Christmas shopping tips ngayong may pandemic

ni Justine Daguno - @Life and Style | October 10, 2020

Tradisyon na ng maraming Pinoy ang maagang paghahanda sa Pasko kung saan wala pa man sa mismong buwan ng nasabing selebrasyon ay sobrang nae-excite na sila sa pagplano o sa mga bagay na kanilang gagawin.

Marahil ay kaliwa’t kanan na naman ang mga pamilihan, kani-kanyang diskarte na rin sa pagsa-shopping. Ngunit dahil iba ang senaryo natin ngayon, kung saan may kinahaharap na pandemya ang buong mundo ay kailangang mas pag-isipan at prayoridad palagi ang kaligtasan.

Kaya naman, bago ang lahat ay narito ang ilan sa ating mga safety tips para sa mga magki-Christmas shopping ngayong panahon ng pandemic:

1. MAGING ALERTO. May pandemya man o wala, kailangang maging alerto sa lahat ng pagkakataon. Maging mapagmasid at palaging sumunod sa mga ipinatutupad na health protocols sa bawat establisimyento. Mag-doble-ingat dahil hindi lamang mandurukot o kawatan ang ating kalaban, kundi maging ang hindi nakikitang virus.

2. SIGURADUHING MAY LISTAHAN. Bukod sa sobrang useful ito para hindi mawala o makasunod sa budget, kapag may listahan ay siguradong iwas-hassle talaga. Alam agad natin ang mga kailangang bilhin, kaya naman siguradong mabilis tayong matatapos sa pamimili at hindi na masyadong mae-expose pa sa labas na pinakaiiniwasan natin.

3. ‘WAG KALIMUTAN ANG BASIC. Bago lumabas at magpaka-“tribute mode”, siguraduhin munang ready ang lahat ng basic ngayong ‘new normal’. I-check at ‘wag kalimutan ang facemask, face shield, alcohol o hand sanitizer, quarantine pass, gloves (optional), eco bag at sariling ballpen para sa pagsagot sa contact tracing form. Walang masama kung ‘OA’ ang pag-iingat, dahil hindi lamang ito para sa atin kundi para rin sa ating pamilya at kapwa.

4. MAG-ONLINE SHOPPING. Ang pag-o-online shopping pa rin ang da best na ideya ngayong may pandemic. Bukod sa hindi mas hindi tayo masyadong exposed sa labas ay nakatutulong din tayo sa iba na sa ngayon ay ito ang ‘source of income’. Siguraduhin lamang na mag-iingat sa mga modus na nauuso rin online.

Habang tumatagal ay papalapit na talaga nang papalapit ang Pasko. Pero muli, bago ang lahat ay safety dapat ang prayoridad natin. May kaunti mang pagluwag sa mga patakaran sa ating paligid, hindi tayo dapat magpakampante dahil iba pa rin ang nag-iingat. Gets mo?

Paano makatitiyak na safe at sulit ang bibilhing christmas décor?

ni Justine Daguno - @Life and Style | October 3, 2020

Sa kabila ng pandemyang nararanasan natin ngayon, buhay na buhay pa rin para sa iba nating kababayan ang diwa ng Kapaskuhan. Marami pa rin ang excited at natutuwang umpisahan ang Christmas decoration sa kani-kanilang tahanan.

At bilang bahagi ng nakasanayan nating tradisyon, paniguradong may mga nagbabalak na rin mamili ngayon. Pero bago ang lahat, make sure na unahin natin ang kaligtasan—sundin ang mga health protocols at tandaan ang ating mga tips sa pagbili ng mga Christmas ornaments o pamaskong pandekorasyon:

1. PILIING MABUTI ANG KLASE NG ORNAMENTS. Kung hindi naman kayo kabilang sa mga nagpapalit ng décor theme kada taon, mas oks kung pumili ng plastic ornaments kaysa glass o ceramic. Mas makakatipid tayo dahil mas mura ito at mas tumatagal pa, kaya hindi kailangang bumili nang bumili o recycle na lang ang mangyayari.

2. IWASAN ANG PAPER-BASED DÉCOR. Halimbawa nito ay parol na gawa sa papel o karton, tinsel, paper lamps etc. Bukod sa madaling masira ang mga ito kapag naka-display na, mahirap din ito itago o i-maintain kapag liligpitin na, dahil ang materyales nito ay hindi naman pangmatagalan. Kaya kung kinakapos sa budget, hindi talaga ito ideal.

3. PUMILI NG MAGANDANG KALIDAD NG RIBBON. Para naman sa mga ribbons, mas oks kung fabric wired ribbons ang pipiliin. Madali itong gawan ng design nang hindi basta nasisira ang materyales. Hindi tulad sa ibang typical ribbon na hanggang pambalot lang ng regalo at hindi puwedeng ipang-design bilang ornament dahil madali lamang masisira.

