Quarantine classification sa Mayo, pinag-aaralan na ng MM mayors

ni Mary Gutierrez Almirañez | April 27, 2021

Magsusumite ang Metro Manila Council (MMC) ng rekomendasyon sa Inter-Agency Task Force (IATF) ngayong araw, para sa magiging quarantine classifications ng National Capital Region (NCR) sa pagtatapos ng modified enhanced community quarantine (MECQ) sa ika-30 ng Abril, batay sa naging panayam kay MMC Chairman at Parañaque City Mayor Edwin Olivarez.

Aniya, “Magkakaroon ng consensus ang Metro Manila Council kung ano po ang irerekomenda po natin sa Inter-Agency Task Force… Itong tanghali po.”

Paliwanag pa niya, “‘Di kaya mag-relax pa ng local government units sa quarantine natin dahil ang ating critical care based on the data ng ating DOH, bumaba ang ating critical care pero nasa 70 percent ang occupancy natin.”

Sa huling tala ng Department of Health (DOH), umabot na sa 444,970 ang kabuuang bilang ng COVID-19 sa National Capital Region (NCR), kung saan 6,200 na ang mga namatay.

Matatandaang ipinatupad ang lockdown sa NCR at mga kalapit nitong lalawigan upang mapababa ang kaso ng COVID-19, mula noong maging sentro ng pandemya.

Sa ngayon ay tinatayang 31,498 ang active cases sa NCR, kung saan Quezon City ang nangunguna sa mga lungsod na may pinakamataas na kaso.

Samantala, hindi naman binanggit ni Olivarez ang quarantine classification na kanilang irerekomenda sa IATF mamayang tanghali. Gayunman, iginiit niyang magiging problema ang unemployment rate kung magpapatuloy ang MECQ sa NCR.

Pagpasok ng mga foreigners sa 'Pinas, nilimitahan

ni Mary Gutierrez Almirañez | April 16, 2021

Pinapayagang makapasok sa bansa hanggang sa ika-30 ng Abril ang mga foreign nationals kabilang ang mga nakapagsumite ng dokumento sa Department of Foreign Affairs (DFA) bago ang ika-22 ng Marso, batay sa inaprubahang Resolution 110 ng Inter-Agency Task Force (IATF).

Ayon kay Presidential Spokesperson Harry Roque, kabilang sa mga foreign nationals na may valid entry exemption documents na pinapayagang makapasok sa bansa ay ang mga sumusunod:

• diplomat at miyembro ng international organization, kasama ang kanilang dependents na may valid 9(e) visa o 47(a)(2) visa

• foreign nationals na kasama sa medical repatriation na inendorso ng Department of Foreign Affairs - Office of the Undersecretary for Migrant Workers Affairs and Overseas Workers Welfare Administration na may valid visa

• foreign seafarers sa ilalim ng “Green Lanes” program na may 9(c) crew list visa

• Pinoy na asawa at anak ng foreigner na may valid visa

• emergency, humanitarian, at iba pang analogous cases na inaprubahan ng Chairperson of the National Task Force Against COVID-19 o mga authorized representatives ng foreign nationals na may valid visa

Nilimitahan ang pagpapapasok ng mga dayuhan sa ‘Pinas dahil sa lumalaganap na pandemya. Sa ngayon ay 904,285 na ang kabuuang bilang ng COVID-19 sa bansa, kung saan umakyat na sa 183,527 ang aktibong kaso, mula nang magpositibo ang 11,429 kahapon.

Batay din sa huling tala ng Department of Health (DOH), tinatayang 705,164 ang lahat ng mga gumaling sa virus, habang 15,594 ang mga pumanaw.

A4 Priority Group sa bakuna, aprubado na ng IATF

ni Mary Gutierrez Almirañez | April 16, 2021

Inaprubahan na ng Inter-Agency Task Force (IATF) on Emerging Infectious Diseases nitong Huwebes ang bagong listahan ng Priority Group A4 na prayoridad mabakunahan kontra COVID-19.

Ayon kay Presidential Spokesperson Harry Roque ngayong araw, kabilang ang mga sumusunod na empleyado sa inilatag na listahan ng IATF:

• frontline vendor sa pribado at pampublikong palengke

• frontline worker sa groceries, supermarkets at delivery services

• frontline workers sa food manufacturer, beverage, medical at pharmaceutical products

• frontline workers sa food retail, kasama ang food service delivery

• frontline workers sa private at government news media

• frontline workers sa private at government financial services

• frontline workers sa hotels at accommodation establishments

• mga pari, rabbis, imams, at iba pang religious leaders

• frontline personnel sa basic education/higher education institutions at mga ahensiya nito

• mga security guard na naka-assign sa bawat nabanggit na establisimyento

• mga nagdi-distribute ng bill ng tubig, kuryente, cable, landline at internet provider sa bawat bahay

• frontline workers sa law/justice, security at social protection sectors

• frontline government workers na nag-o-operate ng government transport system, quarantine inspection; worker safety inspection at iba pang COVID-19 response activities

• frontline government workers na in-charge sa tax collection, assessment of businesses for incentives, election, national ID at data collection personnel

• mga diplomatic community at Department of Foreign Affairs (DFA) personnel sa consular operations

• Department of Public Works and Highways (DPWH) personnel na in-charge sa pagmo-monitor ng infrastructure projects ng gobyerno

• overseas Filipino workers na naka-schedule ma-deploy in 2 months

• mga biyahero (land, air, and sea), kasama ang logistics

Matatandaang nagsimula ang vaccination rollout sa ‘Pinas noong ika-1 ng Marso sa pangunguna ng mga frontline healthcare workers at pulis na sinundan ng mga senior citizens at may comorbidities. Kabilang din sa naging prayoridad sa bakuna ang mga mayor at governor na nasa high risk areas.

Sa ngayon ay lumagpas na sa isang milyon ang mga nabakunahang indibidwal kontra COVID-19.

Sa kabuuang bilang nama’y 3,025,600 doses na ang mga nai-deliver na bakuna sa bansa, kung saan Sinovac at AstraZeneca pa lamang ang nakararating. Gayunman, patuloy pa rin ang pakikipagnegosasyon ng pamahalaan sa mga international manufacturers para sa ibang brand at mas mataas na efficacy rate ng bakuna.

Sa kabilang banda, pinagpaplanuhan na rin ng ‘Pinas na gumawa ng sariling COVID-19 vaccines.