Metro Mla., kung kelan niyayanig saka nagpapraktis ng earthquake drill

ni Ka Ambo @Bistado | Mar. 30, 2025

Tinamaan ng magnitude 7.7 earthquake ang Myanmar at Thailand.

Daan-daan ang namatay at gumuho ang hindi mabilang na gusali.

-----$$$--

Tiyak na magsasagawa ng earthquake drill sa Metro Manila.

Kung kailan lumilindol saka nagpapraktis.

----$$$--

SA totoo lang, ang 7.7 magnitude earthquake ay mahirap paghandaan. 

Kahit ang mga rescuer ay tiyak na magpa-panic at mababalewala ang preparasyon.

Paano mo paghahandaan ang pagguho ng napakataas na gusali tulad sa naganap sa Bangkok?

-----$$$--

PERIODIC o consistent dapat ang preparasyon.

Ibig sabihin, kailangan ay ipatupad ang earthquake drill tulad sa pag-awit ng “Lupang Hinirang” tuwing Lunes at retreat ng bandila tuwing Biyernes.

Malinaw na dapat isama sa “weekly program” ng bawat LGU ang earthquake at disaster drill — ‘yan ang tumpak — wala nang iba pa.

-----$$$--

AKTUWAL at pormal nang kumalas si Sen. Imee sa Alyansa. Iyan ang tama, dapat ay malinaw ang desisyon.

Disposisyon ang tawag diyan.

----$$$--

ANG disposisyon ay nakapundasyon sa malinaw na kumbiksyon.

Ang kumbiksyon ay ang paniniwala at paninindigan sa isang sitwasyon na sa paningin at pakiramdam ay iyon ang tumpak at nararapat.

----$$$--

WALANG sisisi sa iyo at maging ikaw ay hindi dapat magsisi kapag ang iyong desisyon ay nakabatay sa kumbiksyon — at iyan ay pinoproteksyunan ng lahat ng Konstitusyon sa balat ng lupa.

Kahit pa lumabas sa bandang huli na tila hindi naaayon sa moralidad o batas ang iyong prinsipyo at paninindigan — iyan ay pinagbubuwisan ng buhay.

----$$$--

NAGIGING martir, bayani at panatiko — dahil ang pundasyon ng kanyang aksyon at aktibidad ay nakabatay sa kanyang kumbiksyon.

Iyan ang sariling desisyon at disposisyong hindi idinidikta ng sinuman — kapatid, magulang o kahit kaibigan.

Ikaw, handa ka bang maging santo, bayani o martir?

Kailangang maunawaan mo ang kumbiksyon, desisyon at disposisyon!

----$$$--

SA pagboto dapat ay may desisyon, kumbiksyon at disposisyon ang bawat isa.

Puwedeng tanggapin ang biyaya, insentibo o kahit cash mula sa korup na kandidato.

Pero, ang dapat mong iboto ay kung sino ang paniniwala mong magbubunsod ng pagbabago at pag-unlad.

----$$$--

HINDI dapat nagpapadikta sa kinang ng salapi o sa pabor o sa impluwensya ninuman.

Magdesisyon ka batay sa iyong kumbiksyon at hindi sa dikta ng ibang tao.

Iyan ang disposisyon — at iyan ang biyaya ng isang demokratikong institusyon!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Mahihinang bansa tulad ng ‘Pinas, mahihirapang ipreserba ang soberanya

ni Ka Ambo @Bistado | Mar. 29, 2025

Dumating na si US Defense Secretary Pete Hegseth upang makipagmiting kay Defense Secretary Gibo Teodoro.

Walang duda, “giyera” ang pag-uusapan.

----$$$--

MAUGONG ang ulat na magdadala pa uli ng isa pang Typhon missile system ang US sa teritoryo ng Pilipinas.

Tiyak na papalag ang China.

----$$$--

AKTUWAL na soberanya ng bansa ang agenda.

Soberanya ng ‘Pinas na sinasakop ng China o soberanya ng ‘Pinas na sinasawsawan ng US.

Mas mainam sana kung soberanya ng ‘Pinas na malaya sa panghihimasok ng China at US.

----$$$--

Sa praktikalidad, ang mahihinang bansa gaya ng Pilipinas ay mahihirapang ipreserba ang soberanya nang hindi madidiktahan o pakikialaman ng malalaking bansa.

Isang halimbawa dito ang Ukraine, puwede bang sabihin ng Ukraine sa US na lumayas kayo at huwag ninyo kaming pakialamanan.

Hindi puwede.

----$$$--

SA totoo lang, ang isyu ngayon ay ang rare mineral deposit ng Ukraine na hindi malayong maisanla sa US — kapalit ng suporta kontra Russia.

Sa aktuwal, ang bundok-bundok na natural resources ng Pilipinas ay matagal nang ‘nasamsam’ ng mga dayuhan.

