US at Israel, joint forces sa pagwakas ng nuclear threat ng Iran

ni Jenny Rose Albason @World News | May 26, 2026

Sinabi ni Israeli Prime Minister Benjamin Netanyahu nitong Linggo na nagkasundo sila ni US President Donald Trump na anumang pinal na kasunduan sa Iran ay dapat tuluyang wakasan ang umano’y nuclear threat ng Islamic republic.

Ayon kay Netanyahu, nakausap niya si Trump noong Sabado ng gabi sa isang pag-uusap na nauna nang inilarawan ng Amerika bilang “napakaganda.”

Kabilang umano sa kanilang napagkasunduan ang pagbuwag sa uranium enrichment facilities ng Iran at ang pag-aalis ng enriched nuclear materials mula sa teritoryo nito.

Binigyang-diin din ng Israeli leader na pareho ang kanilang posisyon ni Trump na hindi dapat magkaroon ng nuclear weapons ang Iran.

Napag-usapan din umano ng dalawang lider ang memorandum of understanding kaugnay ng muling pagbubukas ng Strait of Hormuz, isang mahalagang ruta sa pandaigdigang kalakalan at suplay ng langis.

Dagdag pa ni Netanyahu, nananatiling matatag ang alyansa ng Israel at Estados Unidos, lalo na sa usapin ng seguridad at depensa laban sa mga banta sa rehiyon, kabilang na umano ang sitwasyon sa Lebanon.

Trahedya sa airstrike... Bahay tinamaan, 19 patay

ni Jenny Rose Albason @World News | May 22, 2026

Nasawi ang 19 katao sa panibagong inilunsad na airstrikes ng Israel sa Lebanon.

Batay sa ulat ng Ministry of Public Health, sampu sa mga nasawi, kabilang ang tatlong bata at tatlong kababaihan, ang namatay matapos tamaan ng pag-atake ang isang bahay sa bayan ng Deir Qanoun.

Nairekord ang panibagong mga pagkasawi wala pang isang linggo matapos ianunsiyo ng Amerika na nagkasundo ang Lebanon at Israel na palawigin pa ng 45 araw ang ceasefire habang nakatakdang ipagpatuloy ng magkabilang panig ang usapan pagsapit

ng Hunyo.

Sa kabila ng pagpapalawig ng ceasefire, nagpapatuloy pa rin ang palitan ng pag-atake sa pagitan ng Israel at Hezbollah, partikular sa southern Lebanon.

Sa inilabas na pahayag ng health ministry ng Lebanon, sinabi nitong bukod sa mga nasawi sa Deir Qanoun ay mayroon ding tatlong katao ang nasugatan, kabilang ang isang batang babae.

Samantala, siyam pang katao ang napatay habang 29 ang nasugatan sa air strikes ng Israel sa mga distrito ng Nabatieh at Tyre.

Batay sa pinakahuling ulat ng health ministry noong Lunes, umabot na sa mahigit 3,000 katao ang nasawi sa Lebanon dahil sa mga strike ng Israel sa gitna ng labanan laban sa Hezbollah simula noong Marso.

---

Patay na raw si King Charles 

RADIO STATION, NAG-SORRY SA PEKENG BALITA

HUMINGI ng paumanhin ang isang dating British pirate radio station sa mamamayan ng United Kingdom at sa hari matapos nitong aksidenteng maipahayag ang maling balita tungkol sa umano’y pagpanaw ni King Charles III.

Ayon sa pahayag ng istasyon, ang insidente ay dulot ng computer error sa pangunahing studio nito sa Maldon, Essex, na nagresulta sa maling pag-activate ng tinatawag na “death of a monarch procedure,” isang protocol na naka-standby sa ilang broadcast stations sa United Kingdom para sa mga emergency announcements.

Agad na naitama ang pagkakamali matapos itong mapansin ng mga tauhan, at naglabas ang istasyon ng on-air apology. Nilinaw ng management na isa lamang itong teknikal na aberya at walang katotohanan ang naunang ulat.

Humingi rin ng paumanhin ang station manager sa hari at sa mga tagapakinig, at inaming nakalulungkot ang naging epekto ng insidente.

Ang naturang radyo, na itinatag noong 1964 bilang pirate radio station na lumaban noon sa monopolyo ng BBC, ay dati ring nag-ooperate mula sa mga barko sa dagat bago tuluyang nagbago ang operasyon nito sa mga sumunod na dekada.

