Indian mango, epektib na panunaw at panlaban sa stress

ni Sir Govinda Jeremaya - @Halamang Gamot | September 25, 2020

Ang Indian mango.

Walang pagtatalo, lahat ay nagkakaisa kapag sinabing ang pinakasikat na mangga sa Pilipinas ay Indian mango. Maraming mangga rito sa ‘tin, may manggang pico, manggang carabao, apple mango at iba pa, pero ang pinagkakaguluhan ay ang Indian mango.

Ito ay sa dahilang eksakto ang lasa ng Indian mango sa panlasa ng mga Pinoy. Kumbaga, hindi sobrang asim at hindi rin sobrang tamis, at ito ang pinakagusto ng kababaihan kaysa sa iba pang uri ng mangga.

Iba na ngayon ang naging tradisyon, as in, modern tradition na kung saan hindi sitsirya ang binabanatan ng mga Pinoy habang nanood ng TV shows kundi Indian mango na. Maraming nagbago sa buhay ng mga Pinoy nang dumating ang Indian mango. Ang katagang “selling like a hot cake” ay napalitan na ng “selling like Indian mango” para sa mga prroduktong mabili sa merkado.

Kapag hilaw pa, ito ay medyo maasim, kaya ito ay kinagigiliwang kainin o papakin. Kapag naman malapit nang mahinog, ang kombinsyon ng asim at tamis ay nagbibigay ng kakaibang sarap, kaya ito ang hinahanap-hanap. Kapag hinog na, parang ayaw na ng mga tao dahil mamasa-masa at hindi na masarap papakin.

Ito rin ang kaibahan ng Indian mango sa iba pang uri ng mangga dahil ‘yung iba ay pinahihinog muna para sumarap, samantalang ito ay hindi na kailangang pahinugin.

Pero sa totoo lang, hindi lang sarap ang makukuha sa Indian mango dahil ito rin ay maraming medicinal benefits tulad ng mga sumusunod:

● Hindi kayang mapigilan ang pagtanda ng tao, pero mapababagal ng Indian mango ang aging o mabilis na pagtanda.

● Sa pagkain nito, mas tumitibay ang mga buto, kaya ang Indian mango ay maganda para sa mga taong madaling mabalian ng buto.

● Napakahusay ng Indian mango bilang panlaban sa diabetes dahil sa dami ng fiber na taglay nito. May fiber din ang iba pang mangga, pero higit na marami ang nasa Indian mango. Ang fiber ay nagpababa ng glucose o sugar level.

● Napakaganda rin ng Indian mango para sa mga taong nahihirapang tunawin ang kanilang mga kinain dahil sa fiber na taglay nito.

● Anti-stress din ang Indian mango. Ang totoo nga, mararamdaman mong tinalo mo ang stress ‘pag nakakain ka ng ilang piraso nito.

Narito naman ang mga nutrients na taglay ng Indian mango:

● Vitamins A, C at E

● Folate

● Potassium

● Calcium

● Iron

● Magnesium

● Phosphorus

● Copper

● Selenium

● Manganese

● Zinc

DAGDAG-KAALAMAN: Kapag pinakuluan sa asukal ang mga hinog na indian mango, ito ay sobrang masarap. Ito na ngayon ang makabagong paraan ng pagkonsumo ng prutas na ito dahil ang minatamis na Indian mango ay maihahambing sa mamahaling imported na prutas na ginawang matamis.

Good luck!

‘Di lang basta nakakabusog... Saging na saba, panlaban sa menstrual pains at high blood

ni Sir Govinda Jeremaya - @Halamang Gamot | September 23, 2020

Ang saging na saba.

Maraming klase ang saging—may latundan, señorita, lakatan at iba pa, pero sa lahat ng saging, ang saba ay natatangi.

Ang ibang saging ay hindi puwedeng iluto o ilaga at hindi puwedeng gawing sangkap sa masasarap na ulam. Ang totoo nga, saging na saba ang tunay na nagpapasarap sa nilagang karne tulad ng baka, baboy o kalabaw. Gayundin, kapag ang nilagang baka ay walang saging na saba, hindi ito maituturing na nilaga.

Ganundin ang super-espesyal na “putsero”, ito ay kailangang may saging na saba dahil kung wala, wala na rin itong masarap na lasa.

Ang saging na saba ay hindi lang pampasarap ng ulam dahil ito rin ay super food na gamit sa herbal medicine.

Noong panahon ng ikalawang digmaang pandaigdig o World War II, napakalaki ng tulong ng saging na saba sa mga sundalong sugatan. Sa panahon ding ito, naimbento ni Maria Y. Orosa, food technologist at pharmaceutical chemist, ang banana ketchup dahil ginawa niyang ketchup ang saging saba.

Roon na nakilala ang saging na saba bilang herbal medicine. Dahil maraming sundalo ang nagsigaling sa kanilang iba’t ibang karamdaman, pagkatapos ng digmaan, hindi lang ang mga sundalong nakipaglaban para sa bayan ang itinanghal na bayani kundi maging ang saging na saba.

Narito ang mga karamdaman na kayang lunasan ng saging na saba:

• Ito ay may kakayahang mapabilis ang paghinto ng paninigarilyo. Dahil sa Vitamin B at iba pang minerals, ang epekto ng nicotine sa katawan ay nalulunasan.

• Malaki rin ang naitutulong ng saba para mabawasan ang menstrual pains ng kababaihan.

• Pinanatili ng saging na saba ang magandang body temperature para sa mga buntis.

• May kakayahan ang saging na saba na pagandahin ang pagdaloy ng dugo sa buong katawan.

