ALAMIN: Iba’t ibang paraan para makapag-ipon ngayong 2022

ni Jersy L. Sanchez - @Life & Style| January 24, 2022

Ang sarap sa feeling na makaipon. Agree? ‘Yung tipong, maliit man o malaki ang perang naitabi, sobrang saya sa feeling dahil alam nating pinaghirapan natin ito.

At ngayong bagong taon, sabi nga, “2022 is ipon year”, kaya for sure, maraming mag-a-attempt na mag-ipon, pero ‘di alam kung paano. Well, don’t worry dahil we got you!

Narito ang ilang “ipon challenges” na puwede n’yong subukan ngayong taon:

1. INVISIBLE 50s. Marami nang gumagawa nito, kung saan kapag mayroon kang P50, awtomatiko itong magiging “invisible” para sa iyo dahil kailangan mo agad itong itabi. Kung magtatabi ka ng P50 kada araw, makakalikom ka ng P18,250 sa katapusan ng taon. Gayunman, puwede mo itong gawin sa P100 bill dahil ang katumbas nito ay P36,500 kung magtatabi ka ng P100 kada araw. Kung keri ng mas mataas pa tulad ng P500 per day, makakaipon ka ng P182,500 sa katapusan ng taon. Wow!

2. CALENDAR IPON CHALLENGE. Puwede mong kabitan ng “bulsa” o lagyan ng plastic bag ang bawat petsa sa kalendaryo para paglagyan ng pera. Depende na sa ‘yo kung magkano ang trip mong ilagay, basta ang importante ay may maitatabi ka bawat araw. Ayon sa financial planner, epektibo ang paraang ito dahil magandang motivator ang “visual” na paalala para sa pag-iipon.

3. 50-30-20 RULE. Sa true lang, matagal nang ginagawa ang paraang ito. Ayon sa mga eksperto, kailangang ilaan ng isang indibidwal ang 50% ng kanyang suweldo sa mga pangangailangan, 20% para sa savings o investments at 30% para sa “happy fund” o ‘yung mga bagay na nagpapasaya sa ‘yo, kumabaga, mga luho.

4. AUTO-INVEST PROGRAM. Swak ang paraan na ito para sa mga gustong mag-ipon pero nahihirapan. Paliwanag ng eksperto, ito ay “forced saving” kaya tuloy-tuloy ang pag-iipon at walang choice ang isang indibdiwal kundi magtabi ng pera at kalaunan ay nagiging habit na ang pag-iipon. Ayos!

‘Ika nga, hindi mo kailangang magkaroon ng malaking suweldo para makapagsimulang mag-ipon. Ang tanging kailangan natin ay disiplina at tiwala sa sarili.

Kaya para sa mga beshy nating kasama sa New Year’s resolution ang pag-iipon, try n’yo na ang mga ‘to. Good luck!

Tips para ‘di mabiktima ng pekeng gamot

ni Jersy L. Sanchez - @Life & Style| January 16, 2022

Sa pagpasok ng 2022, ramdam ang pagtaas ng demand ng mga gamot laban sa sipon, ubo at trangkaso. Kaya naman dinadagsa ang maraming botika at nagkaubusan pa ng stock ng ilang brand ng gamot.

Gayunman, sa gitna ng mataas na demand, hindi natin dapat kalimutan na lehitimong gamot lamang ang dapat nating bilhin at inumin dahil baka imbes na ginhawa, eh, makaperhuwisyo pa.

Kaya para iwas-pekeng gamot, narito ang ilang bagay na kailangan nating tandaan upang hindi mabiktima:

1. SOURCE. Ayon sa mga eksperto, mahalagang malaman ng publiko kung saan galing ang biniling gamot. Mabuti umanong galing sa lisensiyadong botika o rehistrado sa Food and Drug Administration (FDA). Gayundin, inirerekomenda sa publiko na alamin kung saang kumpanya galing ang produkto at maaaring itsek kung ito ay lehitimo.

2. RECOMMENDED. Mas okay kung inirerekomenda ng pharmacist ang gamot at hindi ‘yung bibilhin natin dahil ayon sa ibang tao ay epektibo ito.

3. LABEL. Payo ng mga eksperto, mahalagang tingnan ang impormasyong makikita sa label ng mga binibiling gamot. Halimbawa, kailangang malinaw na nakasaad kung ilang mg ito, gayundin may expiration date. Gayunman, kung naka-bote ang gamot, tingnan ang lot number, manufacturing date at expiration date. Rito kasi nakasaad kung kailan ginawa ang gamot at kung tumupad sa FDA requirements pagdating sa labeling.

