Mga basic rule na dapat malaman tungkol sa panliligaw

ni Maestro Honorio Ong @Kapalaran Ayon Sa Numero | September 12, 2024

Dear Maestro,

May nililigawan akong babae ngayon, at tawagin na lang natin siya sa pangalang ‘Calley’. Isinilang siya noong October  29, 2000, habang July 16, 1999 naman ang birthday ko. 

Base sa mga natutunan ko sa inyong artikulo, tugma at compatible kami ng babaeng nililigawan ko dahil isa siyang Scorpio, habang ako naman ay isang Cancer. 

Ayon sa inyo, ang Cancer at Scorpio ay parehong may elementong tubig, habang swak din ang aming birth date na 29 at 16 sa Numerology, tama ba ako? 

Kaya lang may pinoproblema ako, bukod kasi sa akin ay may isa pang nanliligaw sa kanya, na may zodiac sign na Virgo at birth date na September 16. Ibig sabihin, pareho kaming 7 ng lalaking manliligaw niya, dahil sa pagkakaalam ko ay ganito ito kinokompyut, 1+6=7. 

Ang isa ko pang napansin ay close na sila, kaya minsan ‘di ko maiwasan ang magselos na baka siya ang magustuhan ni Calley. 

Ano ba ang dapat kong gawin at ano ba ang maipapayo n’yo? Sana matulungan at mabigyan n’yo ako ng tips kung paano at ano ang dapat kong gawin para hindi ako maunahan ng karibal ko. Sa katunayan, mahal na mahal ko na siya ngayon.

Umaasa,

Aldrin ng Layac, Dinalupihan, Bataan

---

Dear Aldrin,     

Tama ka, medyo ka-compatible nga ng babaeng nililigawan mo na may zodiac sign na Scorpio, at birth date na 29 o 2 (ang29 ay 2+9=11/ 1+1=2), ‘yung lalaking karibal mo na may zodiac sign na Virgo sa birth date na 16 o 7, (ang 16 ay 1+6=7) na nagkataon pang pareho kayong may birth date na 16 o 7.

Dagdag pa rito, tugma rin sila pagdating sa Astrology. Kung saan, ang water type sign na Scorpio ay sadyang tugma rin sa earth type sign na Virgo. 

Habang ikaw naman ay may zodiac sign na Cancer sa birth date na 16 o 7, ‘wag kang mag-alala, dahil katugma mo rin ang babaeng nililigawan, ibig sabihin tugma at magkaka-compatible kayong tatlo.

Pero siyempre, dapat alam mo ang “basic rule” sa panliligaw. Kung saan, ang basic rule sa panliligaw ay kung sino ang mas buo ang loob, siya ang mas magtatagumpay. Kumbaga, hindi lang dapat puro paguwapuhan, bagkus dapat mo ring ipakita ang iyong husay, angas at diskarte. Kailangan buo rin ang iyong loob, hindi lang sa panliligaw, kundi sa lahat ng bagay upang hindi ka maargabyado o maisahan ng karibal mo.

Pero anuman ang kalabasan, isa lang ang natitiyak ko, kung ang nililigawan n’yong babae na may birthday na October 29, 2000 ay medyo maliit, maputi, mabilis maglakad, maliit ang sulat ng kamay at laging late dumarating sa mga lakad – ‘wag ka nang umasa, dahil tiyak na mas magugustuhan niya ang karibal mong isinilang sa zodiac sign na Virgo.

Subalit, kung ang nililigawan n’yong babae na may birthday na October 29, 2000 ay isang babaeng sexy, nangungusap ang dibdib, palabiro, kuwelang kasama, bungisngis, maganda ang labi, ‘di nale-late kapag may mga lakad kayo, mahilig sa pagpapaganda, may pagka-chubby, at mahilig mamasyal, - tiyak ang magaganap, ikaw ang magugustuhan niya at paniguradong ngayon taon din ito, sa buwan ng Setyembre o Oktubre, sasagutin ka na niya upang sa panahong ito ng iyong buhay, habang lumalapit ang masayang pagdiriwang ng Kapaskuhan, walang duda, sabay kayo Magsisimbang Gabi, habang naghaharutan at nagtatawanan sa isang sulok.

Ganu’n ‘yun, at ‘yun ang palagi mong magiging pattern. ‘Yung babaeng maharot at

kuwela kasama ang nakatakda sa iyong kapalaran, hanggang sa kayo na nga ang magkatuluyan at magsama sa pagbuo ng isang maligaya at panghabambuhay na relasyon. Nakatakda rin kayo biyayaan ng unang anak na babae, na siyang kukumpleto sa itatayo n’yong isang maligaya at panghabambuhay na pagpapamilya.    

