Mga dapat gawin kung bet mag-travel kahit may COVID-19 pandemic

ni Jersy Sanchez - @Life & Style| June 27, 2021

Ngayong unti-unti nang nagluluwag ng quarantine protocols at travel requirements, for sure, marami na sa inyo ang nagbabalak magbakasyon dahil tiyak na na-miss n’yo ito last year. Agree?

Gayunman, hindi ibig sabihin nito ay basta-basta na lang tayong lalarga dahil may mga bagay tayong dapat tandaan at paghandaan para sa mas safe na travel ganap natin ngayong taon. Kaya ang tanong, anu-ano ang mga ito?

1. PROMO PA MORE. Ngayong unti-unting bumabangon ang sektor ng turismo, tiyak na maraming promo at deals d’yan. Basta mabusisi at matiyaga ka sa paghahanap, tiyak na may matitipid ka. Oks ding sumali sa travel communities o groups sa social media para more chances na makahanap ng promo.

2. CHECKLIST. Para sure na walang makakalimutan sa inyong lakad, mas oks gumawa ng checklist ng mga dapat gawin. Anu-ano ang mga dapat ilagay dito? Well, kasama na r’yan ang mga dapat bayaran bago kayo umalis at kung ano ang mga dapat bayaran pagdating. Gayundin, make sure na nakalista ang dapat bilhin o dalhin.

3. PACK WISELY. Tiyaking sapat ang mga dalang damit, gayundin ang personal na mga gamit. Siguraduhin ding dala ang mga kailangang papeles at dokumento tulad medical certificate o travel pass, mga resibo ng paunang bayad, pruweba ng reservation at voucher.

4. EXTRA CASH AT CARD. Bagama’t inaasahan na ang mga gastos tulad ng pagkain, pasalubong, libangan at biglaang gastos, ipinapayo pa ring magdala ng extra na pera upang makasigurong handa sa anumang gastusin. Oks din kung may dalang debit o credit card na puwedeng pagkunan ng panggastos kapag wala nang cash.

5. I-SECURE ANG BAHAY. Kung walang maiiwanan sa inyo, siguraduing secured ang inyong bahay bago kayo umalis. Puwede ring ibilin sa kamag-anak o pinagkakatiwalaang kapitbahay ang inyong bahay.

Mga beshies, sabayan ng doble-ingat ang ating bakasyon o travel dahil hindi natin dapat kalimutan na may virus pa rin sa paligid.

Isa pang paalala, palagi tayong sumunod sa mga umiiral na minimum health standards tulad ng pagsusuot ng facemask at face shield, tamang social distancing at pagiging tapat sa health declaration bilang pag-iingat sa COVID-19.

Kaya para sa mga ka-BULGAR nating ready to travel, ‘wag n’yong kalimutan ang tips na ito, okie? Stay safe!

Alamin: iba’t ibang paraan para i-train ang aso na ‘wag kumain ng basura

ni Jersy Sanchez - @No Problem | March 21, 2021

Shoutout sa mga dog owners d’yan!

For sure, naransan n’yo nang habang naglalakad kasama ang inyong aso ay bigla siyang kumuha ng basura at kinain ito. Kaasar, ‘di ba?

Well, ang pagkain ng basura ay hindi lang kadiri dahil puwede rin itong maging sanhi ng problema kung may makakain na toxic ang ating alaga.

Gayunman, may solusyon pa para maturuan ang ating pet na ‘wag nang kumain ng basura, at narito ang ilang paraan:

1. “LEAVE IT” COMMAND. Ayon sa mga eksperto, ang command na ito ay napaka-useful dahil ito ay nagbibigay ng signal sa ating alaga na itigil ang kanilang balak gawin sa basura. Ang pinakamagandang paraan para ituro ito ay ang pagte-train sa bahay kung saan mas kaunti ang distractions.Paano naman ito gagawin? Lagyan siya ng leash o tali kapag maglalakad at maglagay ng anumang gusto niya sa kanyang harapan tulad ng pagkain, treats o laruan. Kapag nilapitan niya ito, sawayin siya at higpitan ang paghawak sa leash para hindi niya ito maabot. Kapag sumunod siya, purihin at bigyan ng treat. Habang itinuturo ang “leave it” command, mahalagang gumamit ng high-value treats tulad ng maliit na piraso ng karne bilang reward dahil matututunan niyang mas rewarding ang pagsunod sa iyo kumpara sa pagkain ng basura.
   

2. PLANUHIN ANG RUTA. Kadalasan, ang mga kalsada rito sa atin ay may mga basura, kaya naman mas mabuting alamin ang mga daan na mas kaunti ang distraction, lalo na kung hindi pa nama-master ng iyong alaga ang “leave it”. Gayunman, kung medyo nasasanay na siya, oks ding dumaan sa mga kalsada na maraming basura bilang practice. Paalala, gumamit ng matibay at maiksing leash para mas malapit siya sa iyo at mas madali siyang makuha ‘pag nagtangka itong lumapit sa basura.