4. IKONSIDERA ANG SIZE NG DÉCOR. Bukod sa klase at kulay, ikonsidera rin ang laki ng mga bibilhing dekorasyon. Ito ay dahil iniiwasan nating may masayang kapag hindi naman sakto ang mga ito. Kaya naman bago pumunta sa Divisoria o saanmang pamilihan, make sure na may plano at listahan na kayo, at hindi ‘yun doon pa lang kayo magdedesisyon.

5. BUMILI NG CHRISTMAS LIGHTS NA MAY ICC STICKER. Gusto nating lahat ng safe na pagdiriwang ng Pasko. At dahil marami sa atin ang nagde-decorate ng Christmas lights, bago bumili ay siguraduhin munang legal at ligtas ito. Upang makasigurado, piliin ang may ICC o Import Commodity Clearance sticker dahil ibig sabihin, ang produktong ito ay nasubukan o tested ng Bureau of Philippine Standards.

Papalapit na talaga nang papalapit ang ‘ika nga, ‘most awaited season of the year’. ‘Wag ka ma-guilty kung nae-excite o ‘extra’ ang iyong ganap kahit pa may pandemya, oks lang mag-decorate lalo na kung magiging masaya ang inyong pamilya dahil d’yan.

Marahil, ang kasalukuyang taon ang isa sa mga pinaka-kakaibang pagdiriwang ng Pasko na mararanasan nating lahat. ‘Wag sana nitong maapektuhan ang tunay na diwa ng okasyong ito para sa atin. Gets mo?

Tips para ma-enjoy ang retirement nang ‘di umaasa sa anak

ni Justine Daguno - @Life and Style | October 1, 2020

Retirement ang isa sa mga stage ng buhay na pinakahihintay ng marami sa atin. Ito ‘yung pagkakataon kung saan sa wakas, ie-enjoy mo na lang ang buhay, pa-bakasyon-bakasyon na lang dahil wala nang stress sa work, napa-graduate na ang mga anak, at iba pa.

Pero, hindi lahat ay ganito ang kinalalabasan ng kanilang ‘retirement’, at ang dahilan ay walang sapat na ipon o hindi nakapag-ipon. Kaya ang ending, umaasa na lang sa mga anak, umaasa na lang sa sinuman na makapagbibigay sa kanila.

Well, anu-ano nga ba ang mga dapat gawin upang mae-enjoy ang retirement nang hindi umaasa sa ibang tao?

1. ‘WAG UMASA SA ANAK. Isang kaugalian nating mga Pinoy na dapat mabago ay ‘yung tipong ginagawang ‘retirement plan’ ang anak. Palalakihin, pag-aaralin at kapag nakapagtrabaho na ang mga ito, oobligahin na para tulungan tayo—in short, sa kanila na lang aasa. Well, sa ibang punto ay oks lang ito bilang “pagtanaw ng utang na loob”, pero paano kung hindi umayon sa plano ang lahat? Paano kung wala rin silang naipon o sapat na kita? Pare-pareho kayong ‘nganga’ niyan.

2. IPRAYORIDAD ANG PAG-IIPON. Bago gumastos sa luho, bisyo o kung anu-ano, siguraduhin munang may naitabi na para sa savings, emergency fund at retirement fund. ‘Wag maging ‘one day millionaire’ na kapag sumuweldo, gasta na lang nang gasta. Walang problema sa pag-e-enjoy sa perang pinaghirapan, pero dapat ‘wag itong i-enjoy nang pansamantala lang, kundi paabutin hanggang sa retirement period.

3. MAG-INVEST NANG TAMA. Kahit magdamag pa tayo mag-work bilang minimum wage earner, hindi ito sapat para punan ang lahat ng ating pangangailangan—sa kasalukuyan at sa future. Kaya naman, dapat matutunan nating mag-invest. Oks ito dahil kahit natutulog ka, gumagalaw ang iyong pera. Mag-research o humingi ng payo sa mga propesyunal o sa mga taong may sapat na kaalaman tungkol dito.

4. ‘WAG MAGING PADALOS-DALOS. Habang tumatanda, marami tayong gustong subukan—try ng ganito, invest sa ganyan. Puwede naman ‘yun, pero dapat nating tandaan na ang bawat desisyon ay may kasamang responsibilidad. Alamin munang mabuti ang isang bagay bago ito pasukin, palaging mag-ingat sa mga mapagsamantala. Walang may gustong mapunta lang sa wala ang bawat sentimo na pinaghirapan mo, dahil malaking ambag ‘yan para magkaroon ka ng magandang buhay-pagreretiro.

Aminin man natin o hindi, kasabay ng pagtanda ang kabawasan sa iba’t ibang kapasidad tulad ng energy, time, etc., kaya dapat palagi tayong nag-iisip nang maayos. Magkaanak man tayo o hindi, hindi magandang umaasa sa iba. Sa totoo lang ay masarap mag-retire nang hindi nakakaabala o nangpe-pressure ng iba. Gets mo?