Moreno nag-issue ng show cause order sa management ng UE Manila nang 'di sumunod sa ‘health break‘

ni Jasmin Joy Evangelista | January 14, 2022

Nag-issue ng show cause order si Manila Mayor Isko Moreno laban sa University of the East (UE) Manila dahil sa hindi nito pagsunod na magsuspinde ng mga klase para sa week-long ‘health break’.

Inilabas ang direktiba matapos ilabas ng UE news organization na hindi sinunod ni UE president Ester Garcia ang inilabas na kautusan ng Manila City government.

“Mayors do not have authority to cancel classes at the tertiary level,” pahayag ni Garcia sa isang report mula sa UE Redwire news organization.

Sa isang Facebook live, ipinakita ni Moreno ang kopya ng show cause order at ipinaliwanag ang pagkakansela niya ng klase sa buong lungsod sa ilalim ng local government code at Commission on Higher Education (CHED) memorandum.

Nagbabala ang alkalde sa UE Manila management na kailangan nitong mag-reply sa loob lamang ng 3 araw pagkatanggap ng sulat at ipaliwanag kung bakit hindi dapat sila maisyuhan ng cease and desist order.

Aniya pa, kapag hindi sumagot ang management ng unibersidad sa ibinigay na deadline, “it shall be dealt with accordingly by the City Government of Manila, through the Bureau of Permits.”

“If it is clear for you that I don’t have authority, go find yourself a local government. You may go,” babala ni Moreno kay Garcia.

Nito lamang Huwebes nang magdeklara si Mayor Isko Moreno ng health break para sa mga estudyante at guro sa pampubliko at pribadong paaralan sa Maynila mula Jan. 14 hanggang 21, 2022.

Traslacion 2022, kanselado; online mass isasagawa — Mayor Isko

ni Jasmin Joy Evangelista | January 5, 2022

Walang Traslacion 2022 at walang pisikal na misa sa Pista ng Itim na Nazareno sa Enero 9, 2022 sa Quiapo Church, Manila, ayon kay Mayor Isko Moreno.

Magkakaroon lamang ng online mass para sa nasabing kapistahan.

Sa isang press conference, sinabi ni Moreno na pumabor ang management ng Quiapo Church sa pangunguna ni Monsignor Hernando Coronel na online masses lamang ang isasagawa.

"Ako po’y nagpapasalamat sa ating Monsignor Coronel ng Quiapo sa pagtugon nila sa pakiusap ng pamahalaang lungsod na wala muna tayong Traslacion ngayong taon na ito, at wala rin tayong physical mass, online mass lang tayo,” ani Moreno.

“Mabigat po sa kalooban ko na hindi tayo magmisa ng pisikal, alam natin nakagawian na natin ‘yan. Ipagpapasesnya po ninyo, ito’y para rin naman sa kaligtasan ninyo at ninyong mga anak o pamilya. Maraming salamat sa kaparian ng Quiapo. Uulitin natin, walang traslacion, walang physical mass, online mass tayo,” dagdag niya.

Nakiusap din ang alkalde sa mga deboto ng Itim na Nazareno, kabilang ang Hijos del Nazareno, na sana ay maintindihan ang sitwasyon ngayong taon dahil sa patuloy na pagtaas ng bilang ng kaso ng COVID-19 sa bansa.

Dahil sa restrictions, ipinagbabawal din ang pagdadala ng replica statues.

“Nauunawaan ko ang damdamin ng ating mga hijos, kahit ho kami, sa Bangkusay, meron din kaming Nazareno, nalulungkot ako na hindi natin magagawa ‘yong dati nating ginagawa,” pahayag pa ni Mayor Isko.

“Nakikisuyo ako, wag po ninyong dadalhin, mahigpit pong ipatutupad ang mga pag-iingat,” aniya pa.

Samantala, sinabi rin ni Moreno na magpapatupad ng liquor ban ang Manila City government mula 6:00 p.m. ng Jan. 8 hanggang 6:00 a.m. ng Jan. 10.

Mayor Isko, pinuri si Pangulong Duterte at IATF sa COVID-19 response sa bansa

ni Jasmin Joy Evangelista | December 4, 2021

Pinuri ni presidential aspirant Mayor Isko Moreno si Pangulong Duterte at ang Inter-Agency Task Force for the Management of Emerging Infectious Diseases (IATF) sa ginawang pagtugon sa COVID-19 pandemic sa bansa.

Aniya, kapuri-puri ang isinagawang three-day vaccination drive ng pamahalaan laban sa COVID-19.

"Pangamba at takot sa impeksyon, pangamba at takot sa hanapbuhay, dahil dito, nagdulot ito ng konting pagkakalito. But life must go on. We give credit where credit is due,” ani Moreno.

“Totoo naman kapuri-puri 'yung ginawa ni Pangulong Duterte at ng IATF, kung saan 'yung mga lokal na pamahalaan na nabakunahan na namin. Lahat tumulong naman sa probinsya, which ginawa namin,” dagdag niya.

Ayon pa kay Moreno, hindi perpekto ang administrasyong Duterte pero nakikinig umano ang pangulo sa mga tao tulad na lamang ng pagpabor nito na ‘wag nang gawing mandatory ang pagsusuot ng face shield.

“May mga bagay na 'di perpekto. Pero as long as nakikinig 'yung leader doon sa talbog o pagkakadapa ng kanyang mga tao at ikino-correct naman niya, that’s what you call learning the lesson and moving forward,” paliwanag niya.

“Tulad halimbawa 'yung sa face shield, in-argue ko 'yung isang ahensya ng gobyerno pero nakita mo naman dininig ni President Duterte 'yung request ng taumbayan. Ako, in-echo ko lang naman,” dagdag ng alkalde.