Mga traysikel sa Quezon City, balik-operasyon na

Pinayagan nang magbiyahe simula ngayong araw ang mga pampasaherong traysikel sa Quezon City makalipas ang dalawang buwan na ipinagbawal ang operasyon dahil sa enhanced community quarantine.

Alinsunod sa ipinalabas na mga panuntunan ng modified enhanced community quarantine ng Quezon City government, ang mga traysikel lamang ang papayagan na makabiyahe.

Kinakailangang sumunod ang mga drayber at opereytor sa itinakdang mga regulasyon sa pagbiyahe ng traysikel.

1. Isang pasahero at isang drayber ng traysikel lang ang pinapayagan.

2. Bawal ang angkas.

3. Dapat ay mayroong transparent na barrier o harang sa pagitan ng motorsiklo at sidecar.

4. Dapat ay nakausot ng facemask, gloves at iba pang gamit sa pag-iingat ang drayber.

5. Regular ang paglilinis o pag-disinfect sa tricycle unit.

Hinihikayat din ang mga tricycle driver na sumailalim sa COVID-19 test.

Samantala, kinukonsidera ng lokal na pamahalaan na magbago ng fare matrix sa mga traysikel sa panahon ng MECQ.

Mga tricycle sa Pasig, balik-pasada simula sa Lunes

Magbabalik-operasyon ang mga tricycle sa Pasig City simula sa Lunes, Mayo 18.

Ayon kay Mayor Vico Sotto, inaprubahan ng Department of the Interior and Local Government (DILG) ang panukalang panuntunan ng Pasig-LGU para makabiyahe na ang mga tricycle.

“Ang pagpayag sa mga tricycle ay makakatulong na solusyunan ang kakulangan ng mobilidad sa paraan na may social distancing pa rin,” ayon pa sa alkalde.

Sa inilabas na infographic ng Pasig-Public Information Office, isang pasahero lamang ang papayagan sa kada tricycle. Hindi naman kasama rito ang mga pasahero na kailangang umalalay sa pasyente.

Magkakaroon din ng barrier sa pagitan ng driver at pasahero.

Kailangang mag-disinfect sa mga tricycle dalawang beses sa isang araw.

Maliban dito, isang pasahero lang din ang papayagan sa mga private tricycle. Mayroon dapat ditong nakalagay na “Not for hire” signage.

Maaaring makapasada ang mga tricycle driver simula alas-5:00 ng madaling-araw hanggang alas-12:00 ng hatinggabi.

'Troll armies' ni Duterte, imbestigahan! — De Lima

Inihirit ni Senator Leila de Lima na maimbestigahan sa Senado ang ulat na ginagamit ang pera ng bayan para pondohan ang operasyon ng ‘troll armies’.

Inihain ni De Lima ang Senate Resolution No. 410 para maimbestigahan ang mga pag-aaral sa ibang bansa na nagpaliwanag kung paano umano gumagamit ang administrasyong Duterte ng ‘troll farm’ para sa propaganda at pagpapakalat ng mga maling impormasyon.

“[There is a need] to conduct an inquiry into the reports of public funds being spent to pay and maintain online trolls to distort and manipulate online information in various social media platforms in order to influence public opinion and political outcomes,” pahayag ng mambabatas.

Nabanggit din sa resolusyon ang pahayag ng US-based human rights group na Freedom House na binabayaran umano ng P500 kada araw ang ilang online users sa Pilipinas para sa operasyon ng mga pekeng social media accounts na sumusuporta kay Pangulong Duterte.