2 Pinoy sa Israel, pinaghahanap pa — DMW

ni Angela Fernando - Trainee @News | October 28, 2023

Nakikipagtulungan ang 'Pinas sa Israeli Defense Forces upang mahanap ang 2 Pinoy na nawawala sa gitna ng karahasang nangyayari sa Hamas-Israel.

Ayon sa opisyal ng Department of Migrant Workers (DMW) na si Hans Leo Cacdac may umaabot sa 770 pamilya sa bansa ang humihingi ng tulong sa ahensya upang hanapin ang kanilang mga mahal sa buhay sa Israel.

May 768 na OFWs na ang nahanap at patuloy pa ring nakikipag-ugnayan ang DMW sa IDF upang mapabilis ang paghahanap sa dalawang Pilipino.

Sa kasalukuyan, wala pang nakukuhang impormasyon hinggil sa paghahanap sa mga nawawala

Hindi naman tumitigil at nawawalan ng pag-asa ang DMW na mahanap ang dalawang OFW.

Bakbakang Israel-Hamas tumitindi, 7,028 na patay

ni Angela Fernando - Trainee @News | October 28, 2023

Handa na ang Hamas na tuluyang harapin ang sunud-sunod na pag-atake ng Israel na sumira sa Gaza.

Dagdag ng militanteng grupo, kasalukuyang nakikipagbuno ang kanilang mga tauhan laban sa Israel.

Ito ay matapos sabihin ng tagapagsalita ng militar ng Israel na si Rear Admiral Daniel Hagari na kanilang pinalawak ang mga operasyon at binomba ang mga daan at imprastrakturang pwedeng gawing lusutan ng Hamas nu'ng Biyernes, Oktubre 27.

Pinaalam din ng Hamas na kanilang nakababangga ang Israeli sa hilagang-silangang bayan ng Beit Hanoun at sa gitnang bahagi ng Al-Bureij sa Gaza kamakailan.

Samantala, pumapalo na sa mahigit 7,028 ang bilang ng mga namatay, kasama ang 2,913 na bata.

Pinoy na namatay sa Israel, 4 na

ni Eli San Miguel - Trainee @News | October 19, 2023

Nasawi ang isang Pilipino sa kaguluhan sa pagitan ng Israel at Hamas, ayon kay Foreign Affairs Secretary Enrique Manalo ngayong Huwebes.

Dahil dito, umabot na ang bilang ng mga namatay na Pilipino sa apat.

“I regret to inform the nation that we have received confirmation from the Israeli government of another Filipino casualty in Israel,” ani Manalo sa kanyang tweet.

“Out of respect for the wishes of the family, we shall be withholding details on the identity of the victim. But we have assured the family of the Government’s full support and assistance,” dagdag niya.

Ang namatay ay isang Pinay na caregiver na nasawi sa atake ng Hamas sa Israel noong Oktubre 7, ayon kay DFA Undersecretary Eduardo De Vega.

“She is one of the three missing Filipinos. Israel has confirmed. According to their record or testing, she is one of those who died due to the attack on October 7. She works in the Kibbutz as a caregiver,” sabi ni De Vega sa Radyo 630 ngayong Huwebes.

Dalawang iba pang Pilipino ang nananatiling nawawala, ayon kay De Vega.