3. I-CLAIM ANG BASURA. Mas malaki ang tsansa na dedmahin ng aso ang basura ‘pag nagbigay ka ng signal na ang basura ay sa iyo. Ang paraang ito ay halos kapareho ng “leave it” command, pero kailangan mo ng body language para magbigay ng senyas ng iyong dominance. Para gawin ito, kailangan mong angkinin ang basura. Paano? ‘Pag nilapitan ng iyong alaga ang basura, hawakang mabuti ang leash para hindi niya ito maabot. Harangan ang basura gamit ang iyong katawan at ilayo ang aso sa pamamagitan ng “leave it”, saka bigyan ng treat bilang reward.

4. IPOKUS ANG ATENSIYON NG ASO SA IYO. Ang pagkuha ng atensiyon ng aso habang naglalakad ay nakatutulong upang maiwasan ang pagdampot at pagkain ng basura. Ito ay dahil matututunan din niyang mas rewarding ito sa halip na magpa-distract. Para ituro ito, hintaying tingnan ka ng iyong alaga habang naglalakad kayo. Sey ng experts, ‘pag nagbibigay ng atensiyon ang mga aso sa kanilang amo nang hindi sinasabihan, gawin itong big deal at bigyan siya ng reward. Gayundin, the more na binibigyan ng reward ang aso ‘pag binibigyan ka niya ng atensiyon, palagi niya itong gagawin. Halimbawa, habang naglalakad kayo at may nakita kang basura, kuhanin agad ang kanyang atensiyon sa pamamagitan ng pagtawag sa kanyang pangalan o pakitaan ng treat habang dumadaan sa basura.

Talagang challenge ito para sa mga dog owners, kaya naman kailangan n’yo ng mahaba-habang pasensiya para mas ma-train ang inyong furbabies.

Tiyaga lang dahil para rin naman ito sa kanyang ikabubuti para iwas-sakit at dagdag na kalat. Copy?

Dyowang-dyowa? Read mo ‘to!... 4 tips kung gusto nang magka-love life

ni Jersy Sanchez - @No Problem | March 9, 2021

Sa dinami-rami ng single sa mundo, bakit wala ka pang dyowa? Char! Ha-ha-ha!

Kidding aside, for sure, marami r’yan ang ‘ika nga, dyowang-dyowa dahil siguro, sawa nang maging mag-isa o ‘yung iba naman, gusto lang talaga ng makakasama.

Pero mga besh, hindi sapat na dahilan ang pagiging atat magka-dyowa para pumatol na lang sa kung sino, ha? Siyempre, mahalagang kilala n’yo ang isa’t isa at dapat ay nagkakasundo kayo sa mga bagay-bagay.

Kaya para sa mga ka-BULGAR natin d’yan na sawa na sa single life, narito ang ilang bagay na dapat n’yong tandaan bago mag-dyowa:

1. GOOD MANNERS. Sino ba namang may ayaw ng good manners, ‘di ba? Kung gusto mong magka-dyowa, kailangan marunong kang rumespeto sa ibang tao mula sa kanyang political at religious beliefs hanggang sa kanyang mga hilig at desisyon. Isa ito sa mga unang hakbang para ma-establish ang iyong imahe sa iyong potential partner.

2. SIGURADUHING HANDA MAKIPAGRELASYON. Hindi madali ang pagkakaroon ng boyfriend o girlfriend. Siguraduhin mong handa ka sa papasukin mong commitment para iwas-heartbreak. Siguraduhin mong naka-move on ka na sa past relationship mo para makapag-commit ka nang buo sa iyong makakarelasyon. Mahirap kasi ‘yung in love siya sa iyo, pero ikaw ay may feelings pa sa iba. ‘Wag selfish, besh!

3. MAHALIN ANG SARILI. ‘Ika nga, paano ka magbibigay ng pagmamahal sa iba kung hindi mo mahal ang iyong sarili? Beshy, bago pumasok sa relasyon, make sure na mahal mo ang iyong sarili para alam mo ang iyong “worth”, gayundin ang mga bagay na deserve mo sa isang relasyon.

4. ‘WAG MARUPOK. Bagama’t nakakatawa ang term na “marupok”, sa true lang, hindi ito magandang maging ugali, lalo na kung tungkol sa pakikipagrelasyon. Tandaan na hindi lahat ng nagpapakita ng motibo ay seryoso. ‘Yung tipong, naging sweet lang sa ‘yo nang isang beses, mahal mo na agad. ‘Wag ganu’n, besh! Kilalaning mabuti ang tao o sinumang lumalapit sa iyo para alam mo kung ano ang pinasok mo.

Mga besh, hindi natin dapat madaliin ang pagkakaroon ng boyfriend o girlfriend. ‘Di ba, sabi nga nila, ang mga bagay na mabilis nating nakukuha o natatanggap ay mabilis ding nawawala? Hmmm… applicable rin kaya ito sa love life?

Well, para iwas-heartbreak at ‘yes’ to strong relationships, ‘wag n’yong kalimutan ang tips na ito sa oras na maging handa kayo sa pakikipagrelasyon. Keri? Good luck!