Walang makukuhang teritoryo ng 'Pinas - AFP

ni Angela Fernando - Trainee @News | December 21, 2023

Nagpahayag si General Romeo Brawner Jr., hepe ng Armed Forces of the Philippines (AFP), nitong Huwebes, na nakatutok ang AFP sa pagtataguyod ng integridad ng teritoryo ng 'Pinas sa ilalim ng batas pandaigdig.

Sinabi ito ni Brawner sa  ika-88 anibersaryo ng AFP habang binabalikan ang pahayag ni Pangulong Ferdinand 'Bongbong' Marcos Jr. sa kanyang nakaraang State of the Nation Address.

Saad niya, “With the statement of our commander-in-chief, President Ferdinand R. Marcos Jr.–saying the Philippines will not give up a single square inch of its territory, we will continue to uphold our territorial integrity and sovereignty in accordance with our institution and with international law.”

Dagdag niya, pinagtitibay nila ang mga operasyong nangangalaga sa teritoryo ng bansa sa pamamagitan ng pagpapaigting ng presensya sa mga karagatang nasasakupan ng 'Pinas bilang tugon sa mga pagsubok na kinakaharap ng soberanya.

Nagpaalala rin ang AFP chief na matagumpay lagi ang Pilipinas laban sa mga pagsubok sa loob o labas man ng bansa.

Pagkondena sa China sa WPS, inihirit sa Kongreso

ni Angela Fernando - Trainee @News | December 6, 2023

Nagkaisa ang House of Representatives nitong Miyerkules na aprubahan ang resolusyong nagpapahayag ng pagkondena sa 'di makatarungang pagsalakay ng China sa West Philippine Sea.

Naglalayon ang House Resolution 1494 na udyukan ang pamahalaan na palagan at ipaglaban ang karapatan ng 'Pinas sa exclusive economic zone (EEZ) ng bansa na kinikilala ng Hague-based Permanent Court of Arbitration (PCA).

Nakasaad sa resolusyon na dapat bigyang-diin ng bansa ang karapatan sa WPS at ipatupad at panindigan ang ipinanalong teritoryo sa Permanent Court of Arbitration (PCA) sa Hague, Netherlands.

Matatandaang idineklara ng PCA nu'ng taong 2016 na ang Panganiban (Mischief) Reef, Ayungin (Second Thomas) Shoal, at Recto (Reed) Bank ay nasa loob ng EEZ ng Pilipinas at ibinasura ang hinaing ng China hinggil sa South China Sea.

Idiniin naman sa resolusyon na ang mga mapanganib na kilos ng China laban sa mga misyon ng bansa at para sa regular rotation and resupply (RORE) sa BRP Sierra Madre ay mas lumalala dahil sa mga sunud-sunod na insidente.

VP Sara, pinaiimbestigahan ang pagpapataksik sa kanya

ni Angela Fernando - Trainee @News | November 19, 2023

Kinumpirma ni Vice-President Sara Duterte ngayong Linggo na nag-iimbestiga ang kanyang opisina ukol sa sabi-sabing pagpapatalsik sa kanya at nilinaw na walang gusot sa pagitan nila ni Presidente Ferdinand "Bongbong" Marcos Jr.

Iniugnay ang mga umusbong na tsismis sa sinasabing hidwaan sa loob ng mga nagsasanib na grupo sa administrasyong binubuo ng mga malalaking partido at mga maimpluwensyang pamilya.

Saad ng Bise Presidente, sinusuri pa nila nang mabuti ang isyu upang makapagbigay ng pahayag sa tamang oras.

Sa kabilang banda, sinabi ni Speaker Martin Romualdez na walang ginagawang pagkilos ang House of Representatives para patalsikin si VP Sara sa kanyang puwesto.