KCS-Mandaue, kampeon sa VisMin Super Cup

ni Gerard Peter - @Sports | May 11, 2021

Kinumpleto ng KCS Computer Specialist-Mandaue City ang tila mala-fairy tale na kampanya laban sa top seed na MJAS Zenith-Talisay City Aquastars nang kunin nito ang winner-take-all na panalo, 89-75 sa Game three ng Visayas division ng Chooks-to-Go Pilipinas VisMin Super Cup, Linggo ng gabi sa Alcantara Civic Center sa Cebu.

Hindi na pinalampas pa ng Computer Specialist ang pagkakataon na makamit ang unang titulo sa kauna-unahang professional league sa katimugan ng bumanat ng todo ang mga bataan ni coach Mike Reyes sa pangunguna ni dating Alaska Aces combo guard at dating Far Eastern University stalwart Ping Exciminiano nang kumana ito ng team-high 15 points kasama pa ang 5 rebounds, 1 assist at 3 steals.

Aminado ang mga koponan sa Visayas leg na malaki ang tsansang magwagi ng titulo ang Aquastars, na nagpatunay sa undefeated 10-0 kartada sa elimination round upang agad na dumiretso ito sa championship round. Gayunpaman, ginulat ng Computer Specialist ang Aquastars sa Game 1 noong Biyernes ng gabi sa 67-66, na dalawang beses nilang tinalo sa pamamagitan ng lopsided na 57-77 sa 1st round at 73-81 sa 2nd round.

Subalit nagpamalas ng matinding depensa ang KCS-Mandaue laban sa paboritong kalaban na nilimita sa 3rd quarter sa 11 puntos, at hindi na muli pang makalamang hanggang matapos ang laro. “I got to win the hearts of the players. That’s why they played so hard because I think I was able to capture it,” pahayag ni Reyes. “I told them, ‘let’s try to make history. Let’s give them forty minutes of hell!,” dagdag ni Reyes.

Sapol ng makuha ang 7-point lead na kalamangan sa third canto sa 43-36, nagtulong-tulong na sina Rhaffy Octobre, Bernie Bregondo, Al Francis Tamsi, Red Cachuela, Michole Solera, Shaq Imperial, Dyll Roncal at Exciminiano para agawin sa Talisay-City Aquastars ang kalamangan at ibaon ang 11-point lead sa pagpasok ng 4th canto sa 50-61.

Itinanghal na Finals MVP ang 32-anyos na Olongapo City-native na si Exciminiano na rumerehistro ng 13.0 points, 6.0 assists, at 3.0 steals sa tatlong laro sa finals.

KCS Mandaue, 'nalo sa Game 1 Final; Gimpayan ng Aquastars ang MVP

ni Gerard Peter - @Sports | May 09, 2021

Isang mahalagang 3-point basket ang isinalpak ni 2019 CESAFI MVP Shaq Imperial sa nalalabing segundo para sa KCS Computer Specialist-Mandaue City upang ibigay ang kauna-unahang talo sa MJAS Zenith-Talisay City Aquastars, 67-66, sa Game 1 ng Chooks-to-Go Pilipinas VisMin Super Cup Visayas leg Finals, Biyernes ng gabi sa Alcantara Civic Center sa Cebu.

Mula sa 2 free-throw ni Aquastar guard Shane Menina sa 1 minuto ng laro para lumamang, 64-66, kumana ng 3 at 2 pts shot si Imperial, ngunit nagmintis, gayunpaman isang offensive rebound ni Michole Sorela ang bumuhay sa pag-asa ng Mandaue City na agad na ipinasa kay Imperial para sa walang sablay na 3-points.

“He always comes up big when his number is called,” pahayag ni KCS assistant coach Vince Urot. “We all know him from his CESAFI days. He is not afraid to take those big shots in the grandest stage,” dagdag ni Urot tungkol kay Imperial na tumapos ng 16 points.

May pagkakataon na maitabla o makuha ng Aquastars ang kalamangan ng tumuntong sa free throw line si center Jhaymo Eguilos sa 32 seconds, ngunit a hindi binuwenas ang dating Phoenix at Blackwater center sa PBA na makabuslo na nakuha naman ni Dyll Roncal para sa rebound.

Ito ang kauna-unahang beses na natalo ang Aquastars sa liga sapol nang magsimula ang mga laro noong Abril 9, habang nakabawi ang Computer Specialist sa lopsided na 57-77 pagkatalo sa 1st round at 73-81 sa 2nd round.

Itinanghal bilang pinakamahusay na manlalaro ng Visayas division ng VisMin Super Cup si MJAS Zenith-Talisay City Aquastar forward Jaymar Gimpayan para sa kauna-unahang Most Valuable Player awardee. Ang dating Our Lady of Fatima University ay naging malaking dahilan para sa Aquastars para manatiling undefeated sa elimination round ng inaugural season ng kauna-unang professional league sa katimugan.

Nagtala ang 25-anyos na 6-foot-2 small forward 416 points sa MVP race para manguna sa kabuuang 333 statistical points.

PBA players magsasanay na, pero istrikto ang health protocols

ni Gerard Peter - @Sports | May 09, 2021

Inaasahan ang muling pagbabalik sa pagsasanay ang mga team ng Philippine Basketball Association (PBA) sa Mayo 18 nang pumayag ang Inter Agency Task Force na ipagpatuloy ang kani-kanilang 5-on-5 scrimmages para sa pagbubukas ng 46th season ng liga.

Kasunod ng pag-apruba ng IATF na makapagsanay sila sa mga lugar ng General Community Quarantine (GCQ) at Modified GCQ, ipatutupad din ang mas mahigpit health protocols at safety standards, gaya ng ipinatupad noong ‘PBA bubble’ sa Clark, Pampanga.

Inihayag ni PBA commissioner Willie Marcial sa isang press briefing noong Biyernes na, “Yun ang ni-request natin, sinabi yung protocols. Sinabi na bago mag-practice, iba na yung swab testing natin dati 5 tapos quarantine ngayon, 7 days before practice, test ka, 2 days before practice test ka, naka-isolation ka rin tapos dati every 14 days ang swab testing natin, ngayon every 10 days na, yun ang pinresent natin last Wednesday [sa Task Force],” paliwanag ni Marcial. “Pero magandang balita pinayagan na tayong magscrimmage at practices, hindi lang natin alam kung saan, NCR ba, Batangas ba, o sa Antipolo, so 'yun ang liliwanagin namin,” dagdag ng Commish.

Idinagdag din ni Marcial na magpapatawag ito ng pulong sa coaches, players, at team managers sa susunod na linggo upang idetalye at ipaliwanag ang protocols at bagong sistema na patuloy na dapat sundin. “Magtatawag ako ng meeting ng coaches, players at team managers by next week para malaman namin yung protocols. Katulad ng sinabi ko, meron kaming bagong sistema para sa swab testing sa darating na 7days before na ma-swab ka, 2 days before at nasa amin ang resulta, kung hindi 'di makakalaro,” bigyang-diin ni Marcial.