Video, kumalat... Grade 10, inabuso ng 3 menor-de-edad

ni Justine Berganio @Overseas News | September 23, 2026

Photo: Viral / Circulated

Timbog ang tatlong menor-de-edad matapos umanong harangin at abusuhin ang isang Grade 10 student na babae at bugbugin ang kanyang lalaking kaibigan sa Jamui, Bihar, India nitong Setyembre 19.

Parehong menor-de-edad ang dalawang biktima at magkaklase sa isang coaching institute. Nagpunta umano sila sa lugar para kumuha ng litrato matapos ang kanilang klase nang harangin ng grupo ng mga lalaki.

Kumalat online ang video ng insidente kung saan makikitang hinihila sa kuwelyo at sinasampal ang binatilyo habang ang dalagita ay hinarass. Sa isa pang footage, makikitang may lalaking nagbuhat sa babae habang tinatangkang umawat ng kanyang kaibigan.

Ayon sa pulisya, hindi agad iniulat ng mga biktima ang insidente. Nagsimula ang imbestigasyon matapos kumalat ang video at natunton ang dalawang estudyante gamit ang plaka ng sasakyang makikita sa footage.

Tatlong menor-de-edad na ang arestado, habang natukoy na rin ang dalawa pang posibleng sangkot. Isang special investigation team ang binuo para tugisin ang iba pang suspek.

Isinampa ang kaso sa ilalim ng Protection of Children from Sexual Offences Act (POCSO) at iba pang batas kaugnay ng assault at sapilitang paghuhubad. Sinisikap din ng pulisya na mapatigil ang pagkalat ng video at umaksyon laban sa 32 social media accounts na nag-upload nito.

Nagpaabot naman ng pagkondena ang National Commission for Women at Bihar State Women’s Commission at hiniling ang mabilis at patas na imbestigasyon, gayundin ang proteksyon sa pagkakakilanlan ng dalagitang biktima.

Samantala, umani ng batikos ang ilang pahayag ng mga opisyal na tila minamaliit ang insidente bilang “isolated” o “sporadic.” Iginiit naman ng mga ito na pananagutin ang lahat ng mapatutunayang sangkot.

India, magpapataw ng bayad sa malalaking UPI transactions

ni Justine Berganio @Overseas News | September 17, 2026

Photo: City and buildings - API International Advisory Council - File

Matatapos na ang mahigit anim na taong zero-cost payments sa India matapos ipataw ang 0.4% fee sa UPI transactions na lampas sa 2,000 rupees (P1,300) simula Oktubre 15.

Ayon sa National Payments Corporation of India (NPCI), hindi maaaring ipasa sa mga consumer ang bagong Merchant Discount Rate (MDR). Layunin nitong pondohan ang cybersecurity, fraud prevention, infrastructure at customer service ng payment system.

May flat fee na 5 rupees (P3) para sa ilang merchant transactions gaya ng railway, telecom, insurance at fuel. Para sa ibang merchants, capped sa 300 rupees (P196) ang fee sa transactions na lampas sa 75,000 rupees. (P49K)

Exempted naman ang small merchants na tumatanggap ng hanggang 100,000 rupees (P65K) kada buwan sa QR payments. Wala ring fee sa UPI QR transactions sa rural at semi-urban areas.

Samantala, 0.02% ang fee sa capital market payments gaya ng mutual funds at stock investments, capped sa 300 rupees (P196).

Umabot sa 24 bilyong transactions na nagkakahalaga ng $311 bilyon (P19T) ang UPI noong Agosto, na pangunahing ginagamit sa India sa pamamagitan ng apps gaya ng PhonePe at Google Pay.

Iginiit ng gobyerno na bawal ang hidden o platform fees at dapat tiyaking hindi sisingilin sa consumers ang MDR. 

9 natusta sa hotel

ni Justine Berganio @Overseas News | August 20, 2026

Photo: Sunog sa isang budget hotel sa central Kolkata, India - India Global Review

Patay ang siyam na katao, kabilang ang isang bata, matapos sumiklab ang sunog sa isang budget hotel sa central Kolkata, India, madaling-araw nitong Miyerkules.

Alas-2:50 ng madaling-araw nagsimula ang sunog sa ikalawang palapag ng hotel. Agad namang rumesponde ang mga bumbero at naapula ang apoy makalipas ang halos isang oras.

Tinatayang 30 katao ang ligtas na nailikas sa gusali, habang siyam pa ang isinugod sa ospital. Ayon sa mga awtoridad, kabilang sa mga nasawi ay anim na lalaki, dalawang babae at isang bata.

Posibleng electrical short circuit ang pinagmulan ng sunog, habang iniimbestigahan pa ang eksaktong dahilan. May paunang ulat din na maaaring sumabog ang air-conditioning unit ng hotel at nagsimula ang apoy.

Mabilis kumalat ang makapal na usok sa gusali at ilan sa mga biktima ay natagpuan sa loob ng mga banyo, ayon sa fire services director ng West Bengal.

May mga ulat na ilan sa mga nasawi ay mga Bangladeshi na nagtungo sa Kolkata para magpagamot. Gayunman, sinabi ng pulisya na hindi pa kumpirmado ang nationality ng mga biktima.

Nasa masikip na bahagi ng central Kolkata ang hotel, na kilala sa murang accommodation at mga restaurant.