Grupong sumusuporta kay Isko, lumipat kay Robredo

ni Jasmin Joy Evangelista | April 6, 2022

Inanunsiyo ng grupong nag-endorso sa presidential bid ni Manila Mayor Francisco “Isko Moreno” Domagoso na si Vice President Leni Robredo na ang kanilang susuportahan.

Sa isang press conference, sinabi ni Ikaw Muna (IM) Pilipinas Visayas lead convenor Nick Malazarte na si Robredo lamang ang may tsansang pigilan ang pagbalik ng mga Marcos sa kapangyarihan.

Ayon pa kay Malazarte, lumipat kay Robredo ang national leadership ng IM Pilipinas dahil hindi maganda ang resulta ng mga survey kay Moreno.

“There is a danger of the Marcoses getting back to power, that is why if we believe Yorme (Moreno) is the best, we have somebody better (Robredo) because the alternative is the worst, who is BBM (Ferdinand Marcos Jr.),” aniya.

Nakipag-ugnayan na sa kampo ni Robredo ang grupo upang ipaalam ang kanilang pagsuporta sa kampanya ng bise presidente. Nagpadala na rin sila ng sulat sa campaign manager ni Moreno hinggil sa kanilang desisyon.

Ang IM Pilipinas ay isa sa mga unang grupo na hinikayat si Moreno na tumakbo sa pagkapangulo.

Ayon pa kay Mazarte, ang naturang announcement ay napagkasunduan ng mga leader nito sa mga pagpupulong na kanilang isinagawa mula noong nakaraang linggo hanggang noong Linggo ng gabi.

Nanawagan din si Malazarte sa mga parallel organizations na sumusuporta sa ibang kandidato na mag-shift na ng suporta kay Robredo at pigilan ang pagbabalik ng Marcos sa pagiging pangulo.

Nakatakdang magsagawa ang grupo ng house-to-house campaign para kay Robredo.

Mayroong mahigit 2,000 miyembro ang IM Pilipinas sa Visayas pa lamang.

Isko Moreno pinasalamatan ang dalawang miyembro ng Partido Federal na nag-endorso sa kanya

ni Jasmin Joy Evangelista | April 2, 2022

Pinasalamatan ni Manila Mayor Francisco “Isko Moreno” Domagoso ang faction ni former Senator Ferdinand “Bongbong” Marcos Jr. na Partido Federal ng Pilipinas (PFP) sa pag-endorso sa kayang kandidatura sa pagkapangulo.

“Hindi naman ako nag endorse sa sarili ko," ani Moreno sa report sa 24 Oras. "Ini-endorse ako ng dalawang botante na nagkataon lamang ay binubuo ng malaking grupo na nagkataon din lamang na kasama nila (PFP). Kasama nila, ini-endorse ako. Salamat plus two.”

Inendorso rin ng Abubakar Mangelen wing ng PFP si Moreno sa ginanap na grand rally sa Iligan City Public Plaza.

“Well, it is a party endorsement so I did not do that.. they did it,” ayon pa kay Moreno.

Samantala, binatikos naman ni PFP national secretary-general Tom Lantion ang endorsement ng Mangelen faction kay Moreno.

Sa report ni Sandra Aguinaldo sa 24 Oras, sinabi ni Lantion na ni-reject ng partido ang endorsement, at tinawag itong “fake announcement.”

Dagdag pa ni Lantion, matagal nang walang koneksiyon sa Partido si Mangelen, na sinabihan din nitong “impostor”, at binubuo na rin umano ang isasampang reklamo laban dito.

Bilang tugon, binalaan ni Mangelen ang kampo ni Marcos Jr. na nanganganib ang kanyang kandidatura dahil maraming orihinal na miyembro ng Partido ang lumilipat na sa kanyang faction.

Sa ngayon ay wala pang tugon si Lantion hinggil dito.

‘Pag nanalong presidente... Isko nangakong kokolektahin ang P203 B unpaid tax ng mga Marcos

ni Jasmin Joy Evangelista | March 23, 2022

Nangako si presidential candidate Manila Mayor Isko Moreno na ibebenta niya ang illegally acquired jewelry at paintings at sisiguruhing makokolekta ang P203 billion unpaid estate tax ng pamilya Marcos kapag nanalo siyang presidente.

“Maaari siyang ipatupad, and we guarantee you, maipapatupad ‘yon dahil ‘yun po ay batas. What matters most ay makokolekta ‘yun, dahil marami pa naman silang pag-aari na maaari naman nating makuhanan at mapunan ‘yung para sa estado,” ani Moreno sa Serve the Nation presidential interviews ng TV5.

“Kung maaalala niyo, may mga diyamante, mga assets na nakuha sa kanila. Natutulog po sa Bangko Sentral ng Pilipinas (BSP). Picasso USD 200 million sa mundo ‘yan, mahal na mahal ‘yung mg paintings, Monet, na nakolekta na ng gobyerno. Ito tangan-tangan natin, pwede naman nating isalba o ibenta na. kasi there is no use of that na sa buhay ng tao kung nandi-dyan lang ‘yan sa vault ng ating gobyerno,” paliwanag pa ni Moreno.

Sa hiwalay na pahayag, sinabi ng kampo ni Moreno na batay sa report mula sa Christie’s at Sotheby’s noong November 2015, ang mga illegally obtained jewelry collection ng Marcoses na nakatago sa vault ng BSP ay nagkakahalagang P1 billion.

Maliban sa jewelry collection, mahigit isandaang artworks ng mga artist na sina Van Gogh, Picasso, Monet, Pierre Bonnard, at Michelangelo ang nawawala at kailangang ma-recover, ayon sa kampo ni Moreno.