Hamon sa DOTr officials: Mag-commute!

Photo by Albert Calvelo

Hinamon ni Senador Nancy Binay ang mga transport executives sa gobyerno na mag-commute upang maranasan nila mismo ang mga guidelines na kanilang ipinatupad sa ilalim ng general community quarantine at upang maramdaman din ang hirap ng publiko sa transportasyon.

Ayon kay Binay, wala umanong malinaw na plano ang mga opisyal ng Department of Transportation (DOTr) kung saan nagdagdag lamang sa kaguluhan, pagdurusa at pagkalito ng mga mananakay.

"Ano ba talaga ang plano ng DOTr sa commuters? Three months under ECQ and still they have no clear plan in place. What happened to foresight? Mabuti sila’t aircon ang mga sasakyan,” ani Binay.

“Eh kung subukan kaya ng mga opisyal ng DOTr mag-commute mula sa kani-kanilang bahay papasok sa opisina nila [sa Clark City o Ortigas]? Dapat maramdaman nila ang hirap na pinagdadaanan ng mga commuter. They won’t be able to plan well if they don’t feel and understand the people’s daily struggles,” sabi ng senadora.

Naniniwala rin si Binay na hindi handa ang gobyerno sa ilalim ng ng senaryo ng GCQ dahil wala aniyang sapat na mga bus o pampublikong transportasyon papunta sa mga manggagawa na papasok at uuwi mula sa trabaho.

“Napaka-unfair sa commuters na ‘yung mga private vehicles walang restrictions bumiyahe. Napakalimitado ng choices nila. DOTr knew that Metro Manila and the rest of the regions will soon be transitioning to the new normal,” hinaing pa ni Binay.

"They knew that 30% of those in NCR will start going to work by June 1 — tapos ang idi-deploy eh truck ng libreng sakay which compromise and breach all health protocols particularly physical distancing,” saad ng senadora.

"Hindi po lahat ng pupunta sa trabaho eh sa EDSA o sa Commonwealth dumadaan. ‘Yung pagba-ban ng jeepneys sa kalsada ay unrealistic, anti-commuter at anti-worker,” wika pa nito. “Obviously, DOTr is favoring a certain segment of the mass transport sector, while ignoring and isolating the biggest public transport segment which the majority of the commuting public depend on,” sabi ni Binay.

“When you exclude the jeepneys from the equation, you also have abandoned 250,000 families — and their children are the ones who suffer the most,” dagdag pa niya.

Dine-in sa mga resto, fast food puwede na sa MGCQ

Pinayagan na ng Inter-Agency Task Force on Emerging Infectious Diseases ang dine-in services sa mga fast food outlets sa mga lugar na nakasailalim sa modified general community quarantine pero hindi pa rin ito full capacity.

"Pinayagan na po ang dine-in operations pero hindi po nangangahulugang piyesta at inuman na. At sa ngayon po ang dine-in ay para lamang sa MGCQ," sabi ni Presidential Spokesman Harry Roque.

"Sa mga lugar na dineklara na nasa ilalim ng modified general community quarantine, dine-in restaurants ay pinapayagang mag-operate nang 50% capacity simula June 1, 2020. Pero sa lugar na nasa ilalim ng GCQ, pakihintay po ang announcement para sa mga date ng reopening. So nag-hihintay pa po tayo kung kailan puwedeng magkaroon ng dine-in sa GCQ areas," wika pa ni Roque.

Aniya, kailangan pa rin sumunod sa minimum public health standards protocol at nagbantang ipasasara ang outlet na hindi susunod sa itinakda ng Department of Trade and Industry at Department of Tourism na siyang maglalagay ng post audit mechanism.

Inilahad din ni Roque ang health protocols na itinakda ng DTI para sa pagbubukas ng dine-in services tulad ng pagbabawal sa buffet, at regular sanitation sa mga high contact areas.

Matatandaang ang mga lugar na nakasailalim sa MGCQ simula June 1 hanggang June 15 ay ang Cordillera Administrative Region, Regions I (maliban sa Pangasinan), IV-B, V, VI, VIII, IX (pwera sa Zamboanga City), X, XI (maliban sa Davao City) at XII, CARAGA, at ang Bangsamoro Autonomous Region in Muslim Mindanao.

Habang ang Metro Manila naman at nalalabing bahagi ng bansa ay nakasailalim na sa GCQ.

Palugit sa pagbabayad ng upa, in-extend pa

Magsisimula na sa araw na binawi ang enhanced community quarantine (ECQ) o sa araw nang magbukas ng negosyo o magbalik sa trabaho ng empleyado ang 30-araw na palugit o grace period sa pagbabayad nito ng upa.

Ipinalabas ng Department of Trade and Industry (DTI) ang bagong memorandum circular 20-29 kahapon na nag-aamiyenda sa naunang abiso nito patungkol sa grace period sa mga nangungupahan sa residential o commercial unit.

Sa lumang memorandum circular, magsisimula ang 30-day grace period sa huling due date ng pagbabayad ng renta na pasok sa panahon ng pagdedeklara ng ECQ.

Pero ayon kay DTI Undersecretary Ruth Castelo, binago na ito at pinasisimulan ang palugit sa petsa na naalis ang community quarantine.

Hindi rin umano dapat patawan ng interest o tubo, multa o iba ang charges ang hindi nabayarang upa noong panahon ng ECQ.

May opsyon din aniya ang tenant na magbayad ng anim na buwang installment matapos ang 30-day grace period.

Kinakailangan lamang na lumagda ito ng promisory note na nagpapahayag na handang magbayad ng installment sa upa sa loob ng anim na buwan.