Mga vendors, puwede na sa MECQ

Maaari nang makabalik para magtinda ang taho at balut vendor sa ilalim ng modified enchanced community quarantine basta't sundin pa rin ang social distancing.

"Alam ninyo kasi kung pinapayagan na 'yung paglabas sa bahay para mag-exercise, tumakbo, magbisikleta, so sa tingin ko po pupuwede na basta huwag lang silang magkumpol-kumpol... iyan po ang iniiwasan natin,” sabi ni Presidential Spokesman Harry Roque.

Una nang napaulat na maaaring makuha sa pamamagitan ng respiratory droplet ang Coronavirus Diseases 2019 kaya magiging bahagi ng new normal ang social distancing at ipinagbabawal pa rin ang mass gathering hangga't wala pa ring bakuna laban sa COVID-19.

Sa kasalukuyan, nakapagtala ang Pilipinas ng 11,876 COVID-19 cases habang 2,337 ang nakarekober at 790 naman ang namatay.

Mahihirap na pamilya sa ilalim ng GCQ, gusto pa rin tulungan ni P-Digong

Gusto pa rin ni Pangulong Rodrigo Duterte na mabigyan ang 23 million low-income families sa ilalim ng general community quarantine (GCQ) at enhanced community quarantine (ECQ) ng ikalawang bugso ng cash subsidy.

Ayon kay Presidential Spokesman Harry Roque, nais ni Pangulong Duterte na humanap ng pondo ang budget department na maaaring ma-realign upang mapasama ang lahat ng mahihirap sa emergency subsidy.

"Ang una niyang sinabi sa akin, sabihan si Secretary Wendel Avisado ng DBM, ang ginamit po niyang salita, ‘tuliin’, tuliin nang mabuti 'yung mga budget ng mga line agencies para malaman kung ano

'yung mga pondo na pupuwede ma-realign at ang gusto talaga ni Presidente, bagamat pinag-aaralan pa, ay mabigyan ng ayuda lahat ng 23 million, whether be it GCQ or ECQ,” sabi ni Roque sa isang panayan.

Nais din umano ng Pangulo na hilingin sa Kongreso na tulungan siya na makahanap ng pondo para sa buwan ng Mayo.

“Pangalawa, pinarating din po niya sa Kongreso, tulungan n'yo po ang ating Presidente kung paano niya mabibigyan ng ayuda ang lahat ng 23 million [families],” wika ng kalihim.

"Pangatlo, nabanggit pa niya na magsisimula na siyang magbenta ng mga propiedad ng gobyerno at meron siyang isang nasabing property, ayaw ko po muna isapubliko pero sabi niya, 'yun siguro ang sisimulan nating ibenta para maibigay sa ayuda,” dagdag ni Roque.

2 milyong estudyante sa private lilipat sa public o magda-drop out dahil sa COVID-19 crisis

Tinatayang dalawang milyong estudyante mula sa mga private schools ang inaasahang lilipat sa mga pampublikong eskuwelahan o di kaya'y magda-drop out dahil sa epekto ng covid-19 crisis.

Ito ang inihayag ni Joseph Estrada, managing director ng Coordinating Council of Private Educational Associations (COCOPEA), sa pagdinig ng Senado.

Ayon kay Estrada, bumaba ng 25% ang enrolment rate sa mga private schools bago pa man nagsimula ang covid-19 pandemic.

Habang ngayong darating na school year ay inaasahan nilang bababa pa ito ng 50 porsiyento.

Isa sa mga maaaring dahilan dito ang epekto sa trabaho ng marami.

Matatandaan na simula nang magpatupad ng quarantine ang pamahalaan ay ipinag-utos din ang pagsasara pansamantala ng mga non-essential industries sa Luzon.

Sinabi naman ni Senate Committee on Basic Education, Arts and Culture Chair Sherwin Gatchalian, na inaasahan na ang dagsa ng mga lilipat sa public school sa pagbubukas ng klase. May polisiya kasi ang Department of Education na dapat ay nasa 20 estudyante lang mula sa 30 hanggang 40 sa isang classroom para matiyak ang social distancing.

Pinag-aaralan na sa Kongreso ang pagpapalawig sa Government Assistance to Students and

Teachers in Private Education (GASTPE) Program na nagbibigay ng cash aid sa mga guro at estudyante.

Tiniyak naman ni Education Undersecretary Jesus Mateo na pinag-aaralan nila kung paano maa-accommodate ang paglipat ng milyong estudyante sa mga pampublikong eskuwelahan.

Umapela naman ang COCOPEA sa pamahalaan na isama ang private school teachers sa social amelioration program.