Nangangapa at struggle is real? Read mo ‘to! 7 tips sa pagpapatakbo ng negosyo

ni Jersy L. Sanchez - @Life & Style| October 26, 2021

Dahil sa pandemya, marami sa atin ang naghanap ng kani-kanyang diskarte upang patuloy na mairaos ang bawat araw. Isa na sa mga diskarteng nagbigay-daan sa marami nating kababayan ay ang pagtatayo ng negosyo. Mapa-online selling man ‘yan o maliit na tindahan, maraming pumatok.

Habang hataw ang negosyo ng iba, mayroon ding nangangapa dahil walang sapat na kaalaman sa pagnenegosyo. Pero worry no more dahil narito ang ilang tips para sa mga beshy nating nagsisimulang magnegosyo:

1.REALISTIC BUDGET. Ito ang no. 1 na kailangan dahil magsisilbi itong gabay para makagawa ka ng tamang desisyon sa pagbili. Makatutulong ang budget sa pagkakaroon ng kumpiyansa sa paghawak ng pera at higit sa lahat, kailangan nitong maging realistic o makatotohanan. Halimbawa, i-base sa aktuwal na sitwasyon ang budget tulad ng presyo ng bilihin, renta at utilities. Bagama’t kailangang magtipid at sumunod sa budget, tiyaking hindi maisasakripisyo ang mahahalagang bagay tulad ng supplies.

2. LISTA PA MORE. Bawat pumapasok at lumalabas na pera, dapat nakalista. Mula sa ingredients ng paninda mong merienda at kung anu-ano pa, lahat dapat ‘yan ay hindi makalimutang ilista. Tandaan, kapag nakakalimutan ang maliit na bagay, magugulat ka na lang sa laki ng nailabas mong pera. Kung mayroon kang katulong sa negosyo o empleyado, dapat alam din niya kung paano maglista ng gastos at kita.

3. PRIORITIES. Kailangang unahin ang mga bagay na hindi puwedeng i-kompromiso.

Halimbawa, kung may inuupahang puwesto, dapat secured na ang bayad sa renta, utilities at sahod ng empleyado. Habang nagsisimula, sanayin ang sarili na unahing bayaran ang mga ito dahil dito nagsisimula ang magandang negosyo.

4. BAYARAN ANG INUTANG. Halimbawa, kinulang ang iyong paninda kaya kailangan mong tumakbo sa palengke. Kaya naman kukuha ka muna sa kaha at sasabihing ibabalik na lang, pero ang ending, nakalimutan at hindi na naibalik. Tandaan, ang bawat sentimo na nasa kaha ay may pinaglalaanan, kaya ugaliing ibalik ang inutang para mapunta sa dapat paggamitan. Isang paraan para maiwasan ito, sanaying maglista ng hiniram na pera.

5. MAGING FLEXIBLE. Remember, oks lang baguhin ang budget. Ang kagandahan kasi nito, nakikita mo kung saan ka nagkukulang o sumosobra, kumbaga, mas malinaw kung anu-ano ang mga bagay na dapat bigyang-pansin. Kapag nakikita mong lumiliit ang kita o masyadong malaki ang gastos, baguhin mo ang budget.

6. SUKI NA SUPPLIER. Mahalagang magkaroon ng suki na supplier nang sa gayun ay makakuha ka ng sulit na deals o offer nang hindi naisasakripisyo ang kalidad ng iyong mga produkto. Dahil uso na ngayon ang socmed groups o communities para sa partikular na subject, halimbawa ay tungkol sa supplies, for sure na makakahanap ka ng supplier na swak sa ‘yo.

7. EMERGENCY FUND. Yes, besh! Kailangan din ito sa negosyo para hindi ka ma-stress sa kahahanap kung saan kukuha ng pera ‘pag may emergency. Tandaan, depende ang amount nito sa mga risks at industriya mo.

Hindi madaling magtayo at magpatakbo ng negosyo, lalo na kung bago ka sa industriyang ito.

Gayunman, sana’y makatulong ang ilang tips na ito para sa iyong business venture at ‘wag kalimutang ibahagi sa inyong mga kaibigan o kakilala na nagsisimula ring magnegosyo.

Good luck, ka-BULGAR!

Knows mo ba ‘yun, besh? Sour candy, epektibong panlaban sa panic attack

ni Jersy L. Sanchez - @Life & Style| October 19, 2021

Mabilis na pagtibok ng puso at tila hindi mapakali ang sikmura ang kadalasang sintomas ng panic attack.

Bagama’t hindi natin kontrolado ang bagay na ito, ang tanong ng marami, paano ba ito lalabanan? For sure, nasubukan n’yo na ang ilang breathing exercises, pero knows n’yo ba na may iba pang paraan upang labanan ito? Yes, besh! At ayon sa mga eksperto, isa na rito ang pagkain ng sour candy o ‘yung maasim na kendi. Oh, ha?!

Ayon kay Micheline Maalouf, isang licensed trauma therapist, ang pagpopokus sa mga pisikal na sintomas ay nakapagpapalala lang ng panic attack. Gayunman, ang ‘sour ting’ ng isang candy ay sapat umano upang ma-distract ang isang tao mula sa pagkaka-panic at maiwasan ang “full-blown” attack nito.

Sa isang TikTok video ng creator na si m3monette o Megan Michelle in real life, sinubukan niya ang naturang hack habang nakararanas ng panic attack. Ipinaliwanag niya sa video na may rate ang kanyang panic mula 1 hanggang 10 at kapag umabot ito sa 7, magsisimula na siyang mag-breakdown.

