Hustisya, ibigay dapat sa Lapu-Lapu Festival victims

ni Ka Ambo @Bistado | Apr. 30, 2025

Nakakalungkot ang sinapit ng mga kababayan nating biktima ng trahedya sa Canada.

Shocked ang lahat.

Dapat ay bigyan ng mental health support ang mga biktima ng pananagasa sa Lapu-Lapu Festival.

----$$$--

TAMA lang na hikayatin ng Ang Probinsiyano Partylist ang Philippine Consulate sa Vancouver na ipaabot kaagad ang mental health support sa lahat ng biktima.Dapat ding bigyan ng psychological support maging ang pamilya ng mga biktima sa trahedya sa Vancouver, Canada na ikinamatay ng 11 katao at marami ang nasugatan.

-----$$$--

NAKIDALAMHATI mismo si Probinsiyano Partylist Representative Alfred Delos Santos sa mga biktima at pamilya ng mga ito.

Hiniling ni Delos Santos sa Department of Foreign Affairs (DFA) at Philippine Consulate General na magbigay kaagad ng mental health support.

----$$$---

“OUR thoughts and prayers are with the victims and families at this heartbreaking moment. We are one with the one million strong Filipino community in Canada and all over the world in lifting each other in prayers, kindness and action during this difficult time,” pakikiramay ni Delos Santos.

Nilinaw na hindi naiwaksi ng insidente ang pakahulugan ng selebrasyon ng kabayanihan ni Lapu-Lapu, isang lider sa Kabisayaan, bilang araw ng pagpupunyagi at pagkakaisa ng Filipino-Canadian community.

-----$$$---

“THE strength, resilience of Lapu-Lapu is very much present among us Filipinos, we pray for our kababayans in Canada to continue holding this in their hearts and minds,” ayon kay Delos Santos.

“We know the DFA and our Consulate in Vancouver are working hard to extend appropriate assistance to our kababayans there, we appeal for the inclusion of mental health support on top of finding justice for the victims,” aniya pa.

----$$$---

MAGING si PBBM ay nanlumo sa sinapit ng ating mga kababayan sa Canada.

Magmamarka ito sa kamalayan ng mga biktima, kanilang pamilya at sa sambayanang Pilipino.

----$$$--

IPINAKIKITA rin dito na ang buhay ang mga Pilipinong nasa ibang bansa ay walang katiyakan.

Nagbubuwis ng buhay ang mga overseas Pinoy mabigyan lang ng magandang buhay ang kanilang mga pamilya.

Sa kabila nito, patuloy ang kanilang pagmamahal sa kanilang bayan at maging sa mga bayani ng ating lahi — partikular kay Lapu-Lapu -- ang simbolo ng pagtatanggol sa soberanya ng ating Inang Bayan.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Sa anyo ng vote-buying, pinakagrabe ang pormang ‘ayuda’

ni Ka Ambo @Bistado | Apr. 29, 2025

Talamak ang aktuwal na vote-buying sa iba’t ibang anyo.

Marami nang reklamo ang tinanggap ng Comelec.

Inaaksyunan naman!

----$$$--

Tradisyonal na ang vote-buying sa Pilipinas.

Pinakagrabe rito ay ang pormang “ayuda” na mula sa mga incumbent o nakapuwesto na kandidato. 

Hopeless case ‘yan!

-----$$$--

LEHITIMO kasi o wala umanong nilalabag na batas ang pagbibigay “pabor” sa mga botante — kahit sa porma ng ‘cash’ at sa ‘anyo’ ng ayuda.

Isinalegal ito — ng matataas na opisyal ng gobyerno na siya rin namang mga kandidato.

Malinaw na dehado ang mga hindi nakapuwesto. 

----$$$--

MAY mga pagkakataon na nasisilat din ang mga incumbent kahit ubusin nila ang pondo ng gobyerno sa pag-impluwensya sa mga botante.

Sa aktuwal, walang sapat na pondo para “bilhin” ang boto ng lahat ng botante.

