Away ng 2 lider ng ‘Pinas, delikado kapag ‘ginamit’ ng mga dayuhan na nais manggulo

ni Ka Ambo @Bistado | Nov. 30, 2024

Gumagrabe na ang aktuwal na away ng mga Duterte at Marcos.

Naghahalo-ang-balat-sa-tinalupan!

-----$$$--

MAIIPIT dito si Sen. Imee Marcos.

Kailangan niyang mag-ala-Haring Solomon.

----$$$--

KUNG pinag-aawayan ng mag-asawa ang pangangalaga sa “anak”, kanino ito dapat maigawad? Sa isang magulang ba na nais itong “hatiin ang pisikal” na katawan ng bata?

O sa isang magulang na “magsasakripisyo” na iatras ang pagnanasa na maangkin ang anak maisalba lamang ang buhay ng anak?

----$$$--

SA Pilipinas, karaniwang nag-aaway o hindi nagkakasundo ang presidente at bise presidente.

Delikado ‘yan kapag “ginamit” ang away na ito ng mga dayuhan na nais guluhin ang bansa.

----$$$---

SA ngayon, posibleng manghimasok ang United States at China gamit ang mga espiya at traydor na mga Pinoy.

Puwedeng magpalit bigla ng lider — pero didiktahan ng superpower na lihim na aayuda sa kaguluhan.

-----$$$--

NAKAPAGTATAKANG walang nagtatangka na pumagitna at pag-aregluhin ang mga Marcos at Duterte.

Mas marami ang nagsulsol at nambubuyo sa away.

-----$$$--

ANG away ng dalawang mataas na lider ay posibleng magpabagsak sa ekonomiya.

Biktima sa away na ito ang ordinaryong Pinoy.

------$$$--

MAY ulat na isinasali ng Japan, South Korea at US ang Pilipinas na posisyunan ng malalakas at  sopistikadong missile launcher bilang preparasyon sa away ng Taiwan at China.

Hindi puwedeng diktahan ng dayuhan ang Malacañang kapag normal ang sitwasyon.

-----$$$--

SA gitna ng kaguluhan sa West Philippine Sea, kailangan ng Pilipinas ang isang very strong national leader.

Puwedeng isang strong leader na magiging puppet ng super power.

Puwede rin ang isang strong at charismatic leader na may sagradong pagmamahal sa bansa -- patriotiko at makabayan.

----$$$--

MASELAN ang sitwasyon, posibleng gumagalaw ang espiya ng mga superpower.

Mahalagang maging maingat at mapagmatyag ang mga lider at ordinaryong Pinoy.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Piso, bumabagsak, magbebenta ba uli ng ginto?

ni Ka Ambo @Bistado | Nov. 22, 2024

Painayagan na ng US na bombahin ng Ukraine ang Russia gamit ang malalakas na missiles.

Iyan na mismo ang World War 3.

-----$$$--

NAGKAKASUNDO ang lahat na may disposisyon at kumbiksyon si US president-elect Donald Trump.

Hindi sila nagkakalayo ng BFF niyang si Digong.

-----$$$--

NAPAKAHALAGA ng disposisyon at kumbiksyon upang maging mahusay at epektibong lider.

Kapag walang disposisyon at kumbiksyon ang isang lider, iyan ay isang mababaw na lider — aasa lang sa mga sipsip at makasariling tagapayo.

Mawawalan ng direksyon ang isang bansa sa isang lider na nagpapadikta sa kanyang sariling sirkulo.

-----$$$--

TAKOT ang Russia, North Korea at Iran kay Trump.

Hindi nila kayang “basahin” o tantiyahin ang kanyang mga desisyon.

-----$$$---

NAGPRUSISYON ang apat na bagyo kamakailan sa Pilipinas.

Kalbaryo ang inabot ng mga Pinoy.

-----$$$--

BUMABAGSAK ang halaga ng piso at lumalaki ang deficit.

Nauna nang nagbenta ng ginto ang Bangko Sentral para lang makaligtas sa krisis.

Magbebenta ba uli?

-----$$$--

HINDI nararamdaman ang “husay” ni Ralph Recto sa Department of Finance.

Maawa siya sa bansa, magkusa siyang magbitiw.

-----$$$---

KINUKUYOG ang mag-amang Duterte ng mga modernong propagandista.

Naiku-convert ng mga Duterte ang negatibo tungo sa positibo ang mga black propaganda.

Meaning, nagbu-boomerang ang palsipikadong impormasyon at konteksto patungo sa utak at resipiyente ng mga propaganda.

-----$$$---

AKTUWAL nang may maniobra ang 2028 presidential race.

Masyadong magastos dahil masyadong maaga.

-----$$$---

Bawal daw ang magarbong Christmas party.