----$$$--

MASELANG isyu ang soberanya at dahil ang nag-uusap ay dalawang defense chief ng bansa --walang duda, iyan ang agenda.

Kung makikinabang ang Pilipinas o ang US — o parehong mabibiyayaan ang dalawang bansa?

Iyan ang dapat masagot.

----$$$--

KAPAG soberanya ang agenda at detalye ng usapan ay karaniwang “state secret”.

Nakataya dito ang seguridad ng bansa.

Mag-aantay lang tayo kung ano ang ipahayag ng Malacañang at ng Pentagon sa agenda ng mga kumperensiya.

----$$$--

SIYEMPRE, umaasa tayo na mas makikinabang ang Pilipinas sa alinmang usapan sa mga dayuhan.

Iyan ang ipagdasal natin nang walang patid.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

80th b-day ni ex-P-Duterte, buong mundo nagse-celebrate!

ni Ka Ambo @Bistado | Mar. 28, 2025

80th birthday ngayon ni Digong.

Extreme celebration si Tatay.

----$$$--

WALA sa hinagap ni Digong at ng kanyang pamilya na sa The Netherlands siya mag-ootsenta-anyos. 

At huwag ka, ipagdiriwang ang kanyang birthday sa malalawak na parke sa Pilipinas — at buong mundo — nang sabay-sabay.

Higit sa pangarap niya ang natupad.

-----$$$--

NAALALA natin ang isang dating presidential candidate na naging mayor pa at kongresista ay namatay nang mahulog habang nagkukumpuni ng bubong.

Ganyan din ang naging kamatayan ng isang lider ng militanteng grupo, nahulog mula sa bubong na kanyang inaatipan.

-----$$$--

ANG dalawang lider-mamamayan na ito ay nabingit ang buhay sa panganib ng serbisyo-publiko, at ang militanteng lider kung sakaling namatay sa gitna ng kilos-protesta o napatay ng pulis o military — ay tiyak na magiging martir.

Pero, nakakahinayang ang kanilang “pagkamatay” — sa isang walang kuwentang aktibidad o sitwasyon.

----$$$--

NAPAKASUWERTE ni Digong kapag binawian siya ng buhay sa loob ng karsel o kahit sa pag-uwi niya ay binawian siya ng buhay sa gitna ng kaliwa’t kanang demonstrasyon.

Mas makulay at makabuluhan ang kamatayan habang may ipinakikipaglabang adhikain kaysa sa tahimik na nagbabakasyon sa Davao at namatay sanhi ng ordinaryong sakit gaya ng diarrhea o dengue o trangkaso o pagkabangga ng motorsiklo.

-----$$$--

ANG kuwentong “Pagong at Matsing” ni Dr. Jose Rizal ay puwedeng magamit dito dahil dinampot si Digong upang ihagis ng karagatan kung saan lihim niyang nais malublob — ang isyu ng giyera kontra droga.

Tama, ang ilang komento na nagsasabi na “hindi dapat bawian ng buhay si Digong ngayon habang nasa loob ng karsel”.

----$$$--

Mas mainam umano ay magtagal pa si Digong sa karsel at magdusa.

Pero, ang pagong ay lihim na nagsasaya habang lumalangoy sa ilog matapos ihagis ng matsing.

-----$$$---

SA totoo lang, hindi si Digong ang tunay na isyu sa sitwasyon, bagkus ay ang posibilidad na maupo sa Malacañang ang kanyang anak na si Vice President Sara Duterte.

Sa 1.3 milyong Pinoy, sa ngayon — tanging si VP Sara — ang may pinakamalapit na tsansa na maging pangulo sapagkat siya ay No. 2 leader ng bansa — wala nang iba pa.

-----$$$---

SA ayaw at sa gusto natin, ang sitwasyon ni VP Sara ay kainggit-inggit dahil oras-oras ay siya ang pinag-uusapan.

Wala nang ganitong klase ng personalidad sa pulitika sa bansa ang may ganyang biyaya ng publisidad.

----$$$---

HARINAWA ay maging mapayapa ang ating bansa sa gitna ng maselang sitwasyong ito.

Hindi sinasadya ay napag-uusapan ang soberanya.

Kapag soberanya, kakambal niyan ang seguridad ng bansa.

----$$$--

AMINADO ang lahat na hindi inilalantad sa publiko ang ilang detalye kaugnay sa pag-aresto kay Digong.

Hindi na tayo dapat pang magtanong.

Mag-abang na lang tayo ng opisyal na pahayag ng Malacañang.

Minsan may nagsabi, mas mainam na manahimik kaysa sumawsaw sa masasalimuot na diskusyon.

‘Yan lang muna tayo, tipi-tipi-tipitin!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.