----$$$--

HINDI rin nakakatiyak ang mga incumbent na kapag tumanggap ng cash ang botante ay pangalan ng incumbent ang mamarkahan sa balota.

Diyan pumasok ang “argumento” na patas-patas pa rin ang proseso — dahil “sikreto” ang pagboto.

----$$$--

IISA ang malinaw, “immoral” ang kampanyahan sa Pilipinas bagaman nakakatakas sila sa batas.

Sa aktuwal, nakasalalay pa rin sa mga botante ang “wagas na karapatan” o diskresyon kung sino ang ihahalal.

----$$$--

PAANO natin makukuwestiyon ang resulta kung mayorya ng mga botante ay nais manatili sa puwesto ang mga mandarambong?

Ibig sabihin, kahit mandambong basta’t suportado ng botante tuwing eleksyon ay puwede sa “ating batas”.

Pero, sinasang-ayunan ba ‘yan ng Konstitusyon?

Malinaw ang sagot: Hindi.

----$$$--

ANG aktuwal na Saligang Batas ay pundamental o pundasyon ng mga iba pang batas na iiral.

Walang problema sa Konstitusyon, bagkus ang problema -- ay ang “batas” na ginagawa sa Kongreso.

----$$$--

KAPOS ang talas o kamandag ng mga implementing law upang maipatupad ang itinatadhana ng Konstitusyon o ang mismong esensiya ng probisyon dito.

Halimbawa, ang mismong lehistura ay dapat nakapokus lang sa paggawa ng batas at hindi sila dapat naglalaan ng pondo para sa sarili nilang proyekto.

-----$$$--

ANG pork barrel system ay isang proseso na naglalaan ng pondo kung saan binibigyan ng diskresyon ang mga mambabatas — senador at kongresista — sa implementasyon ng proyekto.

Ang mga proyekto ay dapat eksklusibo lamang sa mga ehekutibo tulad ng Pangulo, Pangalawang Pangulo, gabinete, gobernador, mayor at kapitan ng barangay.

-----$$$--

MALINAW na malinaw na hindi ganap na naipatutupad ang Konstitusyon dahil walang “moral” ang mga gumagawa ng batas.

Nakakambal na sa demokratikong institusyon ang korupsiyon kahit sino pa ang maupo sa Malacañang.

----$$$--

ANUMAN ang kahinatnan, mas dapat sisihin ay ang mga botanteng ibinoboto pa rin kahit garapalan ang pandarambong sa kanilang lokalidad.

Kahit alam ng mga botante na “hindi marunong gumawa ng batas”, ang kanilang paboritong kandidato — isinusulat pa rin nila sa balota ang mga pangalan nito.

-----$$$--

Sa kabuuan, ang kabulukan ng burukrasya ay nagsisimula at nagtatapos mismo sa mga botante.

Mahalagang mamulat ang mayorya ng mga botante — kahit kumakalam ang kanilang sikmura!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Cardinal Tagle, maging kauna-unahang Santo Papa sana!

ni Ka Ambo @Bistado | Apr. 28, 2025

Inihatid na sa huling hantungan ang labi ni Pope Francis.

Nagluksa ang buong mundo, lalo na ang mga Pinoy.

----$$$--

Llamado si Cardinal Luis Antonio Tagle na maging kauna-unahang Santo Papa mula sa pinakamalaking kontinente — ang Asya.

Sa Asia, ang Pilipinas — ang tanging Catholic nation.

----$$$--

MASASABI natin ang Pilipinas, ang Israel sa Asia.

Tulad ng Israel, suportado nang todo ng US ang Pilipinas.

Iyan ba ay destinasyon o suwerte-suwerte lang?

----$$$--

HUWAG ka, tulad sa Israel, hindi natitigil ang giyera at kaguluhan — ‘yan din ba ang magiging kapalaran ng Pilipinas?

Iyan ba ay isang prediksyon?