Sabihin ninyo ‘yan sa buwan.

-----$$$---

TULOY ang prangkisa ng Meralco.

Magkano po, este mano po!

----$$$---

INANUNSYO na ang pagdating ng Amihan.

Salamat sa Habagat.

----$$$---

PINAYUHAN ang PAGASA na iayos ang weather forecast.

Kapag weather, kasingkahulugan ‘yan ng “hindi perpektong forecast”.

Kahapon lang ba kayo ipinanganak?

----$$$--

IPINAPANGALAN sa mga babae ang mga bagyo dahil sa pabago-bagong “behavior”.

Pero ngayon, ginamit na rin ang pangalan ng mga lalaki.

‘Yun nga lang, tila “transgender” ang mga nairekomendang pangalan — masusungit at pakembot-kembot ang emosyon!

-----$$$---

HINDI obligasyon ng PAGASA ang perpektong predikyon sa direksyon ng bagyo.

Ang trabaho lang nila ay “maglabas ng teknikal na datos” — at bahala na kayo na mag-analisa at magprediksyon.

----$$$--

ANG prediksyon ay kakambal ng walang katiyakang pagtaya.

Mahirap bang unawain ‘yan?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Sa termino ni Trump, masasakop ang mundo ng AI syndrome

ni Ka Ambo @Bistado | Nov. 9, 2024

Panalo na si US President-elect Donald Trump.

Malinaw ang mga ulat, natalo rin ang “fake news” mula sa US media.

-----$$$----

TUMPAK ang paniniwala ng kolum na ito na ang mga lumalabas na ulat sa mainstream media ng US ay mga palsipikadong balita.

Pinalilitaw nila na natatalo at deadlock ang dalawang magkatunggali sa presidential race.

Nang lumabas ang totoong resulta, landslide si Trump!

----$$$--

KUNG sinusundan ninyo ang kolum na ito, binanggit natin na ang “indicators” ng matatalong kandidato — ay ang “mismong away o sigalot” sa loob ng kampo.

Malinaw na maaga pa lamang ay sinisisi na agad ng mga maka-Harris si US President Joe Biden na kanilang kagrupo.

Malinaw na nararamdaman na nila ang “stress at pressure” ng pagkatalo.

-----$$$--

NAG-SECOND win si Trump at nagbanderang kapos si Harris.

Kung idinaan sa primary si Harris at maagang umatras si Biden — tiyak na iba ang resulta.

----$$$--

ISA pa, paano tatalunin ng apelyidong “Harris” ang apelyidong “Trump” sa US politics?

Icon na ang “Trump” at walang patol pa ang “Harris”.

-----$$$--

GANYAN din sa Pilipinas, paano tatalunin ng apelyidong “Robredo” ang apelyidong “Marcos”?

Mahalaga ang konotasyon ng bawat pangalan lalo pa’t mahalaga ang papel ng media at komunikasyon.

----$$$--

ANG tanong: May epekto ba sa Pilipinas ang Trump presidency? Ang sagot: Hindi malaki ang epekto, bagkus ay UBOD NANG LAKI.

-----$$$--

MAINIT ang Marcos-Duterte feud sa ngayon.

Alam nating BFF ni Digong si Trump, sa tingin ba natin — ay walang epekto? Magsalita kayo!

----$$$--

LUMALALA ang expose sa mga pagdinig sa Kongreso.

Pero, sa gitna nito, biglang mauupo si Trump.

Kwidaw!

----$$$--

HINDI lang ang Pilipinas ang apektado sa resulta ng US election, bagkus maging ang China, Russia, Iran, North Korea, Japan, Ukraine, buong Europe at buong Africa.

Ang pagbabalik ni Trump ay maihahalintulad sa kinatatakutang “The Big One”.

Mayayanig ang lahat.

-----$$$--

MAAARING maging negatibo o positibo ang resulta ng Trump presidency.

Dahil sa kanyang edad at sa serye ng bigong asasinasyon, posibleng hindi siya makatapos ng termino.

Nakakayanig at nakakahilakbot din ‘yan, ‘di ba?

-----$$$--

POSIBLE rin dito na magmitsa ang Ikatlong Digmaang Pandaigdig o mabingit sa panganib ng nuclear war ang buong daigdig.

Gayunman, ang Trump presidency ay buwelo rin sa dekada 2030s kung saan ibayong pag-unlad ng teknolohiya ang mararanasan.

-----$$$--

SA panahon ng termino ni Trump, masasakop ang buong daigdig — indibidwal, pamilya, gobyerno at negosyo ng artificial intelligence syndrome.

Marami ang hindi makakasabay, pero ang mga kabataang bihasa sa gadgets at apps, tulad ng mga Pinoy ang kokontrol sa daigdig kasabay ng Trump presidency.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.