• Dahil sa taglay na matataas na level ng potassium, ang high blood pressure ay naiiwasan at ang puso ay lumalakas.

• Mabilis na napapagaling ng pagkain ng saging na saba ang ulcer.

• Ang dahon ng saging na saba ay ginagawang higaan ng mga nasunog ang katawan. Ito rin ay itinatapal sa nasunog na bahagi ng katawan para mapabilis ang paggaling.

Samantala, saging na saba ang sangkap ng maruya na paborito ni Pangulong Rodrigo Duterte. May mga nag-aakala na ang maruya ay pinritong saging, pero ang tunay na maruya ay ibinabalot sa harina ang saging na saba saka ipiprito. Ibig sabihin, ang simpleng pagprito sa saging na saba ay hindi matatawag na maruya.

Hindi rin tunay na maruya ang saging na saba kapag iba ang ipinambalot dito dahil tulad ng nasabi na, harina ang pambalot sa saging na saba para matawag na tunay na maruya.

Dito sa Pilipinas, akala ng marami ay kanin at bigas lang ang staple food, pero sa totoo lang, mali ang ganitong pananaw dahil sa mga probinsiya, saging na saba ang pangunahing pagkain. Kahit hindi na kumain ng kanin o mais, okey na ang mga tao, basta makakain lang ng saba.

Ang isa pang totoo tungkol sa staple food na saging na saba, hinog o hilaw, ito ay inilalaga at pamalit sa kanin at mais.

May panahon sa ating bansa, lalo na sa Manila na sobrang taas ng presyo ng bigas. Kapag muling nangyari ito, subukan mo ang saging na saba at magugulat ka dahil mas mahaba ang oras na ikaw ay busog.

Good luck!

‘Di lang basta staple food ng OFWs... Dates, panlaban sa hangover at anemia

ni Sir Govinda Jeremaya - @Halamang Gamot | September 16, 2020

Ang dates fruit.

Ngayong nag-uwian ang maraming overseas Filipino workers (OFWs) mula sa Middle East, hindi maiiwasan na pagkuwentuhan ang kanilang naranasan tulad ng masasaya at malulungkot na kuwento ng buhay.

Gayundin, hindi naman nila maiiwasang magkuwento tungkol sa isang bunga ng halaman na wala rito sa atin at ito ay ang dates fruit.

Ang kuwento, nalaman nilang ang dates fruit ay staple food sa Middle East at kung ikukumpara sa atin, ito ay bigas at mais. Ibig sabihin, regular itong kinakain at ito na mismo ang pagkain ng mga taga-Middle East.

Dahil dito, maraming OFWs ang lihim na nagtatago o nagtatabi ng dates fruit para kanilang kainin kapag sila ay natapat sa amo na hindi maganda ang ugali. Hindi bigas o kanin at iba pang pagkaing Pinoy ang kanilang itinatago dahil kapag nakita ito ng kanilang amo, kukunin ito at itatapon.

Pero kapag ang nakita ng amo ay dates fruit, hahayaan lang itong itabi ng OFW, kaya malaki ang kanilang pasasalamat sa nasabing prutas.

Ang fossil record ng dates palm ay sinasabing noon pang mahigit-kumulang 50 milyong taon nang nakararaan.

Tulad ng nasabi na, ito ay unang nakita sa Midde East at ito ang kanilang pagkain araw-araw. Gayundin, dates fruits ang numero-unong dinadala ng mga tao sa paglalakbay kung pupunta sa malayong lugar sa halip na sako-sako ng iba pang klase ng pagkain na pabigat at pahirap sa mga manlalakbay.

Kaya sa gitnang silangan, ang dates fruits ay itinuring na prutas ng kaligtasan. Walang ibang prutas sa mundo na tinawag na ganito kundi ang dates fruit lang.

Gayunman, hindi ka lang sa gutom ililigtas ng dates dahil puwede ka rin nitong iligtas sa maraming klase ng sakit o karamdaman tulad ng mga sumusunod:

1. Nagpapalakas ng buto ang dates kaya ito ay nagsisilbing gamot sa may osteoporosis dahil sa kombinasyon ng minerals na magnesium at copper na nasa dates fruit.

2. Ililigtas din ng dates fruit ang mga taong nahihirapang dumumi dahil sa pagkain nito, mabilis na mailalabas ang dumi.

3. Maililigtas ka rin ng dates sa nakamamatay na sakit sa puso. Napakataas ng potassium na nasa dates kaya pinananatili nito ang magandang kalusugan ng puso.

4. Panlaban ito sa inflammation o pamamaga. Ito ay dahil tulad ng nasabi na, mataas ang taglay nitong magnesium na isang anti-inflammatory agent.

5. Ililigtas din nito sa sakit mula sa menopausal period ang mga babae dahil magagawang labanan ng dates ang pamamaga ng mga bahagi ng reproductive system ng kababaihan.

6. Panlaban sa anemia ang dates dahil ito ay mayaman sa iron.

7. Nagpapaganda ng katawan ang dates para sa mga sobrang payat dahil ito ay mayaman sa calories.

8. Ililigtas din ng dates ang mga taong mataas ang level ng cholesterol dahil ito ay mayaman sa fiber.

9. Kaligtasan din ang hatid ng dates sa mga may hangover dahil sa sobrang pag-inom ng alak. Ang mataas na level ng fructose nito ay nagpapabilis para ma-digest ang alcohol sa katawan.

May mga mabibiling dates fruit sa mga pamilihan dito sa atin. Subukan mong tikman ang dates at malalaman mo na ang kuwento ng mga OFW tungkol sa prutas na ito ay nakamamangha.

Good luck!