-Digong sa socmed, sumuko

Nasa kustodiya na ng National Bureau of Investigation (NBI) ang tatlong lalaki sa Cebu na sumuko matapos na paratangang nagbanta kay Pangulong Rodrigo Duterte sa pamamagitan ng kanilang social media accounts.

Itinanggi ng guwardiyang si Dether Pajartine Japal, 31, ng Lapu-Lapu City, Cebu na nag-post ito kamakailan ng pagbabanta kay Pangulong Duterte at wala rin umano siyang iniaalok na pabuya.

Hindi aniya siya ang naglagay sa kanyang Facebook post ng P20,000 pabuya para sa makapapatay sa Presidente na kumakalat ngayon online.

Sa Cebu City naman, humarap din sa NBI ang dalawang barangay tanod na iniimbestigahan hinggil sa kanilang social media post na binabantaan umano si Pangulong Duterte.

Sa viral na larawan, makikitang may hawak pang mga armas sina Alvin Cabigon at Rendel Fajardo.

Pero ayon kay Cabigon, edited ang kumakalat na larawan at iba ito sa orihinal niyang post.

Sinisiyasat na ng NBI Region VII kung posibleng makasuhan ang tatlong sumuko.

Kolehiyo na may 'full online education', puwede nang magsimula — IATF

Inaprubahan ng Inter-Agency Task Force for the Management of Emerging Infectious Diseases ang rekomendasyon ng Commission on Higher Education na base sa education delivery mode ang pagbubukas ng klase sa mga unibersidad at kolehiyo sa harap ng krisis sa COVID-19.

Sinabi ni Presidential Spokesman Harry Roque na base sa IATF Resolution No. 36, nangangahulugan na makapagbubukas na kaagad ang mga higher education institutes kung gumagamit sila ng full online education habang ang gumagamit ng flexible learning ay makapagbubukas anumang oras sa Agosto 2020.

At ang mga higher education institutes na gumagamit ng significant na face-to-face/in person mode ay makapagbubukas lamang nang hindi mas maaga ng Setyembre 2020 sa mga lugar na nasa ilalim ng general community quarantine.

"'Yung mga face-to-face at in person na instruction po, hindi po pupuwede magbukas hanggang Setyembre a-uno," sabi ni Roque sa virtual press briefing sa Malacañang.

Nabatid din na ang mga pribadong higher education institutes ay hinahayaang magpalit ng kanilang academic calendar at magbukas sa Agosto 2020.

Patuloy naman aniya ang gagawing review ng CHED sa mga kondisyon at pakikipag-usap sa mga higher educational institutions.

OFWs, puwede nang i-deploy — P-Duterte

Pumayag na si Pangulong Rodrigo Duterte na mai-deploy abroad ang mga land-based and sea-based overseas Filipino worker (OFWs) sa kabila na nagpapatuloy pa ang banta sa Coronavirus Diseases 2019.

"Ang mga land-based at sea-based na OFWs ay papayagan pong umalis para sa abroad," ani Presidential Spokesman Harry Roque sa virtual press briefing.

Kinakailangan lamang aniya ng mga OFWs na pumirma sa declaration form na batid nila ang peligrong susuungin sa ibang bansa.

Hindi naman kasama sa deployment ang mga OFWs na nagtatrabaho sa health care services bilang pagtalima na rin sa deployment ban na ipinatupad ng Philippine Overseas Employment Agency (POEA).

Inaatasan ang lahat ng tanggapan ng pamahalaan na may kinalaman sa processing ng OFW deployment na maglagay ng green lanes para mapadali ang proseso at pagpapadala ng mga OFWs sa ibang bansa.

Kaugnay nito, pinayagan na rin ng pamahalaan na makabalik na sa operasyon ang mga recruitment at placement agencies sa mga lugar na nasa ilalim ng general at modified community quarantine.