Sa oras ng insidente, nasa Northern Ireland si King Charles III kasama si Queen Camilla para sa isang royal engagement, at wala namang kumpirmadong kaganapan na may kaugnayan sa maling ulat.

Patuloy na ipinapaliwanag ng istasyon na ito ay isang isolated technical error at humihingi sila ng pang-unawa mula sa publiko.

Drone at airstrike umatake sa Lebanon, 22 utas

ni Jenny Rose Albason @World News | May 15, 2026

Nasawi ang dalawampu’t dalawang katao, kabilang ang walong bata, sa serye ng airstrike ng Israel sa timog ng Lebanon.

Patuloy ang bakbakan sa pagitan ng Israel at grupong Hezbollah sa kabila ng umiiral na tigil-putukan.

Ayon sa ulat, magkakasunod na drone at airstrike ang tumama sa iba’t ibang lugar sa south Lebanon, kabilang ang mga sasakyan at kabahayan sa mga lungsod at bayan tulad ng Sidon, Naqoura, Arab Salim, Roumine at iba pa. May mga paramedic din na nasawi habang nasa rescue mission.

Sinabi ng militar ng Israel na tinatarget nito ang mga armas at imprastruktura ng Hezbollah, habang nagbabala rin ito sa mga residente sa ilang bayan na lumikas dahil sa planong operasyon.

Samantala, naglunsad din ng ganting-atake ang Hezbollah laban sa mga tropang Israeli sa southern Lebanon gamit ang drone, rocket at iba pang armas.

Nagpahayag ng pag-aalala ang United Nations Interim Force in Lebanon dahil sa tumitinding labanan malapit sa kanilang mga posisyon.

Ayon sa health ministry ng Lebanon, mahigit 400 na ang patay mula nang ipatupad ang tigil-putukan ilang linggo na ang nakalipas, habang libu-libong bahay na rin ang napinsala.

Patuloy ang mga sagupaan habang inaasahang magkakaroon ng panibagong usapang pangkapayapaan sa Washington sa mga susunod na araw.

---

11 sakay, himalang nakaligtas 

EROPLANO NAG-DIVE SA DAGAT

HIMALANG nakaligtas ang lahat ng 11 katao na sakay ng isang pribadong eroplano na bumagsak sa dagat sa bahagi ng central Florida matapos silang masagip ng mga tauhan ng US Air Force Reserve at US Coast Guard.

Ang eroplano, na nagmula sa Bahamas, ay bumagsak humigit-kumulang 80 milya mula sa baybayin matapos umano itong makaranas ng problema sa makina. Agad namang natukoy ng Coast Guard ang emergency signal nito, kaya mabilis na naipadala ang rescue team.

Natagpuan ang mga sakay sa isang liferaft matapos ang halos limang oras sa dagat. Binigyan sila ng pagkain, tubig, at iba pang suplay habang hinihintay ang pagsagip.

Kalaunan, iniahon sila gamit ang rescue helicopter at dinala sa Melbourne Orlando International Airport para sa medikal na atensyon.

Patuloy pang iniimbestigahan ng mga otoridad sa Bahamas ang sanhi ng insidente.

---

May bakas ng cocaine sa katawan

NANAY KULONG SA PAGKAMATAY NG ANAK NA EDAD 2 AT 3

ARESTADO ang isang ina sa Florida tatlong buwan matapos malunod ang kanyang dalawang anak na edad 2 at 3 sa Katy, Texas, na kalaunan ay nakumpirmang may cocaine sa kanilang mga katawan.

Ayon sa Harris County Sheriff’s Office, tumugon ang mga otoridad noong Pebrero 11 sa ulat ng pagkalunod ng dalawang bata sa isang tahanan. Lumabas sa toxicology tests na may bakas ng cocaine sa kanilang sistema, na nagbunsod ng imbestigasyon kung paano sila nalantad dito at kung may pananagutan ang kanilang ina na si Laura Nicholson, 23.

Noong Mayo 8, kinasuhan si Nicholson ng 2-counts of injury to a child. Inaresto siya kalaunan sa Fort Myers, Florida, matapos siyang matunton ng mga otoridad.

Natagpuan siya sa isang mental health facility at dinala sa kustodiya ng Lee County Sheriff’s Office

Patuloy ang imbestigasyon sa kaso, kabilang ang paraan kung paano nalantad sa cocaine ang mga bata at kung may iba pang maaaring maharap sa kaso.