Pangarap na makapagnegosyo at matapos ang ipinatatayong bahay, matutupad next year

ni Maestro Honorio Ong @Kapalaran Ayon Sa Numero | September 6, 2024

Dear Maestro,

Matagal na akong tumataya sa lotto. Gusto ko na kasing ipatapos ang bahay namin na nasimulan noong January 2022. 

Sa ngayon, luma at nilumot na ang haligi at dingding na hollow blocks dahil kinapos kami sa budget.

Sana mabigyan n’yo ako ng masuwerteng numero sa lotto para mapatapos na namin ang ipinapagawa naming bahay. 

Maestro, balak din sana naming magnegosyo ng tindahan. Bagay ba sa aming mag-asawa ang negosyong ito? October 13, 1974 ang birthday ko, habang February 5, 1971 naman ang mister ko.

Umaasa,

Jackilyn ng Banaba, San Mateo, Rizal

---

Dear Jackilyn,

Ang birth date mo ay 13 o 4 (ang 13 ay 1+3=4) at ang zodiac sign mo ay Libra, habang ang birth date naman ng mister mo ay 5, na may zodiac sign na Aquarius ay nagsasabing suwerte nga kayo sa negosyo, lalo na ang mga kalakal na may kaugnayan sa pagkain, gayundin ang mga produkto na may kaugnayan sa sari-sari store at grocery. Puwede rin sa inyo ang negosyong bigasan at iba pang basic need o mga produktong pang-araw-araw na kailangan ng mga tao. Sa nasabing negosyo, roon kayo uunlad hanggang sa tuluyang yumaman at umasenso

Samantala, bukod sa sarili mong numero na 13 o 4 at 5 naman si mister, mapalad ka rin sa lahat ng numerong may sumatotal na 3, 7 at 9, tulad ng 12, 21, 30, 16, 25, 34, 18, 27, 36, 45 at iba pang kauri nito.

Puwede mo ring subukan ang 4, 15, 23, 28, 35 at 40, ganundin ang 1, 19, 22, 31, 37 at 41. Maaari ka ring humugot ng kumbinasyon mula sa Cabalistic of Knowledge, 918/ 254/ 124/ 277.

Upang masigurado ang malaking panalo, maghanap ka ng lotto outlet na pula ang dingding o rehas. Ang nasabing lotto outlet ang magpapatama sa iyo ng jackpot sa takdang panahong inilaan ng kapalaran.

Sa pagnenegosyo, ‘wag ding kalilimutang gumamit ng matitingkad na kulay tulad ng pula at apple green, habang iwasan naman ang mapusyaw o matatamlay na kulay.

Sa sandaling nasunod n’yo ang mga simpleng rekomendasyong inilahad, tiyak ang magaganap sa 2025, sa edad mong 51 pataas habang 54 naman ang iyong mister, uunlad na ang inyong negosyo, matutupad na ang inyong pangarap, hanggang sa tuluyan na kayong yumaman at makapagpagawa sa isang tahimik na lugar at masarap tirahan ng isang bago, mas malaki, maganda at magarang bahay.

Deads na deads pa rin sa ex… Kasalukuyang nobyo, dapat seryosohin dahil swak sa isa’t isa

ni Maestro Honorio Ong @Kapalaran Ayon Sa Numero | September 4, 2024

Dear Maestro,

May boyfriend ako ngayon, kaso kaibigan lang ang turing ko sa kanya dahil parang mahal ko pa ang ex-boyfriend ko. Hindi ko talaga alam kung sino mas ka-compatible ko, ‘yung ex ko o ang boyfriend ko? Ang birthday ng boyfriend ko ay February 7, 1994 at ‘yung ex-boyfriend ko naman ay isinilang noong May 28, 1993, habang ako naman ay isinilang noong March 14, 1994. 

Sana’y mabigyan n’yo rin ako ng advice para mas maging maligaya ang lovelife ko. 

Umaasa,

Anne Lyn ng Maligaya, Cabiao, Nueva Ecija

Dear Anne Lyn,

Sa madaling salita, ikaw ay isinilang sa petsang 14 o 5 (ang 14 ay 1+4=5) sa destiny number na 4 (3+14+1994=2011/ 20+11=31/ 3+1=4), sa zodiac sign na Pisces, habang ang kasalukuyan mong boyfriend ay may birth date na 7 sa destiny number na 5 (2+7+1994=2003/ 20+03=23/ 2+3=5) sa zodiac sign na Aquarius.Samantala, ang ex-boyfriend mo ay may birth date na 28 o 1 (ang 28 ay 2+8=10/ 1+0=1) sa destiny number na 1 rin (5+28+1993=2026/ 20+26=46/ 4+6=10/ 1+0=1) sa zodiac sign na Gemini.Ibig sabihin, malinaw ang tugon, ang tunay mong ka-compatible ay ang kasalukuyan mong boyfriend, sapagkat kapareho mo siya ng destiny number.Dagdag pa rito, ang Pisces na zodiac sign mo ay tugma sa birth date niyang 16 o 7 at ang zodiac sign naman niyang Aquarius ay tugmang-tugma sa destiny number mong 4.

