Mga taga-Europe, nagprotesta para sa tigil-putukan sa Israel-Hamas war

Filni Angela Fernando - Trainee @News | November 5, 2023

Nagtipon ang libu-libong tao sa kabi-kabilang protesta sa Berlin, London, at Paris para hilingin ang tigil-putukan at karahasang nangyayari sa Israel-Hamas nitong nagdaang Sabado, Nobyembre 4.

Batay sa estimasyon ng mga pulis umabot sa 17,000 ang nagprotesta sa Duesseldorf at 9,000 sa kabisera na Berlin, 30, 000 naman sa Trafalgar Square, London at 19,000 katao naman sa Paris na umabot ng 60, 000 matapos makiisa ng ilang grupo ng mga komunista, dagdag ng CGT.

Naganap ang ilang pag-aresto ngunit hindi nagpatinag ang mga tao sa kanilang panawagan na palayain na ang Palestine mula sa mga pag-atake.

Umaabot sa 9, 500 na ang namatay sa tuloy-tuloy na pambobomba, karamihan sa mga nasawi ay kababaihan, kabataan, at mga inosenteng sibilyan na naipit sa alitan sa pagitan ng Hamas at Israel.

May ilang protesta rin ang naganap sa US na may parehas na panawagan na matapos na ang karahasan.

46 Pinoy, nais tumawid ng Rafah crossing mula Gaza

Filni Angela Fernando - Trainee @News | November 5, 2023

Nagpahayag ng kagustuhang makatawid sa Rafah crossing ng 46 na Pinoy mula sa Gaza upang masiguro ang kanilang kaligtasan sa gitna ng lumalalang pag-atake ng Israel, ayon sa Department of Foreign Affairs (DFA) Linggo ng umaga.

Ayon sa DFA Undersecretary na si Eduardo de Vega, bumaba na ang bilang ng nagnanais na makalabas ng Gaza mula nu'ng maipaalam sa kanila na hindi nila maaaring isama ang mahal sa buhay na Palestino.

Opisyal namang binigyan ng Israel ang 136 Pilipino na naiipit sa karahasan ng permisong makalabas at tuluyang makatawid sa Egypt.

Sa kasalukuyan, umaasa ang DFA na tataas ang bilang ng mga Pilipinong gustong makauwi pag nakatawid nang maayos ang naunang 20 Pinoy sa sinasabing crossing.

Pambobomba ng Israel sa ambulansya ng Gaza, kinondena ng UN

Filni Angela Fernando - Trainee @News | November 4, 2023

Kinondena ng pinuno ng United Nations na si Antonio Guterres ang ginawa ng pwersa ng Israel na pag-atake sa ambulansya ng Gaza na nasa labas ng ospital ng Al Shifa nu'ng Biyernes, Nobyembre 3.

Saad ni Guterres, dapat nang itigil ang nangyayaring karahasan sa dalawang bansa.

Pagbabahagi niya, labis niyang ikinatakot ang pagpapaulan ng bomba ng Israel sa mga ospital at suportang medikal sa Gaza.

Dagdag pa niya, nanghina siya sa mga imahe ng katawan ng mga inosenteng sibilyan na nagkalat sa daan.

Sinasabing namataan ang nagkalat na mga katawan sa labas ng ospital kung saan kasalukuyang tumutuloy ang mga residenteng apektado ng pambobomba.

Iginiit naman ng kalihim ng UN na labis ang epekto ng mga pag-atake sa mga sibilyan ng Gaza, lalo sa kababaihan at kabataan.

Marami sa mga naiipit ay pinagkaitan na ng karapatan, tulong, at maging binawian ng buhay.

Tinatayang 9,200 na ang namatay dahil sa sunud-sunod na pag-atake ng Israel sa Gaza.