Dalagang todo-kayod makahanap ng work, wa’ epek dahil pirma nababoy

ni Maestro Honorio Ong @Kapalaran Ayon Sa Numero | September 8, 2024

Dear Maestro,

Naisipan kong sumangguni sa inyo dahil gusto kong malaman ang kahulugan ng birth date kong 2 na nagkataon ding 2 ang destiny number ko. 

Hanggang ngayon kasi ay wala pa rin akong regular at matinong trabaho, gayung masipag naman akong mag-apply. 

Maestro, wala rin akong boyfriend sa kasalukuyan. Kailan din kaya ako magkaka-boyfriend at ano’ng zodiac sign din ba ang ka-compatible ko? 

Ang birthday ko ay July 2, 1991.

Umaasa,

Raquel ng Imelda District, Cabanatuan, Nueva Ecija   

---

Dear Raquel,

Tama ka, ikaw nga ay nagtataglay ng birth date na 2, sa destiny number na nagkataong 2 din, nangyaring ganu’n, dahil sa ganitong kompyutasyon ng iyong kaarawan, 7+2+1991=2000.

Dapat mo ring malaman na kabilang ang numerong 2 sa tinatawag na “weak number”, sapagkat ito ay under sa buntalang moon o buwan at alam naman nating lahat na ang moon o buwan ay nanghihiram lang ng init at liwanag sa araw.

Kaya sentido-komon na para suwertehin ang sinumang isinilang sa impluwensiya ng moon, dapat magkaroon siya ng katuwang sa buhay, maaaring bestfriend o karelasyon na isinilang sa numerong naiimpluwensiyahan naman ng haring araw o planetang sun. 

Ang mga taong naiimpluwensiyahan ng sun ang dapat maging kaibigan ng mga taong naiimpluwensiyahan ng moon o silang may mga birth date na 1, 10, 19, 28, gayundin silang may bitbit ng mga numerong 4, 13, 22 at 31.

Upang ika’y suwertehin, kailangang magkaroon ka ng karamay o katuwang sa buhay na may bitbit na numerong 1, 10, 19, 28, 4, 13, 22 at 31, gayundin silang may mga birth date na 7, 16 at 25. Kapag natagpuan mo sila, unti-unting bubuti at gaganda ang iyong kapalaran. Bukod sa birth date at destiny number na nabanggit, ka-compatible mo rin sila sa zodiac sign upang maging katuwang mo at para mas lalo kang suwertehin at magtagumpay.

Ang zodiac sign mong Cancer ay nagsasabing, ka-compatible mo rin silang may mga zodiac sign na Scorpio, Pisces, Leo, Virgo, Taurus, at Capricorn.

Dagdag pa rito, kapag nakahanap ka na ng kaibigan at boyfriend na may taglay ng nasabing mga numero at zodiac sign, kailangang bahagya mo ring pagandahin o baguhin ang iyong lagda dahil medyo nababoy ang iyong pima sa unahang bahagi.

Huwag mong pagpatung-patungin ang letrang “R” at “L” sa unahang bahagi ng iyong pirma. Paghiwa-hiwalayin mo ito at isulat nang medyo malaki at malinaw. Sa ganyang pirma, lilinaw, gaganda at sasagana ang iyong buhay.

Dagdag pa rito, matapos mong baguhin ang iyong lagda, magsuot ka rin ng paborable mong kulay na berde at pula. Paminsan-minsan, ang dilaw at itim ay puwede ring ipamalit sa berde at pula dahil ang nasabing mga kulay ang hihigop ng maganda at positibong kapalaran.

Ayon sa Decadens ng iyong Kapalaran, sa susunod na taon hanggang sa taong 2026, kung susundin mo ang mga simpleng rekomendasyong inilahad sa itaas, tiyak ang magaganap, sa edad mong 34 pataas, makakatagpo ka na ng isang regular trabaho, at magkaka-boyfriend ka pa na iyo ring mapapangasawa hanggang sa tuluy-tuloy kang magkaroon ng isang magtagumpay at maligayang pamilya habambuhay.

Gusto nang makaranas ng masayang pamilya… Single mom, dapat pagandahin ang sulat para lumigaya sa buhay

ni Maestro Honorio Ong @Kapalaran Ayon Sa Numero | September 7, 2024

Dear Maestro,

Naisipan kong sumangguni sa inyo para malaman ko kung ano ba ang mangyayari sa kapalaran ko, lalo na pagdating sa aking love life. 

Pansin ko kasing palagi na lang akong nabibigo sa pag-ibig. Sa katunayan, nakaka-tatlong boyfriend na ako, pero niloloko at iniiwan lang nila ako. 

Gusto ko nang mabago ang kapalaran ko kasi napapagod na rin akong magmahal.  

Sa ngayon, isa akong single mom dahil naghiwalay din kami ng live-in-partner ko. Sumama siya sa ibang babae matapos niya akong maanakan. 

