Telecom at media networks, tumulong sa alternatibong pagtuturo

Iminungkahi sa sektor ng edukasyon na gamitin ang teknolohiya upang paghandaan ang alternatibong paraan ng pagtuturo sa gitna ng COVID-19 crisis.

Ayon kay Sen. Bong Go, dahil sa patuloy na hadlang sa physical mobility ng mga mamamayan ang banta ng COVID-19, hinihikayat ang sektor ng edukasyon na bumuo ng mga bagong pamamaraan kung paano makapagtuturo habang sumusunod sa physical distancing.

Ganundin ang mga posibleng online o distance learning programs para sa mga estudyante.

Kasabay nito ay hinimok din ang pribadong sektor, partikular na ang telecommunication companies at media networks na tumulong sa pamamagitan ng pagpapahintulot na magamit ang kanilang platforms para sa educational purposes.

“Gamitin ang teknolohiya na available para sa distance learning tulad ng pagkakaroon ng virtual classrooms. May airtime rin na allotted for educational programs ayon sa batas, puwede po itong gamitin bilang alternative mode of teaching and learning,” dagdag pa ng mambabatas.

Tinutukoy ni Go ang RA 8370 o ang Children’s Television Act of 1997 na nagsasaad na “a minimum of fifteen percent (15%) of the daily total air time of each broadcasting network shall be allotted for child-friendly shows within the regular programming of all networks granted franchises or as a condition for renewal of broadcast licenses hereinafter, to be included as part of the network’s responsibility of serving the public”.

125 pang Immigration personnel, gumaling sa COVID-19

Karagdagan pang 125 Immigration personnel ang nagnegatibo sa COVID-19.

Ayon kay BI Commissioner Jaime Morente, nakatalaga ang 125 Immigration personnel sa Ninoy Aquino International Airport (NAIA).

Nagsagawa aniya ng ikalawang batch ng rapid antibody-based testing para sa mga nakatalagang Immigration personnel sa NAIA noong Biyernes, May 15, para maiwasan ang pagkalat ng COVID-19

sa ahensiya.

Una aniyang isinagawa ang pagsusuri sa mga nakatalaga sa NAIA at sa main office ng BI.

Plano na rin aniya nilang magsagawa ng pagsusuri sa iba pang tanggapan ng BI sa buong bansa.

Matatandaang noong Abril, 206 Immigration officers sa NAIA at 150 personnel sa main office ng BI ang negatibo rin sa nakahahawang sakit.

Border lockdown sa Soccsksargen, extended hanggang July 31

Palalawigin pa hanggang Hulyo 31 ng kasalukuyang taon ang umiiral na lockdown sa mga border o hangganan at iba pang daanan papasok sa Region 12 o Soccsksargen.

Sa gitna ito ng patuloy pa ring banta ng Coronavirus Disease 2019 (COVID-19) sa rehiyon. Ayon kay General Santos City Mayor Ronnel Rivera, nagdesisyon ang Soccsksargen Regional Inter-Agency Task Force (RIATF) on COVID-19 na patuloy na pairalin ang border lockdown bilang bahagi ng pag-iingat na kumalat pa ang sakit.

“We will still not allow passenger buses and other public utility vehicles, and ordinary people to come in and out of the region,” ayon sa alkalde.

Pumayag din umano ang mga lokal na opisyal sa rehiyon sa nasabing hakbang bunsod ng paglobo ng kaso ng COVID-19 partikular na sa Davao Region.

Ang Soccsksargen (Region 12) ay binubuo ng mga lalawigan ng North at South Cotabato, Sarangani at Sultan Kudarat; at mga lungsod ng General Santos, Koronadal, Tacurong at Kidapawan.