P11-m cash assistance para sa mga estudyante, ipamimigay na

Photo courtesy of City of Las Piñas

Tinanggap na ng Las Piñas School Division ang P11 milyong cash assistance para sa 11,000 graduates mula sa mga pampublikong eskuwelahan sa lungsod.

Personal na tinanggap ni acting Las Piñas City School Division Superintendent Dr. Joel Torrecampo ang tulong pinansiyal para sa nakapagtapos sa nakaraang School Year 2019-2020.

Bawat graduate ay tatanggap ng P1,000 at liham na pagbati mula kay dating Mayor Vergel "Nene” Aguilar.

Ayon kay Mayor Imelda ‘Mel’ Aguilar, kabilang sa mapagkakalooban ng cash aid ang mga graduate students mula sa elementary, senior high school at Dr. Filemon C. Aguilar Memorial College (DFCAM).

Sa datos ng lokal na pamahalaan, nasa 8,401 ang nagtapos sa elementarya, 2,173 sa senior high school at 284 graduates naman sa DFCAM.

Ang mga principals sa mga nasabing paaralan ang mangangasiwa ng pamamahagi ng cash aid sa mga graduates.

SolGen Calida, rumesbak kay Coco Martin

Niresbakan ni Solicitor General Jose Calida ang Kapamilya actor na si Coco Martin kaugnay ng pagsisentimyento nito sa social media nang iutos ng National Telecommunications Commission (NTC) ang paglalabas ng cease and desist order laban sa broadcast network.

“If I had not been the Solicitor General, I would have called his bluff and make him eat his words,” ani Calida.

Binanggit ni Calida ang mga naunang pahayag ni Martin na “Kapag ang pamilya ko kinanti, kahit sino ka pa, lalaban ako ng patayan sa iyo kahit patayin mo pa ako.”

“Maraming maraming salamat Solicitor General Jose Calida at sa bumubuo ng National Telecommunications Commission sa kontribusyon niyo sa ating bayan! Tinatarantado ninyo ang mga Pilipinas!” dagdag pa na pahayag ni Martin na tinukoy ni Calida.

“It appears that he feels he can solve the problems the same way as he solves them on screen, with macho bluster and bravado,” ayon kay Calida.

Sa kanyang pagdalo sa joint hearing ng committees on Legislative Franchises at Good Government and Public Accountability kaugnay ng inihihirit na prangkisa para sa ABS-CBN, sinabi rin ni Calida na ginamit ng ilang celebrities ng ABS-CBN ang kanilang impluwensiya para guluhin ang mga isyu laban sa broadcast network at humakot ng suporta ng publiko para rito.

“Stars and celebrities have taken to social media to rail against what they perceived to be oppression on the part of the government. In desperation, they would want to use they influence over their multitudes of fans to muddle the issue and drum up support for their network,” diin pa ni Calida.

Hirit ng kongresista... Walang nagdidikta para kontrahin ang ABS-CBN

Itinanggi ni Sagip Partylist Rep. Rodante Marcoleta na may nagkumpas sa kanila para kontrahin ang pagbibigay ng prangkisa sa ABS-CBN Corporation.

Ayon kay Marcoleta, ang tumatayong kinatawan ng mga tutol sa ABS-CBN franchise renewal, kahit si Speaker Alan Peter Cayetano ay hindi nagkumpas o nagdidikta sa kanila ng mga dapat panindigan.

Nauna rito, sa joint hearing ng Legislative Franchises at Good Government committees ay isa-isang nagbigay ng kanilang sponsorship speech ang mga kongresista na nagtutulak na mabigyan ng prangkisa ang network.

Iginiit din ni Marcoleta na hindi pinuwersa ang ABS-CBN na magsara kundi kusa itong nagsara matapos magpalabas ng cease and desist order ang NTC at sana ay nilabanan aniya ng network ang kautusan sa legal na paraan.

ABS-CBN dumipensa

Iginiit ni Carlo Katigbak, ang presidente at CEO ng ABS-CBN Corporation na isang Pilipino si Gabby Lopez na unang nag-may-ari ng ABS-CBN.

Hindi rin aniya isinuko ng Pamilya Lopez ang pagmamay-ari ng ABS-CBN at hindi ito ibinenta sa iba.

Inimbitahan naman si Lopez para magpaliwanag sa mga kongresista kaugnay ng isyu ng kanyang citizenship.

Enrollment, puwede sa internet, text o tawag

Nagsimula nang umarangkada ang enrollment sa mga pampublikong paaralan sa bansa simula kahapon, Hunyo 1, sa kabila ng nagpapatuloy na banta ng covid-19.

Gayunman, ayon kay Education Usec. Diosdado San Antonio, online muna at wala munang physical enrollment sa unang dalawang linggo ng enrollment period.

Mula Hunyo 1 hanggang 15, maaari aniyang gawin ang enrollment sa pamamagitan ng internet, texting o tawag sa telepono.

Maaari lamang aniyang magtungo ang mga magulang sa mga paaralan matapos ang Hunyo 15 para sa iba pang katanungan o paglilinaw hinggil sa enrollment.

Pero paaala ni San Antonio, dapat sundin ang mga pinaiiral na health protocols, gaya ng physical distancing at pagsusuot ng face masks.

Kaugnay nito, sinabi ng opisyal na kasabay ng enrollment ay pasasagutin din ang mga magulang sa survey hinggil sa mode of learning na nais nila para sa kanilang mga anak sa panahon ng new normal.

Ang enrollment period ay tatagal hanggang sa Hunyo 30. Habang ang klase ay magbubukas naman sa Agosto 24.

Una nang nilinaw ng DepEd na kahit magsimula na ang klase ay hindi pa rin sila magsasagawa ng 'face-to-face classes' hangga’t wala pang bakuna sa covid-19.