OFWs na tumakas sa quarantine facilities, positibo sa COVID-19 — PCG

Isiniwalat kahapon ng Philippine Coast Guard (PCG) na may nagpositibo sa tumakas na mga overseas Filipino workers (OFWs) mula sa mga hotel na nagsisilbing quarantine facilities.

Sinabi ni Commodore Armand Balilo, tagapagsalita ng PCG ma kumikilos ngayon ang Intelligence Division ng PCG para matunton ang nakatakas na OFWs mula sa hotel sa Metro Manila.

Nangangamba ang PCG na makahawa pa at lalong kumalat ang COVID-19 dahil sa pagtakas ng mga OFWs, na hindi naman niya matukoy pa kung ilan.

Nabatid na ang nakatakas na mga OFWs ay saka lamang umano dumating ang resulta na may nagpositibo sa COVID-19 kaya hindi umano alam ng mga ito na may dala na silang panganib sa kanilang mga pamilya, kaibigan at kung sinu-sino pa ang makakahalubilo sa kanilang pinuntahang komunidad.

Kaugnay nito, iniutos na ni PCG Commandant Admiral Joel Garcia ang pagtugis at contact tracing sa mga nakatakas para kunin at muling i-hold sa quarantine facility.

Nagbabala na rin ang PCG sa OFWs na nananatili pa sa quarantine facilities na huwag umalis at sa halip ay sumunod sa mga ipinatutupad na proseso kahit nahihirapan at naiinip na sila dahil kung hindi ay mahaharap sila sa kaso dahil sa paglabag sa quarantine protocol.

Marami na rin ang naisailalim sa polymerase chain reaction (PCR) testing ng Philippine Red Cross at hinihintay na lang ang resulta.

Ang PCG ay kabilang sa Sub Task Force Group for the Repatriation of OFWs na naatasang mangasiwa at magpatupad ng mandatory 14-day quarantine period ng lahat ng repatriated land-bases at sea-based OFWs.

Batay sa Inter-Agency Task Force for the Management of Emerging Infectious Diseases (IATF) Resolution No. 23 Series of 2020 na inisyu noong Abril 13, 2020, ang Sub-Task Group ay pamumunuan ng Department of Transportation (DOTr) at Overseas Workers Welfare Administration (OWWA).

Bahagi ng Sub Task Force Group, na nasa ilalim ng National Task Force-Task Group on Response Operations, ang PCG, Department of Labor and Employment (DOLE), Department of Health (DOH), Department of Foreign Affairs (DFA), Department of Interior and Local Government (DILG), Department of Tourism (DOT), Bureau of Quarantine (BOQ) at ang Philippine National Police (PNP).

Mga mall, dinagsa sa unang araw ng MECQ

Dinagsa ng mga mamimili ang ilang mall na nagsimula na sa kanilang partial operation ngayong araw sa gitna ng umiiral ng modified enhanced community quarantine sa National Capital Region (NCR).

Maliban sa mga grocery at botika, nakabukas na rin ang mga tindahan ng damit, sapatos, hardware at petshops sa loob ng mall.

Kanina ay ininspeksyon ni Joint Task Force Covid Shield Chief Lieutenant General Guillermo Eleazar ang ilang nagbukas na malalaking mall para matiyak na nakasusunod ang mga ito sa health protocols ng gobyerno.

Ayon kay Eleazar, kailangan pa ring panatilihin ang social distancing at iba pang safety measures kontra COVID-19 sa operasyon ng mall.

Sa guidelines ng Inter-Agency Task Force para sa operasyon ng malls at shopping centers, limitado ang papapasukin sa loob ng mall at babawasan din ang entrance na bubuksan sa mga customer.

Kailangan ding may regular na mga guwardiya at iba pang personnel ng mall na mag-iikot para masigurong nakasusunod sa social distancing.

May isang step na pagitan at hindi magkakalapit ang pagsakay sa escalator ng mall.

Hanggang 26 degree Celsius lang ang air conditioning sa mall at walang libre WiFi.

Inabisuhan na rin ang mall owners sa pagsuspindi ng kanilang sale events, marketing events at iba pang promotions na makahihikayat ng maraming tao.

Liquor ban sa Marikina, inalis na

Inalis na ng pamahalaang lungsod ng Marikina ang pag-iral ng liquor ban.

Ayon sa Marikina Public Information Office, pinirmahan ni Mayor Marcy Teodoro ang Ordinance No. 64 Series of 2020 na naglalayong payagan muli ang pagbebenta at pagbili ng mga nakakalasing na inumin.

Gayunman, papayagan lamang ang pag-inom sa loob ng bahay para masunod pa rin ang social distancing measures at iba pang health and safety protocols sa COVID-19.

“In pursuant to City Ordinance No. 64 Series of 2020, the lifting of the Liquor Ban in the City of Marikina is effective today. Online delivery services of alcoholic beverages and liquors are likewise allowed during this period,” pahayag pa ng Marikina PIO.