Maestro, may pag-asa pa kayang mabago ang takbo ng aking kapalaran? 

Gusto ko nang lumigaya sa pag-ibig at makatagpo ng isang masaya at panghabambuhay na karelasyon o pamilya.  

Ang birthday ko ay October 4, 1999. 

Umaasa,

Luna del Sol ng Pajo, Alfonso, Cavite

---

Dear Luna del Sol,

Ayon kay Sigmund Freud, ang panaginip ay siya ring “royal road to the unconscious,” o sa mas simpleng paliwanag, matutuklasan mo ang laman ng unconscious mind or unconscious self mo sa pamamagitan ng pagtuklas ng natatagong kahulugan sa iyong panaginip. 

Ang lagda at handwriting ng isang indibidwal ay isa ring daan upang matuklasan mo ang natatagong laman ng unconscious mong isipan o isang tao.

Pero bakit ko nga ba ito nasabi? Nangyaring ganu’n, sapagkat pinaniniwalaang kapag maganda ang lagda o pirma ng isang indibidwal at tumugon ding ang kanyang magandang handwriting, posible o malaki ang tsansa, na siya rin ay may maayos at okey na unconscious mind o unconscious self, at ito rin ay indikasyon na okey o magandang kapalaran.

Kumbaga, ang signature, lagda o pirma ay siya ring representasyon o pagpapakilala natin sa lipunan. 

Tunay ngang makikita sa lagda at sulat kamay kung ano ang nasa loob ng ating isipan at tinatagong pagkatao, na sa bandang huli ay ito rin naman ang ating magiging takdang kapalaran.

Kaya kapag nababoy at nabubura o sadyang napakapangit ng lagda, ito ay nangangahulugan na ang nasabing indibidwal ay may magulo at hindi maayos na unconscious mind o unconscious self, kung kaya’t madalas siyang nabibigo sa buhay at sa anumang larangang kanyang ginagampanan.

Palagi kang nabibigo pagdating sa pag-ibig, dahil magulo at nababoy kasi ang iyong lagda. Dapat simpleng lagda lang, hindi ‘yung binurara at binaboy. Hindi rin dapat nagkakapatung-patong ang mga letra sa iyong pirma. 

Kaya para mabago ang laman o representasyon ng unconscious self mo, dapat mong baguhin ang iyong lagda. 

Ganito ang gawin mo, pagsumikapan mong makalikha ng simpleng “A” sa unahang bahagi ng iyong lagda na walang malaking bilog sa tuktok at sa paa.

Iwasan mo ring pumirma na tila pasubsob ang pagkakahapay. Sa halip, sikapin mong ituwid o kaya naman ay sikapin mong idiretso ang tindig ng mga letra. ‘Wag na ‘wag mong ihahapay ang iyong pirma sa direksiyong pakaliwa, dahil ang kaliwang direksiyon ay kawalang pag-asa. Kaya kung hindi mo maituwid ang mga letra at salita, puwede ring ihapay mo sa direksiyong pakanan. Dahil ang direksiyong pakanan naman ay sumisimbolo ng pag-asa, panibagong sigla at isang mas maaliwalas na umaga sa iyong buhay. 

Habang ang lagda naman na tuwid lang o diretso pati na rin ang sulat kamay na tuwid lang o diretso ay naglalarawan naman ng “kasalukuyan” na ibig sabihin nito, hindi ka nababagabag sa kahapon at lalo namang hindi ka nag-aalala sa kinabukasan. Sa halip, kampanteng nakatuon ang isipan mo sa kasalukuyan, kaya mas madali mong mapipitas ang isang tagumpay at mas maligayang pamumuhay.

Dagdag, dito dapat mo ring paghiwa-hiwalayin at ‘wag na ‘wag pagpatung-patungin ang mga letra sa iyong lagda.

At pang huli, kapag tinapos mo ang iyong apelyido sa iyong pirma, hindi mo na dapat pang ibalikwas pakaliwa ang dulong letrang “n”.  Sa halip, ituluy-tuloy mo lang na tapusin ang pirma sa direksiyong pakanan nang hindi na binabalik pa sa kaliwa ang ikalawang paa o kanang paa ng letrang “n”.

Sa ganyang pirma, hindi na nababoy, walang bilog sa tuktok ng letrang “A”,  hindi na naburara, at pasubsob sa direksiyong pakaliwa ang dulong stroke ng lagda, tulad ng naipaliwanag na, hindi pa huli ang lahat, sa takdang panahong inilaan ng tadhana, makakasumpong ka na ng isang wagas at panghabambuhay na kaligayahan sa piling ng isang lalaking nagtataglay ng zodiac sign na Gemini na may birth date na 7, 16 at 25, na nakatakdang mangyari at maganap sa taong 2025 sa buwan ng Hulyo, at sa edad mong 25 pataas.