Kaya ‘wag ka nang mag-alinlangan pa sa kasalukuyan mong boyfriend, kesyo friend lang turing mo sa kanya at mas mahal mo pa ang ex mo. Sa halip, mula ngayon ay seryosohin mo na ang kasalukuyan mong boyfriend, sapagkat sa ganyang paraan lamang kayo magkakaroon ng sariling pamilya. Ang lalaking isinilang noong February 7, 1994, ang tiyak mong makakasama habambuhay.

Para umunlad at suwertehin sa buhay… Maiksing buhok, susi upang magbago ang takbo ng kapalaran

ni Maestro Honorio Ong @Kapalaran Ayon Sa Numero | September 2, 2024

Dear Maestro,

Bakit kaya sa tuwing mag-a-abroad ako ay palaging nagkakaaberya? 

Noong 2023, aalis na sana ako, pero hindi ako natuloy dahil bigla naman akong nagkasakit. 

Nakapag-abroad naman na ako ngayong taon, kaya lang hindi ko naman natapos ang aking kontrata at napauwi rin agad ako. 

Nakakapagtaka lang, dahil ganu’n din ang nangyari sa kapalaran ng mister ko. Malakas naman ang kumpanyang pinapasukan niya at mapo-promote na sana siya, ang kaso naudlot iyon dahil biglang nag-lockdown. 

Naguguluhan tuloy ako sa buhay namin ngayon. Kaya naman naisipan kong sumangguni sa inyo dahil gusto kong mawala ang mga kamalasang nangyayari sa buhay namin. Kaya sana ay matulungan n’yo kami alang-alang na lamang sa aming mga anak. 

Maestro, sa paanong paraan kaya mawawala ang kamalasan at kailan kaya kami magsisimulang umunlad?  

Ang birthday ko ay February 5, 1989, habang August 14, 1985 naman ang mister ko.

Umaasa,

Eva ng Malanday, San Mateo, Rizal

---

Dear Eva,

Kapansin-pansing kapwa kayong Taong Singko (5) ng mister mo. Kung saan, ikaw ay isinilang sa petsang 5, habang ang mister mo naman ay isinilang sa petsang 14 o 5 (ang 14 ay 1+4=5), na nakakatuwa ring makitang pinagkalooban kayo ng magandang lagda o maayos na pirma. Ibig sabihin, may magaganda pang kapalaran ang tiyak na darating sa inyo. Pero hindi mo pa ito pinapapasok o pinapatuloy sa inyong bahay o sa inyong buhay.

Magagawa mong papasukin ang suwerte at magagandang kapalaran kung sisimulan mo na ngayon ang mga ganitong pamamaraan: Una, silver o kaya ay metallic blue ang dapat ninyong gamiting kulay. Sa ganyang paraan, unti-unting gaganda ang inyong kapalaran. Bukod sa silver at metallic blue, puwede n’yo rin gamitin ang kulay na gray, aluminum o stainless.

Pangalawa, sa parte mo naman, mapalad ka pagdating sa batong amethyst, habang ang batong sardonyx naman ang suwerte para sa mister mo, higit lalo kung ang mga batong nabanggit ay ipapalamuti sa silver na singsing.

Pangatlo, kailangang lagyan n’yo rin ng bahagyang pagbabago o inobasyon ang iyong lagda, partikular ang letrang “m” buhayin mo ito at lagyan mo ito ng mahabang paa na dapat matapos sa pa-straight line. Sa ganyang paraan, tuluy-tuloy na darating ang mga paparating na suwerte at magandang kapalaran sa inyo.

Pang-apat, maikling buhok lang ang dapat dahil ang mahabang buhok ay hindi tugma sa maganda n’yong kapalaran. Sa madaling salita, kung iiklian o ipapuputol n’yo ang inyong buhok, tiyak na magsisimula na ring umasenso at gumanda ang inyong buhay.

Pero dapat hanggang batok o leeg lang upang magningning nang todo ang inyong aura na siyang sasagap ng mas marami pang magagandang kapalaran.

At panghuli, mapalad kayong mag-asawa sa tuwing sasapit ang petsang 5, 14, 23, 8, 17, 26, 9, 18 at 27, higit lalo kung natapat ang mga petsang iyan sa araw ng Miyerkules, Sabado, at Biyernes. 

Kusa namang iigting ang mabuti n’yong kapalaran mula sa ika-23 ng Disyembre hanggang ika-23 ng Pebrero, mula sa ika-23 ng Hulyo hanggang ika-23 ng Setyembre.

Sa sandaling nasunod n’yo ang mga simpleng rekomendasyong inilahad sa itaas, tiyak ang magaganap, mawawala na ang mga kamalasang inyong nararanasan, at mapapalitan na ito ng suwerte at mas marami pang magagandang kapalaran.  Kasabay nito, tuluy-tuloy ding uunlad ang inyong buhay. 

Ayon sa Decadens ng Kapalaran, magsisimulang mangyari at maganap ito sa susunod na taong 2025, sa edad mong 36 pataas, habang 40 pataas naman si mister.