Buhay isla sa ‘Pinas, tampok sa bagong MV ni Hyolyn

ni Eli San Miguel @K-Buzz | August 13, 2024

Screenshot from video: Hyolyn

Ipinakita ni Hyolyn ang kanyang island girl energy sa kanyang pinakabagong music video. Sa kanyang bagong single na “Wait,” itinampok ng K-Pop star ang magagandang tanawin ng isang isla sa Pilipinas habang sumasayaw sa talon at sa dalampasigan.

Nagkaroon din si Hyolyn ng mga eksena sa jeepney, kubo, tricycle, boxing gym, at sari-sari store. Sa oras ng pagsusulat nito, ang music video ay mayroon nang 1.4 million views, 40,000 likes, at 2,600 comments na pumupuri kay Hyolyn para sa pagpapakita ng kagandahan ng Pilipinas.

Unang naglabas ng teaser si Hyolyn para sa kanyang music video sa pamamagitan ng isang sexy photoshoot sa isang sari-sari store, na dinumog ng nakakatuwang mga comments, partikular na mula sa mga Pinoy fans.

Si Hyolyn ay dating miyembro ng K-Pop girl group na Sistar at ng subunit nito na Sistar19 hanggang sa kanilang disbandment noong 2017. Itinatag niya ang record label na Brid3 at opisyal na nagsimula ng trabaho sa label noong 2018.

ARMYs, itinanggi ang pagpapasimuno sa trending hashtag na #SugaChallenge

ni Eli San Miguel @K-Buzz | August 12, 2024

Photo: AP

Itinanggi ng mga fans ng BTS o mas kilala bilang ARMYs, ang pagpapasimuno sa #SugaChallenge bilang suporta sa pagkakasangkot ng BTS member na si Suga sa drunk driving.

Noong Agosto 6, nasemplang si Suga na kasalukuyang nagsasagawa ng kanyang serbisyo militar bilang social worker, habang siya’y nagmamaneho ng electric scooter sa Seoul.

Ayon sa pulis, ang resulta ng breathalyzer test ni Suga ay nagpapakita ng 0.227 percent na blood alcohol content, na sobrang taas kumpara sa license revocation level na 0.08 percent. Malapit nang ipatawag ng Yongsan Police Station sa Seoul si Suga para imbestigahan ang mga pangyayari sa kanyang pag-inom at ang dami ng alcohol na kanyang nakonsumo.

Sa X, umakyat sa trending ang #SugaChallenge kung saan ang mga gumagamit ng hashtag ay nag-post ng mga larawan na nagpapakita ng pag-inom ng alak sa kanilang mga sasakyan. Maging ang mga media sa Korea ay nag-ulat tungkol sa #SugaChallenge na sinasabing sinimulan ng BTS ARMYs.

Naglabas naman ng pahayag ang BTS ARMYs upang itanggi ang kanilang pagkakasangkot sa trend na #SugaChallenge.

“From BTS ARMY: In light of recent events, a number of individuals associated with various music fandoms…who have expressed unfavorable opinions towards BTS, have initiated a trend intended to ridicule a specific situation,” ayon sa pahayag na ibinabahagi ng mga BTS ARMYs sa Facebook at X.

Dagdag pa nito, “This trend entails the sharing of images portraying the consumption of alcohol within a vehicle, despite the fact that the initial incident did not occur in a car. It is important to note that although ARMY will continue their support for all seven members, ARMY was not involved in this trend, as it is essential to handle such matters with sensitivity and consideration for all parties involved.

Thank you. ARMY.” Bilang pagkontra sa #SugaChallenge, ginamit ng fandom ang mga hashtags na #FAKECHALLENGE, #Its_Not_ARMY, #조작된챌린지 #진짜아미아님 at #koreanmediabeprofessional.

Seventeen, magkakaroon ng world tour sa US

ni Eli San Miguel @Entertainment News | August 8, 2024

Photo: SEVENTEEN / FB

Inihayag ng K-Pop idol group na Seventeen na babalik sila sa US para sa kanilang bagong world tour sa Oktubre.

Gaganapin ng Seventeen ang kanilang “Right Here” world tour sa US, na pinamahalaan ng Live Nation, na magsisimula sa Oktubre 22 at 23 sa Allstate Arena sa Rosemont, Illinois.

Susundan ito ng mga concert sa Belmont Park, New York sa Oktubre 25 at 27; San Antonio, Texas sa Oktubre 31 at Nobyembre 1; at Oakland, California sa Nobyembre 5 at 6. Magtatapos ang tour sa Nobyembre 9 sa Los Angeles sa isang malaking pagtatanghal sa BMO Stadium.

Bago ito, ilulunsad nila ang world tour na pinamahalaan ng Live Nation, sa Oktubre 12 sa Goyang Stadium sa South Korea.

Ito ang magiging unang US tour ng Seventeen mula noong “Be The Sun” world tour, na nagtapos sa Newark noong Setyembre 2022.

Mula noon, nakamit ng Seventeen ang titulo ng best-selling K-Pop album of all time sa “FML,” na nakabenta ng higit sa anim na milyong kopya at naging best-selling album sa buong mundo noong nakaraang taon, ayon sa International Federation of the Phonographic Industry (IFPI).