4. SIZE & WEIGHT. Bukod sa label, kailangan ding suriin ang size at bigat ng nabiling gamot. Sey ng expert, dapat pantay-pantay ang laki ng mga gamot sa isang banig ng tablet at dapat walang damage ang mga tableta.

Ayon sa mga eksperto, maraming maaaring bilhan ng mura ngunit lehitimong gamot sa bansa.

Pero tandaan, hindi lahat ng mura ay peke dahil sa totoo lang, maraming generic products na mura at epektibo, ngunit kailangan nating maging mapanuri bago bumili.

Kaya ngayong knows n’yo na, maging wais at iwasang magpaloko para iwas-fake. Okie?

5 dahilan kaya mahalaga ang career planning

ni Jersy L. Sanchez - @Life & Style| January 10, 2022

Napakahalagang magkaroon ng career goal dahil bukod sa ito ang dahilan para ibigay mo ang iyong best, nagiging gabay din ito sa iyong career decisions.

Bagama’t napakaraming career options sa ating harapan, ang pagkakaroon ng goal ay nakatutulong upang malaman kung nasa tamang “career path” ka. Kaya para sa mga beshy nating nagbabalak magpokus sa career, narito ang ilang dahilan kaya mahalaga ang career planning:

1. ALAM MO KUNG SAAN MAGSISIMULA. Bago ang lahat, kailangan mo ng plano kung saan hindi ka dapat basta magkatrabaho lang kundi ang magkaroon ng career mismo. Tandaan, magkaiba ang trabaho at career. Ang trabaho ay nakapokus sa pagkita ng pera, habang ang career ay nakatutok sa professional growth kung saan ang pinagtatrabahuhan mo ay isang bagay na ‘passionate’ ka. Ang career planning ay nakatutulong upang mapaghandaan ang mga oportunidad na darating sa future.

2. PAMPATAAS NG CONFIDENCE. Kapag alam mo kung ano ang gusto mong marating, nagkakaroon ka ng confidence at ang pagkakaroon ng plano ay nakatutulong upang paghandaan ito. Ang pagiging handa sa mga dapat gawin upang ma-achieve ang iyong goals ay nakatutulong upang hindi ka “maligaw” ng landas habang ini-establish ang iyong career.

3. ENHANCES STRENGTHS. Tulad ng nabanggit, nakatutulong ang career planning para sa future opportunities. Gayundin, nakatutulong ito upang malaman mo ang iyong skills at mapalakas ang mga ito. Maraming paraan upang hasain ang iyong skills tulad ng pag-attend ng training programs o pag-enroll sa graduate school. Hindi lamang ito nakatutulong sa iyong career dahil makikinabang din dito ang iyong coworkers at kumpanyang pinagtatrabahuhan. Tandaan, ang pagpopokus sa iyong mga strength ay mahalagang sangkap upang ma-achieve ang iyong goals.

4. NALALAMAN ANG MGA KAHINAAN. Kung mayroon tayong strength, siyempre, mayroon ding weakness. Parte ng career planning ang pagtukoy sa mga bagay na kailangan nating i-improve o pagbutihin upang ma-enhance ang ating strength. Gayunman, hindi natin dapat dedmahin ang ating mga kahinaan, bagkus, gawin itong oportunidad para sa career development. Kung keri, puwede kang mag-aral ng mga bagong skills dahil tiyak na makatutulong din ito sa iyong career.

5. SOURCE NG MOTIVATION. Ang pagkakaroon ng successful career ay hindi basta-bastang na-a-achieve dahil for sure, mahaharap tayo sa iba’t ibang pagsubok bago marating ito. Gayunman, normal lang para sa mga propesyunal na mawalan ng “drive” o motibasyon para tuparin ang kanilang goals. Kapag mayroon kang career plan, mananatili kang motivated.

Isang malaking hakbang para sa marami sa atin ang pagbuo ng career plans dahil sa panahon ngayon, mas nangingibabaw ang pangangailangan na magkaroon ng trabaho upang maitawid ang araw-araw na pamumuhay.

Gayunman, para sa mga beshy nating nagsisikap na magkaroon ng career growth, tiyak na makakatutulong ang mga ito sa inyo. Okie? Good luck, ka-BULGAR!