Bakbakang Israel-Hamas tumitindi, 7,028 na patay

ni Angela Fernando - Trainee @News | October 28, 2023

Handa na ang Hamas na tuluyang harapin ang sunud-sunod na pag-atake ng Israel na sumira sa Gaza.

Dagdag ng militanteng grupo, kasalukuyang nakikipagbuno ang kanilang mga tauhan laban sa Israel.

Ito ay matapos sabihin ng tagapagsalita ng militar ng Israel na si Rear Admiral Daniel Hagari na kanilang pinalawak ang mga operasyon at binomba ang mga daan at imprastrakturang pwedeng gawing lusutan ng Hamas nu'ng Biyernes, Oktubre 27.

Pinaalam din ng Hamas na kanilang nakababangga ang Israeli sa hilagang-silangang bayan ng Beit Hanoun at sa gitnang bahagi ng Al-Bureij sa Gaza kamakailan.

Samantala, pumapalo na sa mahigit 7,028 ang bilang ng mga namatay, kasama ang 2,913 na bata.

60 OFWs at 2 sanggol mula Israel, pauwi na

ni Angela Fernando - Trainee @News | October 28, 2023

Nakatakdang bumalik ng bansa ang pang-apat na batch na overseas Filipino workers mula Israel sa Lunes, Oktubre 30.

Ayon sa kay Department of Migrant Workers (DMW) official Hans Leo Cacdac, may 60 OFWs at 2 sanggol ang pauwi na sa bansa sa ilalim ng emergency repatriation, 32 sa mga ito ay hotel workers at 28 naman ay caregivers.

Kapag naging matagumpay ang paglapag ng pang-apat na batch, 119 OFWs at 4 na sanggol na ang natulungang makauwi ng bansa.

Sa kabilang banda, meron pang mahigit 180 manggagawang Pilipino sa Israel ang nagnanais na makauwi ng Pilipinas.

Israel-Hamas war, 6,546 na ang patay

ni Angela Fernando - Trainee @News | October 26, 2023

Naglabas ng footage ang Israel ng umano'y mga target ng militanteng grupong Hamas na tinamaan ng kanilang pambobomba nu'ng Miyerkules, Oktubre 24.

Ang mga nagkalat na parte ng mga gumuhong gusali ay naging dahilan para mahirapan ang mga Gazans na tuluyang makalikas.

Isinagawa ang pag-atake ng parehong araw na ikinasira ng mga nakatayong imprastraktura ng Hamas, ayon sa isang Telegram post ng Israeli army.

Pumatay ng hindi bababa sa 10 katao ang atake at marami rin ang sugatan.

Kinumpirma naman ng mga awtoridad ng Gaza na may 6,546 na Palestino na ang nasawi dahil sa nangyayaring karahasan, mas tumindi rin umano ang pag-atake ng Israel ng nagdaang araw.