----$$$--

HABANG nagsasagawa ng joint military exercise ang US at Pilipinas, dumikit ang flotilla ng dambuhalang aircraft carrier ng China.

Ilang saglit lang, dumating naman ang mas dambuhalang Seven-Fleet ng US.

Aktuwal na praktis ito ng mobilisasyon sa panahon ng aktuwal na digmaan.

----$$$--

NOONG World War II, halos dalawang taong naokupa ng Japanese Imperial Forces ang teritoryo ng Pilipinas.

Halos 2 taon bago nakabalik at naisalba ng US ang Pilipinas.

----$$$--

HALOS dalawang araw lang ay nakadepensa at postura na ang US aircraft carrier kontra sa aircraft carrier ng China.

Ibig sabihin, sakaling magkagiyera sa West Philippine Sea, sa loob lang ng 2 oras

— nandito sa Pilipinas ang panaklolo ng mga Kano.

----$$$--

SA totoo lang, hindi dalawang oras bago makasaklolo ang US sa ‘Pinas, bagkus ay aktuwal nang nasa loob ng teritoryo ng bansa ang kanilang puwersang military.

Nasa Pilipinas na ang 2 sopistikadong missile launcher at destroyer ng US.

----$$$--

KUNG may pinakamalaking achievement ang Marcos Jr. administration, ito ay ang postura sa pagdedepensa ng soberanya.

Maibibigay natin ang kredit sa bar topnotcher na si Defense Secretary Gibo Teodoro.

Maliban kay Gibo, mayroon pa bang outstanding cabinet member si PBBM?

Sumagot kayo.

----$$$--

TUMPAK ba ang P20 kada kilo ng bigas na ipinopropaganda upang maibsan ang krisis?

Hindi po.

Simpleng propaganda lang na sumisira sa kredibilidad ng gobyerno.

----$$$--

KAPAG nag-i-import ng bigas, kasingkahulugan niyan ay may “shortage” sa suplay.

Ang solusyon ay hindi importasyon, bagkus ay malawakang pagtatanim.

----$$$--

DAPAT ay gayahin ng Department of Agriculture ang Department of National Defense.

Kung namamakyaw ng military hardware si Gibo, dapat ay namamakyaw ng heavy equipment na pambungkal ng panot ng bundok at idle lands ang DA.

Ibig sabihin, massive ang pagbubungkal ng lupa upang maging ricelands — para magkaroon ng surplus sa suplay ng bigas tulad sa panahon ni Marcos Sr.

----$$$-

BINAWASAN ng ekta-ektaryang industrial, commercial at housing complex ang agricultural lands pero hindi nila dinagdagan ang bukirin na dapat mataniman ng palay.

Hindi mapipigil ang industriyalisasyon kaya’t ang solusyon ay gawing productive ang mga bundok na pinanot ng mga illegal loggers.

----$$$

KAPAG binungkal ang mga bundok, masisilayan natin ang napakaraming “Banawe Rice Terraces” na winasak na rin ng modernisasyon.

Mapapalitan ang “Banawe” ng higit na malalawak at matulaing mga tanawin sa Luzon, Visayas at Mindanao!

Darami ang bigas, magkaroon ng trabaho ang mga nasa liblib na pook at rural areas!

----$$$--

BOLD ang konseptong iyan, pero iyan ang aktuwal na solusyon sa isang kritikal na sitwasyon.

Kapag binungkal ang mga idle lands, magkakaroon ng trabaho ang mga magsasaka at ang mga kabataan ay gaganahang kumuha ng kursong pang-Agrikultura.

----$$$-

SA DND, dagsa ang mga kabataang nag-a-apply na maging sundalo kaya’t dapat ay dagsa rin ang mga kabataang nais maging “agriculturist”.

Mas mahirap maging sundalo, kaysa maging government field workers sa larangan ng agrikultura.

----$$$--

TAGUMPAY si PBBM sa DND, bigo siya sa Agriculture.

Mauntog sana siya at i-overhaul ang DA.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.