Sa umpisa ng video, sinabi ng creator na nasa 6 ang rate ng kanyang panic at pagkatapos kumain ng sour candy, nag-make face ito, inihinto sandali ang video, at pagkabalik, sinabi nitong mas mabuti na ang kanyang pakiramdam.

Samantala, inirerekomenda ni Maalouf ang pagkain ng super-sour candy sa oras na maramdamang magkakaroon ng panic attack. Gayundin, magpokus aniya sa ‘tart’ sensation sa halip na bigyang-pansin ang mga sintomas. Paliwanag pa ng eksperto, kadalasang ginagawa ng mga nakararanas ng panic attack ay nagpopokus sa pagpigil sa mga sintomas, pero ang problema aniya, mientras na nilalabanan, lalo itong lumalala.

Gayunman, ang pagkain ng anumang maasim, maanghang o maalat ay nakatutulong umanong makalimot sa shallow breathing o nagpapawis na mga palad. Ayon kay Maalouf, ‘ginugulat’ ng lasa ng sour candy ang ating senses, kaya ang resulta, nagpopokus ang mga ito sa pamamagitan ng paggamit ng sense of taste at nawawala ang pokus sa mga sinotmas o anumang nag-trigger ng panic.

Wow! Akalain n’yong ang maasim na lasa mula sa candy na ito ay may kaya palang gawin?

Kaya kung may mga kakilala kayong inaatake ng panic attack o kung kayo mismo ay nakararanas nito, subukan ang hack na ito.

‘Ika nga, wala namang mawawala kung susubukan, kaya kung effective, eh ‘di maganda. Okie?

Mahirap, pero kailangan… 6 TIPS SA PAGBABAWAS NG SUGAR INTAKE

ni Jersy L. Sanchez - @Life & Style| October 12, 2021

Ang pagbawas ng sugar intake sa ating diet ay hindi lamang nakatutulong sa pagbabawas ng timbang dahil may long-term benefits din ito sa ating kalusugan.

Pero sa totoo lang, hindi ito mahirap gawin, lalo na kung may ‘sweet tooth’ ka o ‘yung pagkahilig sa matatamis pagkain. Agree?

Kaya ang tanong ng marami, paano naman ito gagawin kung napakaraming tukso sa paligid? But worry no more dahil narito na ang ilang tips para mas mabilis na makapagbawas ng sugar intake:

• TINGNAN ANG MGA KINAKAIN ARAW-ARAW. Basahin ang mga label at i-tsek ang mga sangkap na nabanggit. For sure, magugulat ka sa dami ng sugar ingredient na nakalista, kung saan ang iba ay hindi mo iisiping ‘sweet’ pala.
  

• SIMULAN SA MALILIIT NA HAKBANG. Kalmahan mo lang, besh. ‘Wag bawasan ang sugar intake nang biglaan dahil posibleng lumala ang iyong sugar cravings at withdrawals. Ayon sa mga eksperto, ang paunti-unting pagbabawas ay nakatutulong upang mas makapag-adjust sa mga pagbabago hanggang sa magkaroon ng mga bago at mas healthy na habits.
  

• NO TO ARTIFICIAL SWEETENERS. Hindi porke sinabing sugar-free ay healthy na. Tandaan, ang mga sugar-free na inumin at pagkain ay pinatamis lamang gamit ang artificial sweeteners tulad ng aspartame o stevia extracts, na hindi rin oks para sa kalusugan. Kung tutuusin, ang chemically sweetened na inumin at pagkain ay may negatibo ring epekto sa atin. Sey ng experts, ito ay dahil ‘nalalasahan’ na ng utak ang matamis at pamilyar ito sa matamis na lasa kapag kumokonsumo tayo ng artificial sweetener, at dahil dito, ang katawan ay umaakto na tila tinutunaw ang sugar, kaya posibleng mag-crave pa sa matatamis na pagkain.

• BUDGET. Yes, sis! Maraming eksperto ang nagbibigay ng “sugar diet” sa mga pasyente nang sa gayun ay malaman nila kung gaano karaming asukal ang puwedeng ikonsumo kada araw. Halimbawa umano nito ang 100 calories of sugar per day, na sapat para makakain pa ng maliit na piraso ng tsokolate o cookie. Kapag nasanay na rito, puwede pang i-adjust ang sugar diet.

• BEHAVIORAL STRATEGIES. Oks ding magkaroon ng mga bagong habits na makatutulong upang makaiwas ka sa matatamis na pagkain. Halimbawa nito na kapag madalas kang mag-midnight snack ng matatamis, inirerekomenda ang pagsesepilyo at pag-floss pagkatapos ng hapunan.

• BAGONG SUBSTITUTE. Sa true lang, marami namang masasarap na pagkain at inumin na hindi nagtataglay ng napakaraming added sugar. Sa halip na sweet drinks, puwedeng subukan ang flavored herbal teas. Bilang pamalit naman sa nakasanayang dessert, oks din ang fruit salad. Sumubok lang ng iba’t ibang options hanggang mahanap mo kung ano talaga ang bagay sa ‘yo at pasok sa panlasa mo.

Well, true naman na hindi madaling magbawas ng sugar intake, lalo na kung talagang nasanay ka na sa matatamis na pagkain at inumin. Pero tandaan, hindi porke nakasanayan ay oks at nakabubuti sa atin. At ngayong hindi na tayo bumabata, kailangan na rin nating baguhin ang ilang nakasanayan para sa mas healthy version ng ating sarili sa future.

Kaya kung ready ka nang magbawas ng sugar intake, try n’yo lang ang mga ito. Keri?