Private companies, binawalang bumili ng COVID vaccines… DOH at IATF, 'di nag-iisip, palpak

— Sen. Drilon

ni Mary Gutierrez Almirañez | March 22, 2021

Inilabas ni Senator Imee Marcos ang nakitang draft ng Administrative Order mula sa National Task Force (NTF) Against COVID-19 na papipirmahan umano kay Pangulong Rodrigo Duterte, kung saan nakasaad na pinagbabawalan ang ilang pribadong kumpanya na direktang bumili sa manufacturer ng COVID-19 vaccines, ayon sa panayam kay Senate Minority Leader Franklin Drilon ngayong umaga, Marso 22.

Aniya, "Sinasabi nila na bawal 'yung mga kumpanya na gumagawa ng sigarilyo, 'yung gumagawa ng alak, ‘yung gatas. Bawal po ‘yan. Unang-una, may kasunduan po ang mga private company at saka ang gobyerno at pati manufacturer na 50% ng imported ay ido-donate sa gobyerno, and yet ipinagbabawal nila.”

Batay sa ulat, kabilang sa mga pinagbabawalang bumili ng sariling bakuna ay ang kumpanya ng sigarilyo, alak, gatas, asukal at soda na kung matatandaa’y kasama sila sa nag-donate ng mahigit P8.018 bilyong halaga para matugunan ang pandemya noong nagsisimula pa lamang ang lockdown sa bansa.

“Pangalawa, itong mga kumpanyang ito ay siya ring nagbabayad ng buwis. Ang laki ng buwis na ibinabayad nila... Ako mismo ang nagpasa ng batas tungkol sa Sin taxes. And yet, sasabihin, hindi kayo puwede magbigay ng bakunang libre sa inyong mga empleyado.”

Dagdag pa niya, “Talagang kapalpakan. ‘Di na nag-iisip itong taga-DOH at IATF... Maraming namamatay dahil sa incompetence nitong mga taong ito."

Giit naman ni former Health Secretary and Iloilo Representative Janette Garin, "It shouldn't even be considered. We're talking about public health here.

Draft or not, we should be inclusive to achieve herd immunity. Who is manipulating the department? Who is controlling, Duque?” Tanong pa nito, “Kaya n'yo bang buhayin mga pamilya nila? Kaya n'yo ba silang pagkagastusan sa gitna ng hirap ng buhay? Are you willing to give your whole salary to them so they may subsist everyday? Importante para sa ating mga kababayan na kumita. Pati ba naman kung saan sila nagtatrabaho ay gagawing hadlang sa kanilang hinaing na maging ligtas mula sa COVID?” Sa ngayon ay wala pang pahayag ang NTF hinggil sa lumabas na draft ng Administrative Order.

Operasyon ng cinemas, arcades, museums, atbp. bawal ulit

ni Ronalyn Seminiano Reonico | March 19, 2021

Muling ipinagbawal ng Inter-Agency Task Force (IATF) ang operasyon ng ilang establisimyento sa mga lugar na nasa ilalim ng general community quarantine (GCQ) sa loob nang 2 linggo dahil sa pagtaas ng kaso ng COVID-19, ayon sa Malacañang.

Simula ngayong araw, March 19 hanggang April 4, ayon kay Presidential Spokesperson Harry Roque, suspendido ang operasyon ng mga sumusunod: Driving schools; Traditional cinemas; Videos and interactive game arcades; Libraries; Archives; Museums and cultural events; Limited social events; at Limited tourist attractions, except open-air tourist attractions

Samantala, ang pagsasagawa ng mga pagpupulong, conferences at exhibitions sa mga “essential gatherings” at maging ang mga religious gatherings ay nililimitahan lamang sa 30% capacity ng venue sa mga lugar na nasa ilalim ng GCQ.

Limitado rin sa 50% capacity ang mga dine-in restaurants, cafes, at personal care services. Nilinaw naman ni Roque na maaaring itaas ng lokal na pamahalaan hanggang sa 50% capacity ang mga religious gatherings batay sa kondisyon ng kanilang nasasakupang lugar.

Pahayag ni Roque, “Binibigyang discretion din ang mga lokal na pamahalaan na taasan ang venue capacity na hindi lalagpas ng 50 percent base sa mga kondisyon sa kanilang lugar.

“Hinihikayat ang mga ahensiya ng pambansang pamahalaan na ipagpaliban muna ang mga non-critical activities kung saan magkakaroon ng mga pagpupulung-pulong o mass gatherings.”

COVID testing sa mga papasok sa probinsiya, ipinababalik

ni Mary Gutierrez Almirañez | March 11, 2021

Nanawagan ang League of Provinces of the Philippines (LPP) sa Inter-Agency Task Force (IATF) na ibalik ang Negative COVID-19 test result requirement sa mga indibidwal na papasok sa bawat probinsiya, ayon sa panayam kay LPP President Marinduque Governor Presbitero Velasco kaninang umaga, Marso 11.

Aniya, "Ang hinihiling po namin, para mayroon naman po kaming paraan para malaman po kung positive 'yung papasok. Upon arrival du'n sa port of entry na i-allow po ang LGU na mag-prescribe ng PCR test, saliva test or antigen test…

"Marami pong asymptomatic. Kung gagamitin po ang pine-prescribe ng Resolution 101 na clinical exposure assessment, hindi po makikita roon kung positibo ang papasok dahil marami rin po ang asymptomatic na carrier.”

Nilinaw niyang sa ilalim ng Resolution 101 ay PRC test lamang ang inaprubahan ng IATF na puwedeng gamitin.

Ang test ay gagawin umano sa labas ng probinsiya saka dadalhin sa point of entry, ngunit iyon ay depende kung ire-require ng LGU.

Dagdag pa niya, “Very vulnerable po ‘yung mga probinsiya at mga lungsod dahil tinanggal na po ‘yung travel authority, tinanggal po ‘yung medical certificate, wala na pong quarantine kung asymptomatic.”

Bunsod ng pagiging maluwag sa mga probinsiya ay nagdulot iyon aniya ng mataas na bilang ng COVID-19 sa ilang lugar na noo’y COVID-free na.

Sa ngayon ay isinumite na ng LPP sa IATF ang rekomendasyong gawing discretionary ang COVID test sa point of entry.