10 pang COVID-19 patients sa Las Piñas, gumaling

Sampu pang pasyente ang gumaling sa Coronavirus Disease 2019 sa Lungsod ng Las Piñas.

Base sa ulat ni City Health Office (LPCHO) Chief Dr. Ferdinand Eusebio, kabilang sa mga gumaling ang:

57-anyos na babaeng abogado at isang 35-anyos na babaeng doktor, na kapwa gumaling at residente sa Bgy. Pulanglupa Dos;

32 years old na babaeng nurse sa Bgy. Pulanglupa Uno;

80-anyos na babaeng retiree mula Pamplona Uno;

Edad 28 na empleyada na taga-Pamplona Dos;

41 years old na babaeng dietary aide sa Daniel Fajardo;

2-taong gulang na babae sa Almanza Dos;

26-anyos na lalaking engineer sa Talon Tres;

Edad 21 na lalaking medical technologist mula Almanza Uno; at

22-anyos na lalaking nurse na taga-Elias Aldana.

Ani Dr. Eusebio, tuluy-tuloy ang pagsasasagawa ng swab testing sa mga frontliners at residenteng nagpakita ng ilang sintomas ng COVID-19 kung saan target na ma-test ang 150 hanggang 200 kada araw.

"Sa isinasagawa po nating contact tracing na ating natukoy at na-interview ay agad silang ini-schedule ng swab testing upang malaman kung nahawa ang mga ito matapos makasalamuha ang isang pasyenteng nagpositibo sa virus. Sa ngayon, nasa 90% na ang ating naisalang na sa swab test," pahayag ni Dr. Eusebio.

Samantala,ikinatuwa naman ni Mayor Mel Aguilar ang naitalang panibagong paggaling ng kanyang kababayan na senyales ng epektibong pagtugon ng Las Piñas Government sa COVID-19 cases sa lungsod.

Matatandaan na batay sa datos ng Department of Health (DOH), isa ang Las Piñas City sa pitong lungsod sa Metro Manila na nakapagtala ng pinakamabagal na transmission rates ng COVID-19 base sa bilang ng mga araw para magdoble ang infection rate sa 7.16 days.

Pinakamatandang babae sa Spain, nakarekober sa covid-19

Sa edad na 113, si Maria Branyas, ang pinakamatandang babae sa Spain na hindi nagpagupo sa sakit bagkus ay nakarekober sa mapanganib na coronavirus o covid-19.

Nanatili si Branyas ng ilang linggo sa kanyang isolated room sa nursing home sa Olot, na nasa northeastern region ng Catalonia, matapos makaranas ng mild symptoms ng Covid-19. Subalit, nitong linggo lamang ay idineklara na siyang magaling ng mga doktor.

Matapos malampasan ang sakit, masayang nasabi ni Branyas sa local Catalan television, "very good", tungkol sa nararamdaman niya sa ngayon.

Labis din ang pasasalamat ni Lola Branyas dahil sa patuloy siyang nabubuhay sa tulong ng mga nag-aalaga sa kanya, aniya "with very good people and in good company."

Sa hiwalay na video na inilabas ng newspaper na La Vanguardia, isang nars ang nagtanong kay Lola Branyas kung ano ang masasabi niya tungkol sa virus.

"It's a very big shame for everybody," sabi niya.

"As to understanding where it came from, and how and why, it seems to me that very few people know that."

Samantala, isinilang si Branyas sa San Francisco noong 1907. Nagdesisyon ang pamilya niya na bumalik na sa Spain noong 1915, matapos na ang kanyang ama, na isang journalist ay magkasakit ng tuberculosis na kalaunan ay namatay.

Ayon sa anak niyang si Rosa Moret, hindi nagkaroon ng kahit na anong matinding sakit ang kanyang ina (Branyas) at wala rin siyang matandaang nabalian ng buto o napilayan man lang ang nanay niya. Dalawang dekada na masayang namumuhay si Branyas sa nursing home.

Gayunman, hindi pinapayagan ang mga kamag-anak ni Branyas na makita siya magmula pa noong March 4, na sana ay ipagdiriwang nila ang kanyang kaarawan. Sa ngayon, naghihintay ang relatives ni Branyas na mabigyan ng clearance para siya ay madalaw na muli.

20 pulis positibo sa COVID-19, EPD headquarters naka-lockdown

Isinailalim sa lockdown ang Eastern Police District (EPD) headquarters sa Pasig City matapos magpositibo sa COVID-19 ang may 20 pulis nito.

Ayon kay EPD Director Brig. Gen. Johnson Almazan, ang lockdown ay upang mabigyang daan ang gagawing disinfection operation sa kanilang headquarters.

Ang lockdown na nagsimula ngayong araw ay tatagal aniya hanggang sa Linggo.

Sinabi ni Almazan na ang mga pulis na nagpositibo sa virus ay naka-quarantine na.

Ang EPD ang nakasasakop sa mga Lungsod ng Pasig, San Juan, Mandaluyong at Marikina.

Matatandaang ang Camp Karingal, na headquarters naman ng Quezon City Police District (QCPD) ay isinailalim din sa lockdown matapos magpositibo ang 13 pulis nito sa COVID-19.

Samantala, nabatid na mayroon ng 179 pulis sa bansa ang nagpositibo sa virus na pawang mga kabilang sa frontliner sa laban sa COVID-19.