Govt. Off'cls., OFWs, PWD, etc., sa Sept. pa mababakunahan

ni Mary Gutierrez Almirañez | March 9, 2021

Inihayag ng Inter-Agency Task Force (IATF) ang ilang hakbang ng pamahalaan kontra COVID-19 at ang paglago ng ekonomiya sa ginanap na Pandesal forum kaninang umaga, Marso 9, sa Kamuning Bakery sa pangunguna ni Secretary Karlo Nograles.

Aniya, libre ang bakuna at ginagawa ng gobyerno ang lahat ng paraan para mapadali ang pagdating ng mga ito upang masolusyunan ang lumalaganap na pandemya.

Kasabay nito, iginiit din niyang magtutuluy-tuloy na ang paglago ng ekonomiya sa mga susunod na buwan ngayong naumpisahan na ang pagbabakuna.

Samantala, aniya, sa ikatlong quarter pa ng taon posibleng mabakunahan ang mga kawani ng gobyerno, school workers, eligible students, social demography groups, indigenous people, PWD at OFWs sapagkat prayoridad pa rin hanggang sa Hunyo ang mga frontliners.

Kaugnay nito, hinihikayat din nila ang mga business owner na alagaan ang mga empleyado. Sa paraang ito anila, makakatulong ang mga negosyante sa ekonomiya.

Sa pagtatapos ng Marso ay sisimulan na rin ng pamahalaan ang usapin tungkol sa panibagong quarantine classifications para sa pagpasok ng Abril.

MM mayors, tutol na lumabas na ang edad 5 - 75

ni Mary Gutierrez Almirañez | February 18, 2021

Nagkasundo ang Metro Manila mayors na ibaba sa edad 15 ang mga papayagang lumabas ng bahay, taliwas sa 5 hanggang 75-anyos na unang rekomendasyon ng National Economic and Development Authority (NEDA).

Ayon kay MMDA Chairman Benjamin Abalos Jr., prayoridad ng mga alkalde ang pagbababa sa edad ng mga papayagang lumabas.

Binigyang-diin din niya ang pagtutol ng mga ito sa pagbubukas ng mga tradisyunal na sinehan. Gayunman, nakahanda pa ring sumunod ang mga ito sa rekomendasyon ng IATF.

Sa ngayon ay pinag-aaralan na ni Pangulong Rodrigo Duterte ang panukala ng mga alkalde.

Giit pa ni Presidential Spokesperson Harry Roque, asahan na ring tatalakayin sa Cabinet meeting sa ika-22 ng Pebrero ang panukalang pilot testing para sa face-to-face classes sa mga lugar na may mababang kaso ng COVID-19.

Aniya, ang mga panukalang iyan ay dahan-dahang ipatutupad sa loob ng limang taon habang umuusad ang vaccination program ng pamahalaan.

Pagbubukas ng mga sinehan at video arcades, pinalagan ng NCR mayors

ni Ronalyn Seminiano Reonico | February 13, 2021

Nabahala ang mga mayor ng National Capital Region (NCR) at nais nilang umapela sa pamahalaan kaugnay ng muling pagbubukas ng mga traditional cinemas sa mga lugar na nasa ilalim ng general community quarantine (GCQ), ayon kay Metro Manila Council Chairman and Parañaque City Mayor Edwin Olivarez.

Aniya, "Magkakaroon kami ng reservation. Baka mag-appeal kami sa Inter-Agency Task Force for the Management of Emerging Infectious Diseases (IATF) sa pagbubukas ng mga sinehan.

"In fact, kausap ko mismo si [Metropolitan Manila Development Authority] Chairman [Benhur] Abalos at ipaparating sa IATF ang aming reservation o manifestation regarding dito sa objection sa pagbubukas ng sinehan.

"Hindi po nagkaroon ng proper consultation tungkol sa specifics ng sinehan. Alam naman po natin na ang sinehan, enclosed po 'yan at mahigit isang oras ang gathering sa loob na air-conditioned."

Inanunsiyo ni Presidential Spokesperson Harry Roque kahapon, Biyernes, na simula sa February 15 ay maaari nang magbalik-operasyon ang mga traditional cinemas sa mga GCQ areas, ayon sa IATF.

Pinayagan na rin ang operasyon ng mga driving schools; video at interactive game arcades; libraries, archives, museums at cultural centers; meetings, incentives conferences at exhibitions; limited social events; accredited establishments ng Department of Tourism; at tourist attractions katulad ng mga parke, theme parks, natural sites at historical landmarks.

Nilinaw naman ni Olivarez na sang-ayon ang mga mayor sa desisyon ng IATF na itaas sa 50% ang venue capacity ng mga religious gatherings.

Aniya, "Sang-ayon lahat ng Metro Manila mayors na payagan ang 50% capacity sa mga religious gatherings, provided na 'yung minimum health protocols ipatutupad din po iyan.

"Nakikita naman po natin na open air naman ang ating mga simbahan so 'yun pong contamination, mako-control po 'yun."

Samantala, bukod sa pagbubukas ng mga traditional cinemas, tutol din umano ang mga mayor sa pag-apruba ng IATF sa mga video and interactive game arcades.

Pahayag ni Olivarez, "Isa po naming apprehension, kasi halos dikit-dikit 'yan at saka enclosure. Hindi pa pinapayagan ang mga bata para po lumabas.”

Aniya pa, "Kapag may mga enclosure, d'yan kami may apprehension, 'yung mga fully air-conditioned talaga, based sa consultation sa mga experts.

“'Yung mga open themed parks, halos wala kaming apprehension. Doon lamang sa mga may enclosure.”